ໂດຍ: ນ. ຄຳສະຫວັນ ພົມມະວົງ
ໃນວັນທີ 16 ກໍລະກົດ 2021 ທີ່ສະໂມສອນຄະນະຈັດຕັ້ງສູນກາງພັກ ໄດ້ຈັດກອງປະຊຸມທາບທາມບຸກຄະລາກອນອອກສະໜັກເລືອກຕັ້ງ ຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 02 ໂດຍການໃຫ້ກຽດເຂົ້າຮ່ວມຂອງສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ຜູ້ຊີ້ນຳອົງການຈັດຕັ້ງແມ່ຍິງ ຄະນະຈັດຕັ້ງສູນກາງພັກ, ມີສະຫາຍ ນາງ ວິໄລວັນ ເພັງສະຫວັດ ຄະນະພັກ ຄະນະຈັດຕັ້ງສູນກາງພັກ ຫົວໜ້າກົມຈັດຕັ້ງ-ພະນັກງານ, ມີບັນດາການນຳເພດຍິງຂັ້ນຮອງກົມຂຶ້ນໄປ, ປະທານ, ຮອງປະທານ ແລະ ຄະນະບໍລິຫານງານສະຫະພັນແມ່ຍິງ 04 ອົງການຈັດຕັ້ງພັກ ຄື: ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ໂຄສະນາອົບຮົມສູນກາງພັກ ແລະ ຄະນະພົວພັນຕ່າງປະເທດສູນກາງພັກ ເຂົ້າຮ່ວມທັງໝົດ 38 ທ່ານ.
ຈຸດປະສົງໃນການທາບທາມບຸກຄະລາກອນອອກສະໜັກເລືອກຕັ້ງ ຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ແມ່ນເພື່ອຮັບປະກັນທາງດ້ານຄຸນນະພາບ ແລະ ຖືກຕ້ອງຕາມມາດຕະຖານເງື່ອນໄຂຂອງຄະນະຈັດຕັ້ງສູນກາງພັກ ແລະ ສູນກາງສະຫະພັນແມ່ຍິງລາວວາງອອກ ທັງຮັບປະກັນທາງດ້ານໂຄງປະກອບໃຫ້ມີພະນັກງານນໍາພາທັງ 03 ຮຸ່ນ; ໃນພິທີ ສະຫາຍ ນາງ ວິໄລ ອຸ່ນມີໄຊ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງຄະນະຈັດຕັ້ງສູນກາງພັກ ໄດ້ຜ່ານບົດແນະນຳ ແລະ ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 104/ຄຈສພ ວ່າດ້ວຍການສົມທົບການທາບທາມບຸກຄະລາກອນເພື່ອຄັດເລືອກເປົ້າໝາຍບຸກຄະລາກອນອອກສະໝັກຮັບເລືອກຕັ້ງ ຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຮອບທີ 02.
ໃນໂອກາດດັ່ງກ່າວ ສະຫາຍນາງ ບຸດສະດີ ທະນະເມືອງ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງສະຫາຍໄດ້ເນັ້ນໜັກບາງດ້ານເຖິງມາດຕະຖານ ແລະ ເງື່ອນໄຂຂອງເພດຍິງທີ່ຈະອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ເປັນຕົ້ນດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດ, ດ້ານຄວາມຮູ້ຄວາມສາມາດ, ແບບແຜນການນຳພາ ແລະ ວິທີເຮັດວຽກ ແລະ ດ້ານສຸຂະພາບ ເພື່ອຄັດເລືອກໃຫ້ໄດ້ບຸກຄະລາກອນທີ່ດີມີຄຸນະພາບຕາມມາດຕະຖານ ແລະ ເງື່ອນໄຂທີ່ໄດ້ກຳນົດໄວ້.