ໃນວັນທີ 19 ມີນາ 2018 ນີ້ ຢູ່ທີ່ຫ້ອງປະຊຸມສະຖາບັນການເມືອງ-ການປົກຄອງແຂວງ ໄດ້ຈັດກອງປະຊຸມສະຫຼຸບວຽກງານຈັດຕັ້ງ, ກໍ່ສ້າງພັກ-ພະນັກງານ ປະຈຳປີ 2017 ທົ່ວແຂວງໄຊຍະບູລີຂຶ້ນ ພາຍໃຕ້ການເປັນປະທານຂອງ ສະຫາຍ ພົງສະຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ໃຫ້ກຽດເຂົ້າຮ່ວມຈາກ ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ມີບັນດາກຳມະການພັກແຂວງ, ຄະນະປະຈໍາສະພາປະຊາຊົນແຂວງ, ເລຂາ, ຮອງເລຂາພັກເມືອງ, ເລຂາຮອງເລຂາຄະນະພັກຮາກຖານ, ເລຂາໜ່ວຍພັກສໍານັກງານ-ອົງການ, ລັດວິສາຫະກິດອອ້ອມຂ້າງແຂວງ, ຫົວໜ້າ ແລະ ຮອງຫົວໜ້າບັນດາອົງການຈັດຕັ້ງມະຫາຊົນ, ຫົວໜ້າຄະນະຈັດຕັ້ງເມືອງ ແລະ ພະນັກງານຈັດຕັ້ງແຂວງເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ພ້ອມກັນສະຫຼຸບຕີລາຄາຄືນຄວາມຮັບຜິດຊອບການເມືອງຂອງຄະນະພັກຂັ້ນຕ່າງໆໃນການຈັດຕັ້ງປະຕິບັດບັນດາຄາດໝາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ແລະ ມະຕິກອງປະຊຸມໃຫຍ່ ຄັ້ງທີ IV ຂອງແຂວງໄຊຍະບູລີ ໃນໜຶ່ງປີຜ່ານມາ, ມີດ້ານດີ, ດ້ານອອ່ນຄົງຄ້າງ ແລະ ສາເຫດຕົ້ນຕໍຄືແນວໃດ ພ້ອມກັນນີ້ກໍກໍານົດທິດທາງໜ້າທີ່ໃນປີ 2018 ແນ່ໃສ່ປັບປຸງ ແລະ ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ.
ຕອນທ້າຍກອງປະຊຸມ ສະຫາຍ ຈັນສີ ໂພສີຄໍາ ໄດ້ໃຫ້ກຽດໂອ້ລົມຕໍ່ກອງປະຊຸມ ເຊິ່ງໄດ້ເນັ້ນໜັກໃຫ້ຄະນະພັກແຕ່ລະຂັ້ນຂອງແຂວງເອົາໃຈໃສ່ບາງບັນຫາດັ່ງນີ້:
ການກໍ່ສ້າງພັກທາງດ້ານການເມືອງ-ແນວຄິດ: ໃຫ້ສຶບຕໍ່ຄົ້ນຄ້ວາເຊື່ອມຊຶມ ແລະ ປະຕິບັດກົດລະບຽບຂອງພັກ, ກົດໝາຍລັດຖະກອນ ແລະ ປະຕິບັດລັດຖະທໍາມະນູນກົດໝາຍຕ່າງໆໃຫ້ເຂັ້ມງວດ. ສຶບຕໍ່ຜັນຂະ ຫຍາຍຜົນສໍາເລັດບັ້ນດໍາເນີນດໍາເນີນຊີວິດການເມືອງປັບປຸງປົວແປງພັກທົ່ວອົງຄະນະພັກ ໃນປີ 2017, ໃນແຕ່ລະ 3 ເດືອນ, 6 ເດືອນແຕ່ລະປີ ຕ້ອງມີການສະຫຼຸບຕີລາຄາການນໍາພາລວມ ແລະ ບຸກຄົນພາຍໃນຄະນະພັກ, ສະມາຊິກພັກພ້ອມກັນຊອກໃຫ້ເຫັນດ້ານດີ, ດ້ານຕັ້ງໜ້າເພື່ອສຶບຕໍ່ຜັນຂະຫຍາຍ, ເຫັນໄດ້ດ້ານອອ່ນຄົງຄ້າງ ແລະ ບັນຫາທີ່ເປັນປະກົດການຫຍໍ້ທໍ້ຕ່າງໆ ພ້ອມກັນແກ້ໄຂຢ່າງທັນການ.
