ໂດຍ: ຄຳສະຫວັນ
ກອງປະຊຸມໃຫຍ່ ສະມາຊິກສະຫະພັນແມ່ຍິງ ຄະນະຈັດຕັ້ງສູນກາງພັກ ຄັ້ງທີ XI ໄດ້ຈັດຂຶ້ນໃນວັນທີ 11 ມີນາ 2021 ທີ່ສະໂມສອນຄະນະຈັດຕັ້ງສູນກາງພັກ ເປັນປະທານໂດຍ ສະຫາຍ ນາງ ວິໄລ ອຸ່ນມີໄຊ ຄະນະບໍລິຫານງານສູນກາງ ສະຫະພັນແມ່ຍິງລາວ ປະທານສະຫະພັນແມ່ຍິງຄະນະຈັດຕັ້ງສູນກາງພັກ, ເປັນກຽດເຂົ້າຮ່ວມຂອງສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີສະຫາຍ ທອງຈັນ ໂຂງພູມຄຳ ຄະນະປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ ພ້ອມດ້ວຍສະມາຊິກສະຫະພັນແມ່ຍິງຄະນະຈັດຕັ້ງສູນກາງພັກ ຈຳນວນ 80 ສະຫາຍ ແລະ ແຂກຖືກເຊີນເຂົ້າຮ່ວມ.
ກອງປະຊຸມໄດ້ຜ່ານບົດລາຍງານການເມືອງທັງສອງພາກຄື: ພາກທີ I ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກສະຫະພັນແມ່ຍິງ ຄະນະຈັດຕັ້ງສູນກາງພັກ ຄັ້ງທີ X ແຕ່ປີ 2016-2020 ແລະ ພາກທີ II ທິດທາງແຜນການຂອງສະຫະພັນແມ່ຍິງຄະນະຈັດຕັ້ງສູນກາງພັກໃນໄລຍະປີ 2021-2025 ສະເໜີໂດຍ ສະຫາຍ ນາງ ວິ ໄລ ອຸ່ນມີໄຊ ເຊິ່ງໄດ້ຕີລາຄາຜົນສໍາເລັດຂອງການຈັດຕັ້ງປະຕິບັດວຽກງານແຕ່ລະດ້ານ, ຕີລາຄາຈູດອ່ອນ, ຂໍ້ຄົງຄ້າງ ແລະ ສາເຫດ, ພ້ອມທັງບົດຮຽນທີ່ຖອດຖອນໄດ້ຈາກການຊີ້ນໍາ-ນຳພາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງຜ່ານມາ. ພ້ອມນີ້ ກອງປະຊຸມຍັງໄດ້ເປັນເອກະສັນກັນຮັບຮອງເອົາທິດທາງແຜນການ 5 ປີ (2021-2025) ເຊິ່ງມີເນື້ອໃນວຽກງານຕົ້ນຕໍຄື: ການສຶກສາອົບຮົມການເມືອງ-ແນວຄິດ, ວຽກງານກົງຈັກການຈັດຕັ້ງ ແລະ ບໍລິຫານວຽກງານແມ່ຍິງ, ວຽກງານກໍ່ສ້າງພະນັກງານເພດຍິງ, ວຽກງານນະໂຍ ບາຍ-ຍ້ອງຍໍ, ວຽກງານປົກປ້ອງສິດ ແລະ ຜົນປະໂຫຍດແມ່ຍິງ-ເດັກນ້ອຍ, ການສົ່ງເສີມຄວາມກ້າວໜ້າຂອງແມ່ຍິງ ແລະ ການສົ່ງເສີມຄວາມສະເໝີພາບຍິງ-ຊາຍ, ວຽກງານພັດທະນາຊີວິດການເປັນຢູ່ເພື່ອແກ້ໄຂຄວາມທຸກຍາກໃຫ້ແກ່ແມ່ຍິງ ແລະ ຄອບຄົວ, ວຽກງານການຈັດຕັ້ງປະຕິບັດຂໍ້ແຂ່ງຂັນ 3 ດີ, ວຽກງານປຸກລະດົມການປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ, ວຽກງານພົວພັນ ແລະ ຮ່ວມມືກັບຕ່າງປະເທດ, ວຽກງານກວດກາ ແລະ ໄດ້ກໍານົດ 6 ຄາດໝາຍສູ້ຊົນ.
