ໂດຍ: ວິລະສະໄໝ
ໃນວັນທີ 25 ມັງກອນ 2023 ທີ່ສຳນັກງານຄະນະຈັດຕັ້ງສູນກາງພັກ ໄດ້ມີພິທີເຜີຍແຜ່, ເຊື່ອມຊຶມເອກະສານສຳຄັນຈຳນວນໜຶ່ງ ແລະ ປາຖະກະຖາວັນສ້າງຕັ້ງກອງທັບ ຄົບຮອບ 74 ປີ ໂດຍການເຂົ້າຮ່ວມຂອງສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ, ສະຫາຍ ທອງຈັນ ໂຂງພູມຄຳ ກຳມະການປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ, ສະຫາຍ ປອ. ວິສຸກ ພົມພິທັກ ຄະນະພັກ ຮອງຫົວໜ້າຄະນະຈັດຕັ້ງສູນກາງພັກ, ມີຄະນະພັກ, ຄະນະກົມ, ຄະນະພະແນກ ແລະ ພະນັກງານ-ລັດຖະກອນ ທົ່ວສຳນັກງານຄະນະຈັດຕັ້ງສູນກາງພັກເຂົ້າຮ່ວມຢ່າງພ້ອມພຽງ.
ການຈັດຕັ້ງເຜີຍແຜ່ເຊື່ອມຊຶມຄັ້ງນີ້ມີທັງໝົດ 4 ເອກະສານສໍາຄັນ ຄື: 1. ບົດສະຫຼຸບຕີລາຄາການຈັດຕັ້ງປະຕິບັດວຽກງານການເມືອງ-ແນວຄິດທົ່ວປະເທດຄັ້ງທີ V, 2. ເນື້ອໃນກອງປະຊຸມລັດຖະບານເປີດກວ້າງ ຄັ້ງທີ II ໃຫ້ກຽດເຜີຍແຜ່ເອກະສານດັ່ງກ່າວ ໂດຍສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະຈັດຕັ້ງສູນກາງພັກ, 3. ເນື້ອໃນກອງປະຊຸມວຽກງານຮາກຖານການເມືອງ ຕິດພັນກັບວຽກງານພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງ ໃຫ້ກຽດເຜີຍແຜ່ໂດຍ ສະຫາຍ ທອງຈັນ ໂຂງພູມຄຳ ກຳມະການປະຈຳພັກ ຮອງຫົວໜ້າຄະນະຈັດຕັ້ງສູນກາງພັກ ແລະ ປາຖະກະຖາວັນສ້າງຕັ້ງກອງທັບປະຊາຊົນ ລາວ ຄົບຮອບ 74 ປີ (20/01/1949 - 20/01/2023 ) ເຜີຍແຜ່ໂດຍສະຫາຍ ປອ. ວິສຸກ ພົມພິທັກ ຄະນະພັກ ຮອງຫົວໜ້າຄະນະຈັດຕັ້ງສູນກາງພັກ; ການຈັດຕັ້ງເຜີຍແຜ່ເຊື່ອມຊຶມຄັ້ງນີ້ກໍເພື່ອເຮັດໃຫ້ພະນັກງານ-ສະມາຊິກພັກ ພາຍໃນຄະນະຈັດຕັ້ງສູນກາງພັກໄດ້ຮັບຮູ້ເຊື່ອມຊຶມກໍາແໜ້ນບັນດາເນື້ອໃນເອກະສານດັ່ງກ່າວຢ່າງມີຄວາມເປັນເອກະພາບ ແລະ ນຳໄປຈັດຕັ້ງ ຜັນຂະຫຍາຍເຂົ້າໃນວຽກງານຕົວຈິງ ໃຫ້ໄດ້ຮັບໝາກຜົນ.