ການກໍ່ສ້າງພັກທາງດ້ານການຈັດຕັ້ງ: ການຂະຫຍາຍສະມາຊິກພັກໃໝ່ ຕ້ອງຖືກຕາມທິດນໍາໃນການກໍ່ສ້າງພັກ ຄື: 1. ການຂະຫຍາຍພັກຕ້ອງຖືຄຸນນະພາບເປັນກົກ; 2. ຂະຫຍາຍພັກຕ້ອງຖືກທິດທາງ 3.ການຂະຫຍາຍພັກຕ້ອງໄປຄຽງຄູ່ກັບການປັບປຸງພັກ. 4 ການຂະຫຍາຍພັກຕ້ອງຢູ່ໃນຂະບວນການຂອງມະຫາຊົນ. ການປັບປຸງຮາກຖານພັກຄາດໝາຍສູ້ຊົນແມ່ນໃຫ້ແຕ່ລະໜ່ວຍພັກກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ. ຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ ຕ້ອງໄດ້ຄົ້ນຄ້ວາເຊື່ອມຊຶມ ແລະ ປະຕິບັດຕາມເນື້ອໃນຂອງຄໍາສັ່ງ 01 ຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ. ໜ່ວຍພັກຕ້ອງສ້າງແຜນການກໍ່ສ້າງໜ່ວຍພັກຂອງຕົນໃຫ້ກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ. ຫຼັງຈາກນັ້ນກໍ່ສູ້ຊົນຈັດຕັ້ງປະຕິບັດຕາມແຜນດັ່ງກ່າວ ແຕ່ລະປີແຕ່ລະໜ່ວຍພັກຕ້ອງໄດ້ມີການປະເມີນຜົນການປະຕິບັດໄປຕາມແຜນການຫຼືບໍ່ ມີດ້ານໃດເຮັດໄດ້ ແລະ ດ້ານໃດເຮັດບໍ່ໄດ້ຕ້ອງມີການປະເມີນແຕ່ລະປີ. ຄະນະພັກຂັ້ນເທິງຕ້ອງເພີ່ມທະວີການຊີ້ນໍາ-ນໍາພາ, ຕິດຕາມກວດກາ, ຊຸກຍູ້ໃນການປະຕິບັດແຜນ.
ການປັບປຸງກົງຈັກການຈັດຕັ້ງຕ້ອງກໍາແໜ້ນທັດສະນະຂອງພັກຕາມທິດກະທັດຮັດສົມເຫດສົມຜົນ, ບັນດາຂະແໜງການຂັ້ນແຂວງ, ຂັ້ນເມືອງ ແລະ ທຽບເທົ່າຕ້ອງສຶບຕໍ່ຄົ້ນຄ້ວາ, ກໍານົດພາລະບົດບາດ, ໜ້າທີ່ຄວາມຮັບຜິດຊອບ, ສິດຂອງຕົນໃຫ້ຈະແຈ້ງຮັດກຸມ ແລ້ວຈິ່ງກໍານົດໂຄງຮ່າງການຈັດຕັ້ງ, ກໍານົດຕໍາແໜ່ງງານຕ່າງໆໃຫ້ເໝາະສົມ.
ຄະນະພັກແຕ່ລະຂັ້ນຕ້ອງເພີ່ມທະວີການຊີ້ນໍາ-ນໍາພາວຽກງານຈັດຕັ້ງ, ກໍ່ສ້າງພັກ-ພະນັກງານ ຢ່າງໃກ້ຊິດ, ຕິດແທດຫຼາຍກວ່າເກົ່າ. ຜູ້ທີ່ເຮັດວຽກງານຂົງເຂດຈັດຕັ້ງກໍ່ຕ້ອງມີຄວາມບຸກບືນກ້າວຂຶ້ນ ພັດທະນາຕົນເອງໃນທຸກດ້ານ ເພື່ອສາມາດເຮັດຫຼ້ອນໜ້າທີ່ການເມືອງທີ່ພັກ ແລະ ລັດມອບໝາຍໃຫ້ ຄະນະຈັດຕັ້ງແຂວງ, ຫ້ອງການຈັດຕັ້ງເມືອງ ແລະ ຜູ້ເຮັດວຽກງານຈັດຕັ້ງແຕ່ລະຂະແໜງການຂອງແຂວງ, ຂອງເມືອງຈະໄດ້ສຶບຕໍ່ຄົ້ນຄ້ວາກໍາແໜ້ນພາລະບົດບາດ, ສິດໜ້າທີ່ຢ່າງລະອຽດຈະແຈ້ງ ເພື່ອສອດຄອ່ງກັບໜ້າທີ່ການເມືອງ ແລະ ຄວາມຮຽກຮ້ອງຕ້ອງການຂອງວຽກງານໃນປະຈຸບັນ.
ຂ່າວ: ຈັນລາຕີ
