ໃນຕອນເຊົ້າຂອງວັນທີ 25 ມັງກອນ 2019 ທີ່ຜ່ານມາ ໜ່ວຍຊາວໜຸ່ມຫ້ອງການ 2 ໄດ້ເປີດກອງປະຊຸມໃຫຍ່ສະມາຊິກຊາວໜຸ່ມ ຫ້ອງການ 2 ຂຶ້ນຢູ່ທີ່ສະໂມສອນຄະນະຈັດຕັ້ງສູນກາງພັກ. ໄດ້ຮັບກຽດເຂົ້າຮ່ວມຈາກ ສະຫາຍ ນ.ວົງຄຳ ສຸທຳມະວົງ ກຳມະການພັກ ຄະນະຈັດຕັ້ງສູນກາງພັກ, ເລຂາໜ່ວຍພັກຫ້ອງການ ຄະນະຈັດຕັ້ງສູນກາງພັກ ແລະ ສະຫາຍ ນ.ວຽງຄຳ ແສນສະທິດ ເລຂາຄະນະບໍລິງານງານຊາວໜຸ່ມ ຄະນະຈັດຕັ້ງສູນກາງພັກ, ມີເລຂາໜ່ວຍ, ຮອງເລຂາໜ່ວຍ ພ້ອມທັງສະມາຊິກຊາວໜຸ່ມພາຍໃນໜ່ວຍເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຜ່ານຮ່າງລາຍງານການເມືອງ ແລະ ບົດສຳຫຼວດການນຳພາລວມຂອງຄະນະ ໜ່ວຍຊຸດເກົ່າ ເຊິ່ງໄດ້ສະຫຼຸບຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມລາວທົ່ວປະເທດ ຄັ້ງທີ VII, ເນື້ອໃນຂໍ້ແຂ່ງຂັນ 4 ບຸກ ທີ່ສູນກາງຊາວໜຸ່ມວາງອອກ ກໍຄືມະຕິກອງປະຊຸມໃຫຍ່ສະມາຊິກຊາວໜຸ່ມ ຄະນະຈັດຕັ້ງສູນກາງພັກ ຄັ້ງທີ VII ໃນໄລຍະຜ່ານມາ ສາມາດຍາດໄດ້ຜົນສຳເລັດຫຼາຍດ້ານເປັນຕົ້ນ ຄະນະໜ່ວຍຊຸດເກົ່າໄດ້ເອົາໃຈໃສ່ສຶກສາອົບຮົມການເມືອງ-ແນວຄິດຢ່າງໃກ້ສິດ ແລະ ເປັນປົກກະຕິ ເຮັດໃຫ້ສະມາຊິກພາຍໃນໜ່ວຍສ່ວນຫຼາຍມີທັດສະນະການເມືອງຖືກຕ້ອງ, ມີຄວາມອຸ່ນອ່ຽນ, ທຸ່ນທ່ຽງ, ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບມອບໝາຍ, ມີສະຕິເປັນເຈົ້າການປະຕິບັດລະບຽບກົດໝາຍ, ເປັນກຳລັງແຮງສຳຄັນເຂົ້າໃນການປະຕິບັດໜ້າທີ່ວຽກງານ ແລະ ສ້າງຂະບວນການຕ້ອນຮັບວັນສຳຄັນຕ່າງໆຂອງພັກ-ຂອງຊາດ ໃຫ້ມີບັນຍາກາດເບີກບານມ່ວນຊື່ນ ເຮັດໃຫ້ໜ່ວຍຊາວໜຸ່ມຫ້ອງການ 2 ສາມາດຍາດໄດ້ນາມມະຍົດໜ່ວຍຊາວໜຸ່ມ 4 ບຸກ ເຖິງ 3 ສະໄໝຕິດຕໍ່ກັນ.
ກອງປະຊຸມຍັງໄດ້ດຳເນີນການປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ ຈຳນວນ 2 ສະຫາຍ ໂດຍໄດ້ປ່ອນບັດເອົາ ສະຫາຍ ພຸດທະປັນຍາ ພົມມະຈາລີ ເປັນເລຂາໜ່ວຍ ແລະ ສະຫາຍ ນ.ຄຳຫຼ້າ ຈັນທະມາລາ ເປັນຮອງເລຂາໜ່ວຍ.
ໃນຕອນທ້າຍ ກອງປະຊຸມຍັງໄດ້ຮັບຟັງຄຳເຫັນໂອ້ລົມຈາກ ສະຫາຍ ນ.ວົງຄຳ ສຸທຳມະວົງ ແລະ ສະຫາຍ ນ.ວຽງຄຳ ແສນສະທິດ ຊຶ່ງທັງ 2 ສະຫາຍ ລ້ວນແຕ່ໄດ້ໄດ້ຍ້ອງຍໍຊົມເຊີຍຕໍ່ຜົນສຳເລັດທີ່ຍາດມາໄດ້ ແລະ ໃຫ້ທິດຊີ້ນຳຄະນະໜ່ວຍຊຸດໃໝ່ໃນການສຶບຕໍ່ນຳພາວຽກງານຂອງຊາວໜຸ່ມ ນຳເອົາເນື້ອໃນຈິດໃຈມະຕິຂອງກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍເຂົ້າສູ່ຊີວິດຕົວຈິງໃຫ້ມີຜົນສຳເລັດໃໝ່ໃຫຍ່ຫຼວງກວ່າເກົ່າ.
ກອງປະຊຸມໄດ້ປິດລົງໃນເວລາ 11:30 ໂມງ ຂອງວັນດຽວກັນດ້ວຍຜົນສຳເລັດອັນຈົບງາມ