ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2023
ຈຳນວນຜູ້ອ່ານ: 42
ອະນຸມັດວັນທີ: 23/01/2024

ຂ່າວ: ຄຳສະຫວັນ ພົມມະວົງ

ພາບ: ບານ ມູນປະເສີດ

       ກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ທົ່ວປະເທດ ປະຈໍາປີ 2023 ແລະ ວາງທິດທາງແຜນການປີ 2024 ໄດ້ຈັດຂຶ້ນໃນລະຫວ່າງວັນທີ 23-24 ມັງກອນ 2024 ທີ່ຄະນະຈັດຕັ້ງສູນກາງພັກ ພາຍໃຕ້ການເປັນປະທານຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີສະຫາຍຮອງເລຂາຄະນະພັກ, ຄະນະປະຈໍາພັກ ຜູ້ຊີ້ນໍາວຽກງານກໍ່ສ້າງພັກ-ພະນັກງານ ທັງແມ່ນຫົວໜ້າຄະນະຈັດຕັ້ງແຂວງ-ນະຄອນຫຼວງ, ບັນດາສະຫາຍຫົວໜ້າຄະນະຈັດຕັ້ງແຂວງ-ນະຄອນຫຼວງ, ຫົວໜ້າກົມຈັດຕັ້ງບັນດາກະຊວງ-ອົງການ ພ້ອມດ້ວຍບັນດາສະຫາຍຕາງໜ້າຄະນະຈັດຕັ້ງແຂວງ-ນະຄອນຫຼວງ, ຕາງໜ້າກົມຈັດຕັ້ງກະຊວງ-ອົງການ, ບັນດາສະຫາຍຄະນະພັກ, ຄະນະກົມ ແລະ ພະນັກງານນໍາພາຫຼັກແຫຼ່ງຂອງຄະນະຈັດຕັ້ງສູນກາງພັກ ທັງໝົດ 150 ກວ່າສະຫາຍ, ຍິງ 46 ສະຫາຍ.

       ກອງປະຊຸມຄັ້ງນີ້ໄດ້ສະຫຼຸບຕີລາຄາການເຄື່ອນໄຫວວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໃນໄລຍະ 01 ປີຜ່ານມາ ສະເໜີໂດຍສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ເຊິ່ງໄດ້ຍົກໃຫ້ເຫັນວຽກງານໃນແຕ່ລະດ້ານເປັນຕົ້ນ:

       ການກໍ່​ສ້າງ​ພັກ​ທາງ​ດ້ານ​ການ​ເມືອງ-ແນວຄິດ: ຄະນະພັກ, ຄະນະຈັດຕັ້ງແຕ່ລະຂັ້ນໄດ້ຖືເອົາວຽກງານການເມືອງ-ແນວຄິດເປັນວຽກງານແຖວໜ້າໃນການເຄື່ອນໄຫວນໍາພາ-ຊີ້ນໍາຂອງຕົນ ໂດຍໄດ້ເອົາໃຈໃສ່ສຶກສາອົບຮົມການເມືອງ,​ ນໍາພາແນວຄິດໃຫ້ສະມາຊິກພັກ, ພະນັກງານ,​ ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ດ້ວຍການຈັດຕັ້ງເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 06, 07 ສະໄໝທີ XI, ບັນດາແນວທາງນະໂຍບາຍ, ບັນດາມະຕິ, ຄໍາສັ່ງ ຂອງພັກ, ກົດໝາຍຂອງລັດ, ຈັດຕັ້ງປາຖະກະຖາ, ເລົ່າມູນເຊື້ອຂອງພັກ, ຂອງຊາດ ແຕ່ລະໄລຍະ; ຈັດຕັ້ງຮໍ່າຮຽນທິດສະດີການເມືອງຂັ້ນສູງ,​ ຂັ້ນກາງ ແລະ ຂັ້ນຕົ້ນຢູ່ພາຍໃນ ແລະ ຕ່າງປະເທດ. ຜ່ານການຈັດຕັ້ງປະຕິບັດຄືດັ່ງກ່າວເຮັດໃຫ້ສະມາຊິກພັກ-ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າໄດ້​ຮັບ​ຮູ້, ເຂົ້າ​ໃຈ ແລະ ເປັນເອກະພາບສູງ ຕໍ່ແນວທາງຂອງພັກ ມີແນວຄິດອຸ່ນອຽນ, ທຸ່ນທ່ຽງ, ອົດທົນຜ່ານຜ່າຄວາມຫຍຸ້ງຍາກ, ເປັນເຈົ້າການປ້ອງກັນແນວທາງການຈັດຕັ້ງຂອງພັກ, ຈໍາແນກໄດ້ມິດ-ສັດຕູ, ຕ້ານການເສື່ອມຖອຍທາງດ້ານການເມືອງ, ທັດສະນະທີ່ຜິດເຂວ; ເຂົ້າໃຈທິດທາງຂອງພັກ-ລັດຖະບານໃນການແກ້ໄຂສະພາບຄວາມຫຍຸ້ງຍາກຕ່າງໆ.

