ພາບ ແລະ ຂ່າວໂດຍ: ສ.ສົດໃສ
ໃນລະຫວ່າງວັນທີ 22-23 ພະຈິກ 2023 ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ຢູ່ແຂວງບໍລິຄຳໄຊ ໂດຍໃຫ້ການຕ້ອນຮັບຢ່າງອົບອຸ່ນ ຈາກສະຫາຍ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ພ້ອມດ້ວຍການນຳຫຼັກແຫຼ່ງຂອງແຂວງ, ເມືອງ ຕະຫຼອດຮອດສະມາຊິກພັກ-ພະນັກງານ ແລະ ພໍ່ແມ່ປະຊາຊົນຊາວ ແຂວງບໍລິຄຳໄຊ.
ການເຄື່ອນໄຫວເຮັດວຽກໃນຄັ້ງນີ້ ໄດ້ລົງພົບປະໂອ້ລົມ ແລະ ຮັບຟັງການລາຍງານສະພາບລວມ ຂອງ 2 ເມືອງ ແລະ 2 ບ້ານຄື: ເມືອງ ປາກຊັນ, ເມືອງປາກກະດິງ, ບ້ານກ້ວຍອຸດົມ ເມືອງປາກຊັນ ແລະ ບ້ານ ປາກກະດິງໄຕ້ ເມືອງປາກກະດິງ ໃນການຈັດຕັ້ງປະຕິບັດວຽກງານຮອບດ້ານເປັນຕົ້ນ: ວຽກງານສຶກສາອົບຮົມການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານເສດຖະກິດ-ແກ້ໄຂຄວາມທຸກຍາກ ທີ່ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ວຽກງານວັດທະນະທຳ-ສັງຄົມ, ວຽກງານກໍ່ສ້າງພັກ-ພະນັກງານ ແລະ ວຽກງານການກະກຽມດຳເນີນກອງປະຊຸມໃຫຍ່ 3 ຂັ້ນ ຢູ່ຂັ້ນເມືອງ, ຂັ້ນບ້ານ ໂດຍການເຂົ້າຮ່ວມຮັບຟັງຂອງສະຫາຍເລຂາພັກແຂວງ, ສະຫາຍເລຂາພັກເມືອງ ພ້ອມຄະນະນຳຂອງແຂວງ, ຂອງເມືອງ
ພາຍຫຼັງ ການລົງເຄື່ອນໄຫວເຮັດວຽກຢູ່ຂັ້ນເມືອງ, ຂັ້ນບ້ານສຳເລັດ ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ຜູ້ຊີ້ນຳແຂວງບໍລິຄຳໄຊ ໄດ້ພົບປະ ແລະ ເຮັດວຽກຮ່ວມກັບບັນດາສະຫາຍກຳມະການປະຈຳພັກແຂວງ, ບັນດາສະຫາຍກຳມະການບໍລິຫານງານພັກແຂວງຈຳນວນໜຶ່ງ ພ້ອມດ້ວຍຄະນະຕິດຕາມຈາກສູນກາງ ແລະ ແຂວງ.ໃນໂອກາດນີ້ ສະຫາຍ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ໄດ້ລາຍງານສະພາບລວມຂອງແຂວງໂດຍຫຍໍ້ ໃນໄລຍະການຈັດຕັ້ງປະຕິບັດວຽກງານ 9 ເດືອນ ແລະ ທິດທາງແຜນການ 3 ເດືອນທ້າຍປີ 2023 ຂອງແຂວງບໍລິຄຳໄຊ ຊຶ່ງມີຜົນງານພົ້ນເດັ່ນໃນຫຼາຍດ້ານ ສະແດງໃຫ້ເຫັນວ່າ ການແກ້ໄຂບັນຫາທີ່ພົວພັນເຖິງຄວາມບໍ່ສະຫງົບຂອງແຂວງ ຕິດພັນກັບການສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ສາມາດປະກາດສ້າງບ້ານປ້ອງກັນຊາດເຂັ້ມແຂງໄດ້ 140 ບ້ານ, ສ້າງບ້ານປ້ອງກັນຄວາມສະຫງົບດີ 284 ບ້ານ ແລະ ບ້ານປອດຢາເສບຕິດ ຢູ່ເມືອງປາກກະດິງ 23 