ພາບ: ແສງຄຳ; ຂ່າວໂດຍ: ສ. ສົດໃສ
ວັນທີ 5 ພຶດສະພາ 2023 ທີ່ສະໂມສອນຂອງຄະນະຈັດຕັ້ງສູນກາງພັກ ໄດ້ຈັດພິທີປາຖະກະຖາສະເຫຼີມສະຫຼອງວັນກຳມະກອນສາກົນ ຄົບຮອບ 137 ປີ ໃຫ້ກຽດເປັນປະທານ ແລະ ປາຖະກະຖາໂດຍສະຫາຍ ສົມລຶກ ສຸວັນນະສານ ຄະນະພັກ, ຄະນະບໍລິຫານງານສູນກາງສະຫະພັນກຳມະບານລາວ, ຫົວໜ້າສະຖາບັນພັດທະນາກຳມະບານລາວ, ມີສະຫາຍ ພອນສະຫວັນ ໄຊຊະນະ ກຳມະການພັກ ຄະນະຈັດຕັ້ງສູນກາງພັກ, ຮັກສາການຫົວໜ້າກົມໂຄສະນາກໍ່ສ້າງພັກ-ພະນັກງານ, ມີສະຫາຍ ຄູນເພັງ ໄຊສະຫວາດ ປະທານສະຫະພັນກຳມະບານ ຄະນະຈັດຕັ້ງສູນກາງພັກ, ມີບັນດາສະຫາຍຄະນະບໍລິຫານງານສະຫະພັນກຳມະບານ, ຄະນະກຳມະບານຮາກຖານໜ່ວຍ ແລະ ສະມາຊິກກຳມະບານ ພາຍໃນຄະນະຈັດຕັ້ງສູນກາງພັກເຂົ້າຮ່ວມຈຳນວນ 148 ສະຫາຍ, ຍິງ 58 ສະຫາຍ.
ໃນພິທີດັ່ງກ່າວ ສະຫາຍ ສົມລຶກ ສຸວັນນະສານ ໄດ້ຍົກໃຫ້ເຫັນມູນເຊື້ອປະຫວັດຄວາມເປັນມາຂອງວັນກຳມະກອນສາກົນ ທີ່ເກີດຂຶ້ນໃນວັນທີ 1 ພຶດສະພາ 1886 ໃນປະເທດສະຫະລັດອາເມຣິກາຢູ່ຕົວເມືອງຊິກາໂກ ເປັນຄັ້ງທຳອິດທີ່ຊົນຊັ້ນກຳມະກອນ ແລະ ຊາວຜູ້ອອກແຮງງານໄດ້ມີການຕໍ່ສູ້ ໂດຍຖືເອົາເນື້ອໃນຖະແຫຼ່ງການຮຽກຮ້ອງໃຫ້ພວກນາຍທຶນຕ້ອງປະຕິບັດຕາມການສະເໜີຂອງກຳມະກອນວ່າ: ແຕ່ນີ້ຕໍ່ໄປບໍ່ໃຫ້ກຳມະກອນຜູ້ໃດເຮັດວຽກເກີນ 8 ຊົ່ວໂມງຕໍ່ມື້ ຄື: ເຮັດວຽກ 8 ຊົ່ວໂມງຕ້ອງພັກຜ່ອນ 8 ຊົ່ວໂມງ. ໃນມື້ນັ້ນ ໄດ້ມີກຳມະກອນນັດຢຸດງານເຖິງ 5.000 ແຫ່ງ ໃນຕົວເມືອງໃຫຍ່ຂອງປະເທດສະຫະລັດອາເມຣິກາ ເຊັ່ນ: ຊີກາໂກ, ວໍຊິງຕັນ, ນິວຢອກ, ບາຕິມໍ ແລະ ຕົວເມືອງອື່ນໆ ມີຜູ້ເຂົ້າຮ່ວມເຖິງ 3 ແສນກວ່າຄົນ ໄດ້ຮຽກຮ້ອງ ແລະ ບັງຄັບໃຫ້ນາຍທຶນ ຕ້ອງຮັບຮອງເອົາສິດໃນການເຮັດວຽກຂອງກຳມະກອນໃນມື້ໜຶ່ງ 8 ຊົ່ວໂມງ.
ການປາຖະກະຖາຄັ້ງນີ້ ບັນດາສະມາຊິກກຳມະບານໃນທົ່ວສຳນັກງານຄະນະຈັດຕັ້ງສູນກາງພັກ ໄດ້ຮັບຮູ້ເຊື່ອມຊຶມປະຫວັດແຫ່ງການກຳເນີດ, ເຕີບໃຫຍ່ຂະຫຍາຍຕົວ ແລະ ພາລະກຳປະຫວັດສາດຂອງຊົນຊັ້ນກຳມະກອນສາກົນ, ຮຽນຮູ້ເຖິງທາດແທ້ມູນເຊື້ອປະຕິວັດ, ລັກສະນະອັນດີເລີດຂອງຊົນຊັ້ນກຳມະກອນລາວ ພາຍໃຕ້ການນຳພາຂອງພັກປະຊາຊົນປະຕິວັດລາວ ແຕ່ໃນອະດີດເຖິງປະຈຸບັນ. ແນ່ໃສ່ປຸກລະດົມ ແລະ ສ້າງຈິດສຳນຶກໃຫ້ແກ່ສະມາຊິກກຳມະບານໃຫ້ມີຄວາມບຸກບືນ, ຕັ້ງໜ້າປະກອບສ່ວນເຂົ້າໃນການເຄື່ອນໄຫວວຽກງານກຳມະບານ ທັງເປັນການປຸກລະດົມສ້າງຂະບວນການແຂ່ງຂັນ ໃນການປະຕິບັດໜ້າທີ່ວິຊາສະເພາະ ແລະ ປະຕິບັດຂໍ້ແຂ່ງຂັນ 5 ເປັນເຈົ້າຂອງສະຫະພັນກຳມະບານລາວ ຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ໃຫ້ເປັນຂະບວນຟົດຟື້ນ ແລະ ກວ້າງຂວາງ.