       ການກໍ່​ສ້າງ​ພັກ​ທາງ​ດ້ານ​ການ​ຈັດ​ຕັ້ງ: ໃນປີ 2023 ຄະນະເລຂາທິການສູນກາງພັກໄດ້ອອກຄໍາສັ່ງເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດຳນີນກອງປະຊຸມຄົບ​ຄະ​ນະກາງສະໄໝຂອງຄະນະບໍລິຫານງານພັກແຕ່ລະຂັ້ນ, ພິເສດໄດ້​ດຳ​ເນີນກອງ​ປະ​ຊຸມດຳເນີນຊີວິດການເມືອງຄົບ​ຄະ​ນະກາງສະໄໝ​ຂອງຄະນະບໍ​ລິ​ຫານ​ງານ​ພັກ​ແຕ່​ລະ​ຂັ້ນ  ຜົນການທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນໃນຄະນະພັກ ສ່ວນຫຼາຍຍັງຮັກສາໄດ້ຄວາມເຊື່ອໝັ້ນໄວ້ວາງໃຈສູງຈາກພະນັກງານນໍາພາຫຼັກແຫຼ່ງ ເຊິ່ງເປັນຕົວແທນໃຫ້ແກ່ສະມາຊິກພັກ-ພະນັກງານ ແລະ ຊັ້ນຄົນຕ່າງໆ; ປະ​ຈຸ​ບັນ​ທົ່ວ​ປະ​ເທດມີ 36 ອົງ​ຄະ​ນະ​ພັກ​ກະ​ຊວງ-ອົງ​ການ, 18 ອົງ​ຄະ​ນະ​ພັກ​ແຂວງ-ນະ​ຄອນ​ຫຼວງ, ມີ 149 ອົງ​ຄະ​ນະ​ພັກ​ເມືອງ ແລະ ທຽບເທົ່າ, ມີ​ການ​ຈັດ​ຕັ້ງຮາ​ກ​ຖານ​ພັກທັງ​ໝົດ 24.440 ຮາກ​ຖານ, ໃນນີ້ມີຄະ​ນະ​ພັກ​ຮາກ​ຖານ​ 2.140 ຮາກຖານ, ມີ 9.775 ໜ່ວຍພັກຮາກຖານ, ມີ 12.525 ໜ່ວຍພັກຂຶ້ນກັບຄະນະພັກຮາກ​ຖານ; ທຽບໃສ່ປີ 2022 ຫຼຸດລົງ 13 ຮາກຖານ. ຄະນະພັກ, ຄະນະຈັດຕັ້ງແຕ່ລະຂັ້ນ ໄດ້ເອົາໃຈໃສ່ປັບປຸງການຈັດຕັ້ງຮາກຖານພັກ, ໃນນັ້ນໄດ້ສຸມໃສ່ການສ້າງ​ແຜນການ, ຕິດ​ຕາມ, ຊຸກຍູ້ບັນດາໜ່ວຍພັກ ​​ ແລະ ປະ​ເມີນ​ຜົນ​ການກໍ່​ສ້າງ​ໜ່ວຍ​ພັກ ປອດ​ໃສ, ເຂັ້ມ​ແຂງ, ໜັກ​ແໜ້ນ ປະ​ຈຳ​ປີ 2022 