ຂ່າວ: ອໍາໄພ ອຸດົມມີໄຊ
ພາບ: ສໍສົດໃສ, ວຽງພູທອນ.
ເພື່ອຮ່ວມສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 67 ປີ (20 ກໍລະກົດ 1955 – 20 ກໍລະກົດ 2022), ສະຫະພັນແມ່ຍິງຄະນະຈັດຕັ້ງສູນກາງພັກ ໄດ້ຈັດພິທີສະເຫຼີມສະຫຼອງວັນສຳຄັນດັ່ງກ່າວ ໃນວັນທີ 22 ກໍລະກົດ 2022 ເຊິ່ງຕອນເຊົ້າໄດ້ເຂົ້າວາງກະຕ່າດອກໄມ້ທີ່ຫໍພິພິທະພັນ ປະທານ ໄກສອນ ພົມວິຫານ ເພື່ອສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ເຖິງຄຸນງາມຄວາມດີຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວ. ຈາກນັ້ນ ໄດ້ຈັດພິທີປາຖະກະຖາເລົ່າມູນເຊື້ອວັນສຳຄັນດັ່ງກ່າວຢູ່ທີ່ສະໂມສອນຄະນະຈັດຕັ້ງສູນກາງພັກ ໂດຍການເປັນກຽດເຂົ້າຮ່ວມຂອງທ່ານ ນາງ ສີໃສ ລືເດດມູນສອນ ກຳມະການກົມການເມືອງ, ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະຈັດຕັ້ງສູນກາງພັກ, ມີທ່ານ ນາງ ວິໄລ ອຸ່ນມີໄຊ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງຄະນະຈັດຕັ້ງສູນກາງພັກ, ມີຄະນະບໍລິຫານງານສະຫະພັນແມ່ຍິງຄະນະຈັດຕັ້ງສູນກາງພັກ, ຕາງໜ້າໜ່ວຍພັກ, ຕາງໜ້າອົງການຈັດຕັ້ງມະຫາຊົນ ພ້ອມດ້ວຍສະມາຊິກສະຫະພັນແມ່ຍິງຄະນະຈັດຕັ້ງສູນກາງພັກ ເຂົ້າຮ່ວມຢ່າງພ້ອມພຽງ.
ໃນວາລະດັ່ງກ່າວ ຍັງໄດ້ສະຫຼຸບຕີລາຄາການຈັດຕັ້ງປະຕິບັດແຜນພັດທະນາແມ່ຍິງ ໄລຍະ 04 ປີ (2017-2022) ແລະ ວາງທິດທາງແຜນການ 05 ປີ (2021-2025) ແລະ ສະຫຼຸບການຈັດຕັ້ງປະຕິບັດວຽກງານແມ່ຍິງ ໃນໄລຍະ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022; ໃນການປາຖະກະຖາຄັ້ງນີ້ ທ່ານ ນາງ ສີໃສ ລືເດດມູນສອນ ໄດ້ເລົ່າຄືນມູນເຊື້ອວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ນັບແຕ່ມື້ສ້າງຕັ້ງເປັນຕົ້ນມາ ໄດ້ຍົກໃຫ້ເຫັນເຖິງມູນເຊື້ອການກຳເນີດ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງລາວ ກໍຄືແມ່ຍິງລາວບັນດາເຜົ່າທີ່ໄດ້ອຸທິດຕົນໃນພາລະກິດປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ ໂດຍສະເພາະແມ່ນ 5 ຄຸນລັກສະນະທີ່ເປັນມູນເຊື້ອຂອງແມ່ຍິງລາວ. ພ້ອມນີ້ ທ່ານຍັງໄດ້ມີຄຳເຫັນໂອ້ລົມ ໃຫ້ທິດຊີ້ນຳວຽກງານແມ່ຍິງ ກໍຄືການເປັນເສນາທິການວຽກງານວິຊາສະເພາະ ພ້ອມກັນປະກອບສ່ວນເຂົ້າໃນຜົນສຳເລັດລວມໃຫ້ຄະນະພັກຄະນະຈັດຕັ້ງສູນກາງພັກໃນໄລຍະໃໝ່.
ໃນໂອກາດການສະເຫຼີມສະຫຼອງວັນສ້າງຕັ້ງອົງການຈັດຕັ້ງ ສະຫະພັນແມ່ຍິງລາວ ຄົບຮອບ 67 ປີຄັ້ງນີ້ ສະຫະພັນແມ່ຍິງຄະນະຈັດຕັ້ງສູນກາງພັກ ຍັງໄດ້ໄປທັດສະນະທ່ຽວຊົມແຫຼ່ງທ່ອງທ່ຽວທຳມະຊາດ ແລະ ວັດທະນະທຳຢູ່ເມືອງເຟືອງ ແຂວງວຽງຈັນ ເຊິ່ງນຳພາໂດຍທ່ານ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ທ່ານ ນາງ ວິໄລ ອຸ່ນມີໄຊ ປະທານສະຫະພັນແມ່ຍິງຄະນະຈັດຕັ້ງສູນກາງພັກ ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ຄຳເພັດ ຈັນສົມພູ ກໍາມະການປະຈຳພັກແຂວງ, ເລຂາພັກເມືອງ ເຈົ້າເມືອງເມືອງເຟືອງ ແລະ ທ່ານ ນາງ ຈັນທະບູນ ໂພສະລາດ ກໍາມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງວຽງຈັນ ພ້ອມຄະນະ.
ໃນການໄປທັດສະນະຄັ້ງນີ້ ສະມາຊິກສະຫະພັນແມ່ຍິງຄະນະຈັດຕັ້ງສູນກາງພັກ ໄດ້ທ່ຽວຊົມບັນດາແຫຼ່ງທ່ອງທ່ຽວຂອງເມືອງເຟືອງ ເຊິ່ງກຳລັງເປັນທີ່ສົນໃຈຂອງຄົນທັງພາຍໃນ ແລະ ຕ່າງປະເທດ ເຊັ່ນ: ເຂົ້າກາບໄຫວ້ພຣະພຸດທະຮູບ ແລະ ວັດຖຸມຸງຄຸນ ທີ່ວັດສິນໄຊຍະຣາມ ບ້ານໂນນຫີນແຮ່, ທ່ຽວຊົມແຫຼ່ງທ່ອງທ່ຽວທາງທຳມະຊາດ ຫາດດອນກາງ, ອ່າງນ້ຳຕົງ ແລະ ເຮືອແພເຮືອນລາວ.
ການເຄື່ອນໄຫວວຽກງານຂອງສະຫະພັນແມ່ຍິງຄະນະຈັດຕັ້ງສູນກາງພັກຄືດັ່ງກ່າວ ໄດ້ປະກອບສ່ວນເຂົ້າໃນຂະບວນການລວມ ຮ່ວມສະເຫຼີມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 67 ປີ ໃນປີ 2022 ນີ້ ມີບັນຍາກາດເປັນຂະບວນຟົດຟື້ນດີ ສ້າງໄດ້ຄວາມສາມັກຄີຮັກແພງລະຫວ່າງເອື້ອຍນ້ອງແມ່ຍິງດ້ວຍກັນ ແລະ ສືບຕໍ່ກໍ່ສ້າງຜູ້ສືບທອດຮັກສາມູນເຊື້ອອັນດີງາມຂອງແມ່ຍິງລາວໃຫ້ຢູ່ຄູ່ແຜ່ນດິນແມ່ຕະຫຼອດໄປ.