ໂດຍ: ນາງ ຄຳສະຫວັນ ພົມມະວົງ
ໃນວັນທີ 23 ພະຈິກ 2022 ນີ້, ທີ່ສະໂມສອນຄະນະຈັດຕັ້ງສູນກາງພັກ ໄດ້ຈັດຕັ້ງເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI ແລະ ບັນດາເອກະສານຈຳນວນໜຶ່ງ ໂດຍການເຂົ້າຮ່ວມຂອງສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ, ມີຄະນະພັກ, ຄະນະກົມ ແລະ ພະນັກງານ-ລັດຖະກອນ ທົ່ວສຳນັກງານຄະນະຈັດຕັ້ງສູນກາງພັກເຂົ້າຮ່ວມ 174 ຄົນ, ຍິງ 76 ຄົນ.
ການຈັດຕັ້ງເຜີຍແຜ່ເຊື່ອມຊຶມຄັ້ງນີ້ມີ 4 ເອກະສານສຳຄັນ ຄື: ມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ XI, ມະຕິຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ, ຄຳສັ່ງແນະນຳຂອງຄະນະເລຂາທິການສູນກາງພັກ ກ່ຽວກັບການເພີ່ມທະວີການນຳພາ-ຊີ້ນຳ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ, ດໍາລັດຂອງລັດຖະບານວ່າດ້ວຍລົດຂອງລັດ; ໃຫ້ກຽດເຜີຍແຜ່ເອກະສານດັ່ງກ່າວໂດຍສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ.
ໃນວາລະກອງປະຊຸມ ຍັງໄດ້ເປີດໂອກາດໃຫ້ຜູ້ເຂົ້າຮ່ວມໄດ້ສອບຖາມບັນຫາທີ່ສົນໃຈ ແລະ ສະເໜີຄຳຄິດເຫັນຕໍ່ບັນຫາທີ່ຄວນປັບປຸງແກ້ໄຂໃນຕໍ່ໜ້າ, ເຊິ່ງການຈັດຕັ້ງເຜີຍແຜ່ເຊື່ອມຊຶມຄັ້ງນີ້ກໍເພື່ອເຮັດໃຫ້ພະນັກງານ-ສະມາຊິກພັກ ພາຍໃນຄະນະຈັດຕັ້ງສູນກາງພັກໄດ້ຮັບຮູ້ເຊື່ອມຊຶມກໍາແໜ້ນບັນດາເນື້ອໃນເອກະສານດັ່ງກ່າວ ແລະ ນຳໄປຈັດຕັ້ງປະຕິບັດເຂົ້າໃນວຽກງານຕົວຈິງ, ເປັນເຈົ້າການປະຕິບັດ, ໜ້າທີ່ການເມືອງຂອງຕົນ ແລະ ພ້ອມກັນປະຕິບັດັ ມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ປະກົດຜົນເປັນຈິງ.