ໄດ້ສະຫຼຸບຖອດຖອນບົດຮຽນກ່ຽວກັບການປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເປັນປົກກະຕິ, ສະ​ເພາະ ໃນປີ 2022 ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ,  ໜັກແໜ້ນ 51 ອົງຄະນະພັກ, ມີ 15.219 ໜ່ວຍ ກວມ 68% ຂອງໜ່ວຍພັກທັງໝົດ, ໜ່ວຍພັກແຂງ ມີ 1.831 ໜ່ວຍ ກວມ 8%, ໜ່ວຍພັກກາງມີ 2.309 ໜ່ວຍ ກວມ 10%; ໜ່ວຍພັກອ່ອນ 103 ໜ່ວຍ ກວມ 0,1% ແລະ ບໍ່ໄດ້ຈັດປະເພດ 2.811 ໜ່ວຍ ກວມ 13%. ຄະນະພັກແຕ່ລະຂັ້ນເອົາ​ໃຈ​ໃສ່​​ວຽກງານຄຸ້ມ​ຄອງຖັນ​ແຖວ​​ສະມາຊິກພັກ ຕາມ​ລະ​ບຽບ, ຫຼັກ​ການ, ຕິດ​ຕາມ ແລະ ເກັບກຳຊີວະປະຫວັດ, ສະພາບການເຄືື່ອນໄຫວ, ທັດ​ສະ​ນະ​ຄຸນ​ສົມ​ບັດຂອງ​ສະ​ມາ​ຊິກ​ພັກທີ່​ຂຶ້ນ​ກັບ​ສິດ​ຄຸ້ມ​ຄອງ​ຂັ້ນ​ຂອງ​ຕົນ, ຫັນ​ເປັນ​ທັນ​ສ​ະ​ໄໝໃນການ​ຄຸ້ມ​ຄອງ​ຂໍ້​ມູນ​ຂອງ​ສະ​ມາ​ຊິກ​ພັກ. ການຈັດຕັ້ງຮາກຖານພັກ, ສະມາຊິກພັກ ໄດ້ເປັນເຈົ້າການປະຕິບັດລະບອບດຳເນີນຊີວິດການເມືອງ ຕິດພັນກັບການເສຍເງິນສະຕິພັກ, ຄະ​ນະ​ພັກ​ແຕ່​ລະ​ຂັ້ນ​​ໄດ້ຖືສຳຄັນ ແລະ ​ເອົາ​ໃຈ​ໃສ່ຈັດ​ຕັ້ງປະຕິບັດ​ ວຽກ​ງານ​ປ້ອງ​ກັນ​ພັກ ໂດຍເລີ່ມຈາກປ້ອງກັນແນວທາງການເມືອງຂອງພັກ, ການຈັດຕັ້ງພັກ, ຄະນະ​ພັກ, ບຸກຄົນສະມາຊິກພັກ; ເກັບກຳສະພາບການ​ເຄື່ອນ​ໄຫວ​ຂອງບຸກຄົນຄະນະ​ພັກ, ສະມາຊິກພັກ, ​ເປົ້າໝາຍ​ຂະຫຍາຍ​ພັກ ​​ເພື່ອ​​ເປັນ​ຂໍ້​ມູນ​ໃນ​ການ​ຄົ້ນ​ຄວ້າ​ພິຈາລະນາ​ເຂົ້າ​ໃນ​ວຽກ​ງານ​ພັກ-ພະນັກງານ.

