ພາບ ແລະ ຂ່າວໂດຍ: ສ.ສົດໃສ
ໃນລະຫວ່າງວັນທີ 13-14 ມີນາ 2023 ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ລົງເຄື່ອນໄຫວພົບປະ ແລະ ເຮັດວຽກຢູ່ແຂວງອັດຕະປື ໂດຍການຕ້ອນຮັບຢ່າງອົບອຸ່ນຂອງສະຫາຍ ເລັດ ໄຊຍະພອນ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງອັດຕະປື ພ້ອມດ້ວຍຄະນະ.
ໃນການເຄື່ອນໄຫວພົບປະ ແລະ ເຮັດວຽກຄັ້ງນີ້ ສະຫາຍ ນາງ ສີໃສ ລືເດດມູນສອນ ພ້ອມດ້ວຍຄະນະ ໄດ້ຮັບຟັງການລາຍງານສະພາບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ຕິດພັນກັບການປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງອັດຕະປື, ການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໂດຍການລາຍງານຂອງສະຫາຍ ເລັດ ໄຊຍະພອນ ເຊິ່ງໄດ້ຍົກໃຫ້ເຫັນຜົນສຳເລັດຫຼາຍດ້ານເຊັ່ນ: ຄະນະພັກແຂວງໄດ້ຕັ້ງໜ້ານຳພາ-ຊີ້ນຳການພັດທະນາເສດຖະກິດ-ສັງຄົມ ຕິດພັນການແກ້ໄຂຄວາມທຸກຍາກຂອງປະຊາຊົນພາຍໃນແຂວງເປັນຕົ້ນ ການຈັດເກັບລາຍຮັບຂອງແຂວງເກີດຄາດໝາຍ 3 ປີຊ້ອນ, ສະແດງໃຫ້ເຫັນວ່າພື້ນ ຖານໂຄງລ່າງໄດ້ຮັບການພັດທະນາ, ຊີວິດການເປັນຢູ່ຂອງພະນັກງານ-ລັດຖະກອນ, ທະຫານ-ຕຳຫຼວດ ແລະ ປະຊາຊົນບັນດາເຜົ່າໄດ້ຮັບປັບປຸງດີຂຶ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ໄດ້ມີການບູລະນະສະຖານທີ່ທ່ອງທ່ຽວ, ວັດວາອາຮາມ ເພື່ອດຶງດູດນັກທ່ອງທ່ຽວຫຼາຍຂຶ້ນ, ລະບົບການຊົມໃຊ້ໄຟຟ້າ, ເສັ້ນທາງຄົມມະນາຄົມ ໄດ້ເຂົ້າເຖິງປະຊາຊົນຢ່າງທົ່ວເຖິງ.
ການນໍາພາ-ຊີ້ນຳວຽກງານການເມືອງ-ແນວຄິດ ແລະ ວຽກງານພັກ-ພະນັກງານ ຄະນະພັກແຕ່ລະຂັ້ນໄດ້ຖືເອົາການກໍ່ສ້າງ ແລະ ປັບປຸງຕິດພັນກັບລັກສະນະນຳພາ, ສຶກສາອົບຮົມ ແລະ ຕໍ່ສູ້ຂອງພັກ ເພື່ອກໍ່ສ້າງສະມາຊິກພັກ ແລະ ໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ. ປະຈຸບັນທົ່ວແຂວງມີການຈັດຕັ້ງຮາກຖານພັກທັງໝົດ 613 ຮາກຖານພັກ ແລະ ໜ່ວຍພັກ 537 ໜ່ວຍພັກ. ໃນນັ້ນ, ຄະນະພັກຮາກຖານມີ 76 ຮາກຖານ, ໜ່ວຍພັກເອກະລາດ 221 ໜ່ວຍ ແລະ ໜ່ວຍພັກທີ່ຂຶ້ນກັບຄະນະພັກຮາກຖານມີ 316 ໜ່ວຍ, ມີສະມາຊິກພັກ 10.000 ກວ່າສະຫາຍ, ຍິງ 3.000 ກວ່າສະຫາຍ. ຜ່ານການປະເມີນຕີລາຄາການສ້າງພັກປອດໃສ, ເຂັ້ມແຂງ ແລະ ໜັກແໜ້ນໄດ້ 297 ໜ່ວຍ, ການຂະຫຍາຍພັກໄດ້ 207 ສະຫາຍ, ຍິງ 86 ສະຫາຍ. ພ້ອມນັ້ນ, ຍັງເອົາໃຈໃສ່ບຳລຸງ ແລະ ກໍ່ສ້າງພະນັກງານທາງດ້ານທິດສະດີ, ວິຊາສະເພາະໃນໄລຍະສັ້ນ-ຍາວ ທັງຢູ່ພາຍໃນ ແລະ ຕ່າງປະເທດ, ປັບປຸງກົງຈັກການຈັດຕັ້ງ, ສັບປ່ຽນໜ້າທີ່ ແລະ ບ່ອນປະຈຳການຂອງພະນັກງານຫຼັກແຫຼ່ງບາງພະແນກການ, ອົງການຂອງແຂວງ, ສະພາປະຊາຊົນແຂວງ ແລະ ບາງຫ້ອງການອ້ອມຂ້າງເມືອງ 5 ເມືອງເຮັດໃຫ້ການຈັດຕັ້ງມີຄວາມສະຫງົບໂດຍພື້ນຖານ.