ຈາກນັ້ນ, ສະມາຊິກສະຫະພັນແມ່ຍິງຄະນະຈັດຕັ້ງສູນກາງພັກໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານສະຫະພັນແມ່ຍິງຄະນະຈັດ ຕັ້ງສູນກາງພັກຊຸດໃໝ່ 07 ສະຫາຍ, ກອງປະຊຸມຄັ້ງປະຖົມມະລຶກໄດ້ເລືອກເອົາສະຫາຍ ນາງ ວິໄລ ອຸ່ນມີໄຊ ເປັນປະທານສະຫະພັນແມ່ຍິງຄະນະຈັດຕັ້ງສູນກາງພັກ, ສະຫາຍ ນາງ ທິບພາວັນ ອິນຄຳແສງ ແລະ ສະຫາຍ ນາງ ແສງມະນີ ຊົງດາວເພັດ ເປັນຮອງປະທານ, ສະຫາຍ ນາງ ໜູຮັກ ພິມມະສິນ, ສະຫາຍ ນາງ ຄຳສະຫວັນ ພົມມະວົງ, ສະຫາຍ ນາງ ສັກດາ ວົງທະນູລົມ ແລະ ສະຫາຍ ນາງ ວຽງສະໄໝ ວັນນະພູມ ເປັນຄະນະ; ເລືອກເອົາປະທານ ແລະ ຮອງປະທານກວດກາຄື: ສະຫາຍ ນາງ ແສງມະນີ ຊົງດາວເພັດ ເປັນປະທານກວດກາ, ສະຫາຍ ນາງ ໜູຮັກ ພິມມະສິນ ເປັນຮອງປະທານກວດກາ, ສະຫາຍ ນາງ ລັດດາວັນ ສີຫານຸວົງ ເປັນຄະນະ.
ໃນຕອນທ້າຍຂອງກອງປະຊຸມ ຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຈາກ ສະຫາຍ ທອງຈັນ ໂຂງພູມຄຳ ຄະນະປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ ແລະ ຄຳເຫັນໂອ້ລົມຈາກສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ເຊິ່ງໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳ-ນຳພາຂອງຄະນະສະຫະພັນແມ່ຍິງຊຸດເກົ່າ ແລະ ສະແດງຄວາມເຊື່ອໝັ້ນຕໍ່ການນຳພາຂອງຄະນະບໍລິຫານງານສະຫະພັນແມ່ຍິງຊຸດໃໝ່ທີ່ຈະສືບຕໍ່ຈັດຕັ້ງປະຕິບັດໜ້າທີ່ການເມືອງຂອງຕົນໃຫ້ມີຜົນງານໃໝ່ ໃຫຍ່ຫຼວງກວ່າເກົ່າ. ກອງປະຊຸມໄດ້ຮຽກຮ້ອງມາຍັງສະມາຊິກສະຫະພັນແມ່ຍິງ ຄຈສພ ທຸກສະຫາຍຈົ່ງໄດ້ເຊີດຊູສະຕິ ແລະ ຄວາມຮັບຜິດຊອບການເມືອງຂອງຕົນໃຫ້ສູງຂຶ້ນເລື້ອຍໆ, ເຮັດໃຫ້ສະມາຊິກແມ່ຍິງມີການຫັນປ່ຽນຢ່າງຕັ້ງໜ້າ ປະກອບສ່ວນເຂົ້າໃນການປະຕິບັດໜ້າທີ່ການເມືອງ, ສ້າງຕົນເອງໃຫ້ກາຍເປັນພະນັກງານທີ່ມີຄວາມຮູ້ຄວາມສາມາດ, ໄດ້ຮັບຄວາມໄວ້ວາງໃຈຈາກການຈັດຕັ້ງ ແລະ ພ້ອມກັນສູ້ຊົນປະຕິບັດຄຳຂວັນຂອງສະຫະພັນແມ່ຍິງລາວວາງອອກໃຫ້ປະກົດຜົນເປັນຈິງ.