ບ້ານ, ເມືອງຄຳເກີດ 2 ບ້ານ, ເມືອງວຽງທອງ 3 ບ້ານ, ເມືອງບໍລິຄັນ 2 ບ້ານ. ປະຈຸບັນແຂວງບໍລິຄຳໄຊ ມີການຈັດຕັ້ງຮາກຖານພັກ ທັງໝົດ 966 ຮາກຖານ, ມີສະມາຊິກພັກ ທັງໝົດ 14.973 ສະຫາຍ, ຍິງ 3.842 ສະຫາຍ, ມີພະນັກງານ-ລັດຖະກອນ ທັງໝົດ 6.968 ທ່ານ, ຍິງ 3.392 ທ່ານ. ຄະນະພັກແຕ່ລະຂັ້ນ ໄດ້ເພີ່ມທະວີເອົາໃຈໃສ່ການຈັດຕັ້ງຮາກຖານພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ຕາມ 5 ເນື້ອໃນ ກວມເອົາ 87,63% ຂອງໜ່ວຍພັກໃນທົ່ວແຂວງ, ເວົ້າລວມແລ້ວ ວຽກງານກໍ່ສ້າງພັກ-ພະນັກງານ ໄດ້ມີຄວາມເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໄລຍະໃໝ່ ໂດຍສະເພາະ 2 ໜ້າທີ່ຍຸດທະສາດໄດ້ຢ່າງມີປະສິດທິຜົນ; ການກະກຽມກອງປະຊຸມໃຫຍ່ 3 ຂັ້ນ ທົ່ວອົງຄະນະພັກແຂວງ ໄດ້ອອກມະຕິຕົກລົງຂອງຄະນະປະຈຳພັກແຂວງ ສະບັບເລກທີ 357/ຄປພ.ຂບຊ ລົງວັນທີ 31 ສິງຫາ 2023 ວ່າດ້ວຍການແຕ່ງຕັ້ງຄະນະຮັບຜິດຊອບຊຸກຍູ້ ແລະ ດຳເນີນກອງປະຊຸມໃຫຍ່ 3 ຂັ້ນ ທົ່ວອົງຄະນະພັກແຂວງ ແລະ ໄດ້ຜັນຂະຫຍາຍຄຳສັ່ງ, ຄຳແນະນຳ ແລະ ນິຕິກຳທີ່ກ່ຽວຂ້ອງໃນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ນຳໄປເຜີຍແຜ່ເຊື່ອມຊຶມໃຫ້ແກ່ເປົ້າໝາຍຜູ້ເຂົ້າຮ່ວມ.
ການເຄື່ອນໄຫວເຮັດວຽກຢູ່ແຕ່ລະບ່ອນຂອງຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ກໍໄດ້ມີການຖາມ-ຕອບແລກປ່ຽນບົດຮຽນ ຈາກສະຫາຍຜູ້ຮັບຜິດຊອບຕໍ່ວຽກງານກໍ່ສ້າງພັກ-ພະນັກງານຂອງແຂວງ, ຂອງເມືອງ ແລະ ຂອງບ້ານຢ່າງກົງໄປກົງມາ ໂດຍຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ ພ້ອມທັງສະເໜີວິທີການ ແລະ ມາດຕະການໃນການແກ້ໄຂໃນຕໍ່ໜ້າ ເຮັດໃຫ້ການພົບປະໃນຄັ້ງນີ້ເຕັມໄປດ້ວຍບັນຍາການຟົດຟື້ນດີ. ພ້ອມດຽວກັນນັ້ນ, ສະຫາຍ ນາງ ສີໃສ ລືເດດມູນສອນ ຍັງໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ຄະນະພັກ, ຄະນະນຳຂອງແຂວງ, ເມືອງ ແລະ ບ້ານ. ຊຶ່ງສະຫາຍຍັງໄດ້ສະແດງຄວາມຍ້ອງຍໍຊົມເຊີຍການນຳຂອງແຂວງ, ຂອງເມືອງ ແລະ ອົງການປົກຄອງບ້ານທຸກຂັ້ນ ລວມທັງສະມາຊິກພັກ-ພະນັກງານ, ຕະຫຼອດຮອດພໍ່ແມ່ປະຊາຊົນຊາວແຂວງບໍລິຄຳໄຊທີ່ຍາດມາໄດ້ຫຼາຍດ້ານໃນໄລຍະຜ່ານມາ ພ້ອມທັງໄດ້ເນັ້ນໜັກບາງບັນຫາທີ່ສຳຄັນເປັນຕົ້ນ: ສືບຕໍ່ສຶກສາອົບຮົມການເມືອງ-ແນວຄິດ ດ້ວຍຫຼາຍຮູບການ, ຫຼາຍວິທີ, ເພື່ອເຮັດໃຫ້ສະມາຊິກພັກ-ພະນັກງານຕະຫຼອດຮອດພໍ່ແມ່ປະຊາຊົນບັນດາເຜົ່າ ມີຄວາມຮັບຮູ້-ເຂົ້າໃຈ ຕໍ່ແນວທາງແຜນນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ, ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບພາຍໃນແຂວງ, ເມືອງ, ບ້ານ ຕ້ອງຮັບປະກັນໃຫ້ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ສົ່ງເສີມທ່າແຮງບົ່ມຊ້ອນຂອງແຂວງໃນແຕ່ລະດ້ານ ເຂົ້າໃນການພັດທະນາເສດຖະກິດ-ສັງຄົມ, ຍູ້ແຮງການສ້າງເສດຖະກິດຄອບຄົວ, ຍົກລະດັບຄຸນນະພາບຊີວິດການເປັນຢູ່ຂອງສະມາຊິກພັກ-ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ, ສືບຕໍ່ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ຮັບປະກັນດ້ານຄຸນນະພາບ, ສ້າງໄດ້ສະມາຊິກພັກທີ່ດີເດັ່ນ ແລະ ເປັນແບບຢ່າງນຳໜ້າໃຫ້ແກ່ມະຫາຊົນ; ເອົາໃຈໃສ່ກໍ່ສ້າງພະນັກງານ-ສະມາຊິກພັກ ຮັບປະກັນໄດ້ຄວາມໜັກແໜ້ນທາງດ້ານການເມືອງ, ຄຸນສົມບັດສິນທຳປະຕິວັດ, ມີຄວາມຮູ້, ຄວາມສາມາດ ສົມຄູ່ກັບໜ້າທີ່ການເມືອງທີ່ໄດ້ຮັບມອບໝາຍ, ຕັ້ງໜ້າຄົ້ນຄວ້າ ແລະ ຈັດຕັ້ງປະຕິບັດມະຕິຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ແລະ ນິຕິກຳທີ່ກ່ຽວຂ້ອງວຽກດັ່ງກ່າວ ໃຫ້ຖືກຕ້ອງ, ເປັນເອກະພາບ ແລະ ທັນເວລາໃນທົ່ວພັກ ເຮັດໃຫ້ການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກເມືອງ ຕິດພັນກັບການສ້າງຂະບວນການຂ່ຳນັບຮັບຕ້ອນກອງປະຊຸມໃຫຍ່ອົງຄະນະພັກແຂວງບໍລິຄຳໄຊ ຄັ້ງທີ VIII ໃຫ້ມີຜົນສຳເລັດ ແລະ ບັນລຸຕາມລະດັບຄາດໝາຍທີ່ວາງໄວ້.
ໃນໂອກາດຢ້ຽມຢາມ ແລະ ເຮັດວຽກຂອງຄະນະຄັ້ງນີ້ ຍັງໄດ້ລົງໄປຢ້ຽມຢາມເບິ່ງໂຄງການກໍ່ສ້າງຂົວຂ້າມນ້ຳຂອງ ມິດຕະພາບ ລາວ-ໄທ ແຫ່ງທີ 5 (ບໍລິຄຳໄຊ-ບຶງການ) ໄປຢ້ຽມຊົມໂຄງການສ້າງຫໍຫຼັກເມືອງຂອງແຂວງບໍລິຄຳໄຊ ຢູ່ສວນສາທາລະນະ ທ່ານ ສີສົມພອນ ລໍວັນໄຊ ເທດສະບານເມືອງປາກຊັນ, ໄປຢ້ຽມຊົມຟາມລ້ຽງໝູພັນຂອງຄອບຄົວດີເດັ່ນຂອງບ້ານປາກກະດິງໄຕ້ ເມືອງປາກກະດິງ ແຂວງບໍລິຄຳໄຊ. ຈາກນັ້ນ, ກໍໄດ້ໄປຢ້ຽມຊົມສະຖາທີ່ ທີ່ກອງທຶນໜຶ່ງດວງໃຈບໍລິຄຳໄຊ ຊ່ວຍເຫຼືອສັງຄົມ ໃຫ້ການຊ່ວຍເຫຼືອ ແລະ ພັດທະນາ.