ຫຼັງຈາກນັ້ນ, ສະຫາຍ ນາງ ສີໃສ ລືເດດມູນສອນ ໄດ້ມີບາງຄຳເຫັນໂອ້ລົມຕໍ່ຄະນະພັກ, ຄະນະນຳຂອງແຂວງອັດຕະປື ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສຳເລັດທີ່ຍາດມາໄດ້ຂອງແຂວງ. ພ້ອມນັ້ນ, ສະຫາຍຍັງຮຽກຮ້ອງໃຫ້ຄະນະພັກທຸກຂັ້ນ ຕ້ອງຍົກສູງຄວາມຮັບຜິດຊອບຕໍ່ການເຄື່ອນໄຫວຂອງຕົນໄປຕາມສິດ ແລະ ໜ້າທີ່ ທີ່ໄດ້ກຳນົດໃນກົດລະບຽບຂອງພັກ ສະໄໝທີ XI, ເອົາໃຈໃສ່ກໍ່ສ້າງ ແລະ ປັບປຸງຕົນເອງຕາມ 5 ຫຼັກການ ແລະ 3 ທິດນຳຂອງພັກ; ເພີ່ມທະວີຄວາມຮັບຜິດຊອບນຳພາ-ຊີ້ນຳ ບັນດາຮາກຖານພັກໃນການກໍ່ສ້າງໜ່ວຍພັກ, ສະມາຊິກພັກໃຫ້ປອດໃສ ເຂັ້ມແຂງ ໜັກແໜ້ນ. ເອົາໃຈໃສ່ນຳພາວຽກງານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນຳພາຂອງພັກ ຮັບປະກັນໄດ້ຄຸນນະພາບ ເຮັດໃຫ້ການຈັດຕັ້ງປະຕິບັດຖືກຕ້ອງ ແລະ ເປັນເອກະພາບກັນໃນທົ່ວພັກ, ເອົາໃຈໃສ່ປະຕິບັດ 02 ວາລະແຫ່ງຊາດ ທັງພ້ອມກັນ, ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງແຂວງຕົນ ໃຫ້ປະກົດຜົນເປັນຈິງຕາມທີ່ໄດ້ກຳນົດໄວ້.
ໃນໂອກາດດັ່ງກ່າວ, ສະຫາຍ ຫົວໜ້າຄະນະຈັດ ຕັ້ງສູນກາງພັກ ພ້ອມດ້ວຍຄະນະ ຍັງໄດ້ພົບປະ ແລະ ເຮັດວຽກກັບຄະນະພັກ, ຄະນະນຳຂອງເມືອງສາມັກຄີໄຊ ແຂວງອັດຕະປື ຢູ່ທີ່ສະໂມສອນຂອງສຳນັກງານປົກຄອງເມືອງສາມັກຄີໄຊ ແລະ ໄດ້ເດີນທາງໄປຢ້ຽມຊົມສະຖານທີ່ຜະລິດໄຟຟ້າໂຊລາເຊວ ແລະ ການສະໜອງນ້ຳຊົນລະປະທານ ໃຫ້ແກ່ການປູກເຂົ້ານາແຊງ ໃນເນື້ອທີ່ 52 ເຮັກຕາ ຂອງປະຊາຊົນບ້ານທ່າຫີນ ເມືອງສາມັກຄີໄຊ, ໄປຢ້ຽມຊົມໂຄງການລ້ຽງງົວ ຂອງບໍລິສັດທາໂກ ອາກຣີ ລາວ (THACO AGRI) ທີ່ຕັ້ງຢູ່ເມືອງໄຊເສດຖາ ແລະ ໄດ້ໄປຢ້ຽມຊົມອະນຸສາວະລີ ແລະ ໄຫວ້ສັກກະລະບູຊາພະເຈົ້າໄຊເຊດຖາທິລາດ.