       ການກໍ່​ສ້າງ​ພັກທາງ​ດ້ານ​ແບ​ບ​ແຜນ​​ນຳ​ພາ ແລະ ວິທີເຮັດວຽກ: ຄະນະພັກ, ຄະນະຈັດຕັ້ງແຕ່ລະຂັ້ນໄດ້ເອົາໃຈໃສ່ກໍ່ສ້າງພັກຕາມຫຼັກການທີ່ໄດ້ກຳນົດໄວ້ໃນກົດລະບຽບພັກ ແລະ ນິຕິກຳສະເພາະກ່ຽວກັບແບບແຜນນໍາພາ ແລະ ວິທີເຮັດວຽກ ເປັນຕົ້ນແມ່ນເຄົາລົບ ແລະ ປະຕິບັດຫຼັກ​ການ​ລວມ​ສູນ​ປະ​ຊາ​ທິ​ປະ​ໄຕ, ນຳ​ພາ​ເປັນ​ໝູ່​ຄະ​ນະ, ມີການແບ່ງງານໃຫ້​ບຸກ​ຄົນ​ຮັບ​ຜິດ​ຊອບ, ມີແຜນດໍາເນີນງານ, ເຮັດວຽກມີແຜນງານ, ໂຄງການ ແລະ ແຜນການຈັດຕັ້ງປະຕິບັດແຕ່ລະໄລຍະ, ຄະນະ​ປະຈໍາ, ຄະນະ​ບໍລິຫານ​ງານພັກ​ປະຕິບັດລະບອບປະຊຸມເປັນປົກກະຕິ, ເສີມຂະຫຍາຍໄດ້ປະຊາທິປະໄຕພາຍໃນພັກຢ່າງກວ້າງຂວາງ, ທຸກວຽກງານທີ່ສໍາຄັນແມ່ນໄດ້ມີການຄົ້ນຄ້ວາປຶກສາຫາລືຕົກລົງເປັນໝູ່ຄະນະ; ມີການຊຸກຍູ້, ຕິດຕາມ, ກວດກາຄວາມຮັບຜິດຊອບຂອງຄະນະພັກ, ສະມາຊິກພັກ ແລະ ສະຫຼຸບຖອດຖອນບົດຮຽນແຕ່ລະໄລຍະ, ປະຕິບັດລະບອບສ່ອງແສງລາຍງານລະຫວ່າງຄະນະຈັດຕັ້ງສູນກາງພັກ ກັບ ຄະນະຈັດຕັ້ງແຂວງ-ນະຄອນຫຼວງ, ກົມຈັດຕັ້ງ-ພະນັກງານກະຊວງ-ອົງການ ເປັນປົກກະຕິ. ໄດ້ເອົາໃຈໃສ່ປັບປຸງແບບແຜນນຳພາຂອງຕົນ ເພີ່ມທະວີການຕິດແທດກັບຮາກຖານ, ຕິດແທດກັບວຽກງານຕົວຈິງ, ມີວິທະຍາສາດ, ໃກ້ຊິດຕິດແທດກັບມະຫາຊົນ, ຮັບຟັງຄຳຄິດຄຳເຫັນຂອງມະຫາຊົນ, ປະຕິບັດລະບອບຕິຊົມຕົນເອງ ຕິຊົມເຊິ່ງກັນ ແລະ ກັນ ເພື່ອຍົກສູງບົດບາດຄວາມສາມາດນຳພາຂອງພັກ, ຕັດສິນໃຈແກ້ໄຂ ແລະ ຕ້ານແບບແຜນວິທີເຮັດວຽກອາດຍາສິດ, ຂາດຄວາມຮັບຜິດຊອບ ແລະ ອື່ນໆ.

       ຄຽງຄູ່ຜົນສຳເລັດທີ່ກ່າວມານັ້ນ, ຍັງມີບາງດ້ານທີ່ຈະຕ້ອງໄດ້ແກ້ໄຂ ແລະ ໄດ້ສືບຕໍ່ຈັດຕັ້ງປະຕິບັດໃນຕໍ່ໜ້າໂດຍໄດ້ກຳນົດທິດທາງໜ້າທີ່ປີ 2024 ເຊິ່ງຄະນະພັກແຕ່ລະຂັ້ນຈະໄດ້​ເພີ່ມ​ທະ​ວີ​ການນໍາພາ-ຊີ້ນໍາວຽກ​ງານ​ການ​ເມືອງ-ນໍາພາແນວ​ຄິດໃຫ້ໜັກແໜ້ນແທດເຖິງ; ຄົ້ນຄ້ວາ, ເຊື່ອມຊຶມ, ກຳແໜ້ນແນວທາງນະໂຍບາຍຂອງພັກ,​ ກົດໝາຍ, ລະບຽບການຂອງລັດ, ນິຕິກຳວຽກງານຈັດຕັ້ງ ດ້ວຍຫຼາຍຮູບການ, ຫຼາຍ​ວິ​ທີໃຫ້ແທດເຖິງ​ທຸກເປົ້າໝາຍ ເພື່ອ​ສ້າງ​ຄວາມເປັນເອກະພາບທາງດ້ານແນວຄິດ ແລະ ການກະທໍາ; ເປັນເຈົ້າການຜັນຂະຫຍາຍມາເປັນນິຕິກຳຂັ້ນຂອງຕົນ ແລະ ນຳພາຈັດຕັ້ງປະຕິບັດຕົວຈິງ; ສະກັດກັ້ນ ບັນດາທັດສະນະທີ່ຜິດເຂວ, ປະກົດການ “ຫັນປ່ຽນດ້ວຍຕົນເອງ”, “ການ​ປ່ຽນຄຸນເສື່ອມທາດເອງ”; ຕໍ່ສູ້ຕ້ານປະກົດການຫຍໍ້ທໍ້ໃນສັງຄົມ, ພະຍາດອາດຍາສິດ, ສໍ້ລາດບັງຫຼວງ, ຜົນປະໂຫຍດກຸ່ມກ້ອນ ແລະ ການກະທຳທີ່ບໍ່ສອດຄ່ອງກັບກົດໝາຍ, ລະບຽບການ; ເພີ່ມທະວີຄວາມເປັນເຈົ້າຕົນເອງໃນການເຮັດວຽກງານໂຄສະນາກໍ່ສ້າງພັກ-ພະນັກງານ; ຍົກລະດັບຂີດຄວາມສາມາດຂອງພະນັກງານທີ່ເຮັດວຽກງານໂຄສະນາກໍ່ສ້າງພັກ-ພະນັກງານ, ແນໃສ່ເຮັດໃຫ້ວຽກງານດັ່ງກ່າວເຄື່ອນໄຫວຫຼາຍຮູບ, ຫຼາຍສີ ມີປະສິດທິພາບ. ​ເອົາ​ໃຈ​ໃສ່​ໃນ​ການ​ຜັນ​ຂະ​ຫຍາຍຜົນ​ຂອງ​ການ​ດຳ​ເນີນກອງ​ປະ​ຊຸມ​ກາງ​ສະ​ໄໝຂອງ​ຄະ​ນະ​ບໍ​ລິ​ຫານ​ງານ​ພັກຂັ້ນ​ຂອງ​ຕົນ ກຳ​ນົດ​ຄາດ​ໝາຍ​ສູ້​ຊົນວຽກ​ງານ​ຈຸດ​ສຸມ ໃນ​ປີ 2024 ໃຫ້ສໍາເລັດຕາມຄາດໝາຍ; ເປັນ​ເຈົ້າ​ການ​ຈັດ​ຕັ້ງ​ປະ​ຕິ​ບັດຄໍາສັ່ງເລກທີ 411/ຄລສພ, ຄໍາແນະນໍາ ເລກທີ 211/ຄຈສພ ແລະ ຄໍາແນະນໍາຂອງອົງການທີ່ກ່ຽວຂ້ອງຂັ້ນສູນກາງ, ຂັ້ນທ້ອງຖິ່ນ ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 03 ຂັ້ນຂອງພັກ. ຄະນະຈັດຕັ້ງສູນກາງພັກ ສືບຕໍ່ຄົ້ນ​ຄວ້າ​ສ້າງນິຕິກໍາກ່ຽວກັບການດຳເນີນຊີວິດໜ່ວຍພັກ, ຄໍາແນະນໍາການກະກຽມດຳເນີນກອງປະຊຸມໃຫຍ່ຂອງໜ່ວຍພັກບ້ານ, ກອງປະຊຸມເລືອກຕັ້ງຄະນະອົງການປົກຄອງບ້ານໃນທົ່ວປະເທດ; ຄໍາແນະນໍາການຈັດຕັ້ງປະຕິບັດຂໍ້ກຳນົດເລກທີ 416/ຄລສພ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະພັກຮາກຖານກຸ່ມບ້ານ ຫຼື ບ້ານໃຫຍ່; ປັບປຸງຂໍ້ກຳນົດຂອງຄະນະເລຂາທິການສູນກາງພັກກ່ຽວກັບການຈັດຕັ້ງ ແລະ ການເຄື່ອນໄຫວຂອງຮາກຖານພັກສໍານັກງານ-ອົງການ; ຄໍາແນະນໍາເພີ່ມເຕີມກ່ຽວກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ສືບຕໍ່ຄົ້ນຄວ້າວິທະຍາສາດຫົວຂໍ້ “ຄຸນນະພາບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ”; ເອົາໃຈໃສ່ປັບປຸງການຈັດຕັ້ງຮາກຖານພັກຕິດພັນກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ຖືກຕ້ອງກັບບາດກ້າວ, ຂັ້ນຕອນ, ການສ້າງແຜນການຕ້ອງກໍານົດຄາດໝາຍສູ້ຊົນ, ຕົວຊີ້ບອກໃນແຕ່ລະດ້ານໃຫ້ຈະແຈ້ງ. ຊຸກຍູ້ຂະບວນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ດຳເນີນໄປຢ່າງທົ່ວເຖິງ ແລະ ມີຄຸນນະພາບກວ່າເກົ່າ. ເອົາ​ໃຈ​ໃ​ສ່​ປະ​ຕິ​ບັດແບບແຜນນຳພາ ແລະ ວິທີເຮັດວຽກຂອງຄະນະພັກແຕ່ລະຂັ້ນ ມີການ​ຫັນ​ປ່ຽນ​ທີ່​ແຂງ​ແຮງ ແລະ ເລິກ​ເຊິ່ງ ດ້ວຍ​ການເຄົາລົບ ແລະ ປະຕິບັດຫຼັກການນຳພາຂອງພັກ ແລະ ກົດລະບຽບພັກ ​ໂດຍ​ສະ​ເພາະແມ່ນຫຼັກການ ລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງ​ວຽກ​ໃຫ້​ບຸກ​ຄົນ​ຮັບ​ຜິດ​ຊອບ, ມີລະບອບປະຊຸມ, ທຸກວຽກ​ງານ​ທີ່​ສໍາຄັນຕ້ອງ​ດຳ​ເນີນກອງ​ປະ​ຊຸມ​ປຶກ​ສາ​ຫາ​ລື ແລະ ເປັນ​ເອ​ກະ​ພາບ​ກັນ​ໃນ​ການ​ຕົກ​ລົງ​ບັນ​ຫາ​ດັ່ງ​ກ່າວ, ກວດກາຄືນບັນດາມະຕິ, ແຜນດຳເນີນງານຂອງຄະນະພັກ, ການແບ່ງງານ, ແບ່ງຄວາມຮັບຜິດຊອບພາຍໃນຄະນະພັກ, ຄະນະປະຈຳພັກໃຫ້ຈະແຈ້ງ ພ້ອມທັງຕິດຕາມ, ກວດກາໃຫ້ເປັນປົກກະຕິ; ຍົກ​ສູງ​ແບບ​ແຜນ​ວິ​ທີ​ເຮັດ​ວຽກ​ຕິດ​ພັນ​ກັບ​ຮາກ​ຖານ, ຕິດ​ແທດ​ວຽກ​ງານ​ຕົວ​ຈິງ, ປະ​ຕິ​ບັດ​ລະ​ບອບ​ປະຊຸມ, ລະບອບດຳເນີນ​ຊີ​ວິດ​ພັກ​ເປັນ​ປົ​ກ​ກະ​ຕິ, ມີເນື້ອໃນເລິກເຊິ່ງ ແລະ ເສີມ​ຂະ​ຫຍາຍ​ປະ​ຊາ​ທິ​ປະ​ໄຕພາຍ​ໃນ​ພັກ ເຮັດ​ໃຫ້​ການ​ນຳ​ພາ-ຊີ້​ນຳຂອງ​ຄະ​ນະ​ພັກ​ແຕ່​ລະ​ຂັ້ນໃຫ້ສອດຄ່ອງກັບສິດ, ໜ້າທີ່ ເຊິ່ງໄດ້ກຳນົດໃນກົດລະບຽບຂອງພັກສະໄໝທີ XI ແລະ ນິຕິກໍາທີ່ກ່ຽວຂ້ອງ. ​ການ​ຄົ້ນຄ້ວາ ​ຍົກຍ້າຍ, ແຕ່ງຕັ້ງ, ສັບຊ້ອນ, ຈັດວາງ​, ເລື່ອນ​ຊັ້ນ, ​ເລື່ອນ​ຕຳ​ແໜ່​ງພະນັກງານອີງໃສ່ຄວາມຮຽກຮ້ອງຕ້ອງການຂອງວຽກງານ, ມາດຕະຖານຂອງແຕ່ລະຕຳແໜ່ງງານ, ແຜນກໍານົດພະນັກງານ ຮັບປະກັນດຳ​ເນີນ​ໃຫ້​ຖືກຕ້ອງຕາມທິດ “ມີຂຶ້ນ-ມີລົງ, ມີເຂົ້າ-ມີອອກ”, ມີການທາບທາມຄໍາຄິດຄໍາເຫັນຂອງສະມາຊິກພັກ-ພະນັກງານດ້ວຍຮູບການຕ່າງໆ, ປະສານສົມທົບລະຫວ່າງສາຍຕັ້ງ, ສາຍຂວາງ ແລະ ຕົກລົງເປັນ​ໝູ່​ຄະນະຕາມລະບຽບການທີ່ກຳນົດໄວ້.  ຄະນະພັກ, ຄະນະຈັດຕັ້ງແຕ່ລະຂັ້ນເປັນເຈົ້າການ ຄົ້ນຄວ້າ,​ ກະກຽມເປົ້າໝາຍບຸກຄະລາກອນໃຫ້ແກ່ກອງປະຊຸມໃຫຍ່ຂັ້ນຂອງຕົນໃຫ້ຮັບປະກັນໂຄງປະກອບ ເພດ, ເຜົ່າ... ຕາມທິດຊີ້ນໍາຂອງສູນກາງ ແລະ ນິຕິກຳທີ່ກ່ຽວຂ້ອງ.

       ກອງປະຊຸມໄດ້ຮັບຟັງການປະກອບຄໍາເຫັນຈາກຜູ້ຕາງໜ້າຄະນະຈັດຕັ້ງແຂວງ-ນະຄອນຫຼວງ, ກົມຈັດຕັ້ງກະຊວງ-ອົງການ ດ້ວຍບັນຍາກາດທີ່ສ້າງສັນ ແລະ ມີເນື້ອໃນອຸດົມສົມບູນ ເຊິ່ງເປັນປະໂຫຍດຕໍ່ການວາງແນວທາງນະໂຍບາຍລວມຂອງພັກກໍ່ຄືວຽກງານຈັດຕັ້ງ, ກໍ່ສ້າງພັກ-ພະນັກງານໃນຕໍ່ໜ້າ.

       ໃນຕອນທ້າຍຂອງກອງປະຊຸມ ຜູ້ເຂົ້າຮ່ວມໄດ້ເປັນກຽດຮັບຟັງຄຳເຫັນໂອ້ລົມຈາກສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ເຊິ່ງສະຫາຍໄດ້ນຳເອົາຄວາມສາມັກຄີຮັກແພງ, ຄວາມຫ່ວງໄຍ ແລະ ຄວາມເຊື່ອໝັ້ນຈາກກົມການເມືອງສູນກາງພັກ, ຄະນະເລຂາທິການສູນກາງພັກ ແລະ ໃນນາມສ່ວນຕົວ ມາສູ່ກອງປະຊຸມ ແລະ ຜ່ານບັນດາຜູ້ແທນກອງປະຊຸມ ຝາກຄວາມຢື້ຢາມຖາມຂ່າວ ໄປຍັງສະມາຊິກພັກ-ພະນັກງານ ຜູ້ເຮັດວຽກງານຈັດຕັ້ງທົ່ວປະເທດ, ພ້ອມນີ້ສະຫາຍໄດ້ຍ້ອງຍໍຊົມເຊີຍຕໍ່ຜົນງານໃນປີຜ່ານມາ ແລະ ໄດ້ໃຫ້ທິດຊີ້ນຳຕໍ່ກອງປະຊຸມເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃນປີ 2024 ແລະ ຊຸມປີຕໍ່ໜ້າ.