ໂດຍ: ວິລະສະໄໝ
ໃນກາງເດືອນ ພະຈິກ 2022 ຄະນະຈັດຕັ້ງສູນກາງພັກ ໄດ້ຈັດຊຸດຝຶກອົບຮົມການນຳໃຊ້ໂປຣແກຣມຄຸ້ມຄອງສະມາຊິກພັກ ໃຫ້ກັບພະນັກງານຜູ້ທີ່ເຮັດວຽກງານພັກຂອງກົມຈັດຕັ້ງ-ພະນັກງານ ຄຈສພ ເຊິ່ງມີຜູ້ຕາງໜ້າຄະນະຮັບຜິດຊອບກ່ຽວຂ້ອງ ຄື: ສະຫາຍ ສີອຳພອນ ຈັນລາຕີ ຮອງຫົວໜ້າຫ້ອງການ ຄຈສພ ແລະ ສະຫາຍ ຜາມີ ສີຈັນທອງທິບ ຮອງຫົວໜ້າກົມຈັດຕັ້ງ-ພະນັກງານ ຄຈສພ ພ້ອມດ້ວຍຜູ້ເຂົ້າຮ່ວມ 10 ກວ່າຄົນ.
ໂຄງການສ້າງໂປຼແກຼມຄຸ້ມຄອງສະມາຊິກພັກ ແລະ ການຝຶກອົບຮົມວິທີນຳໃຊ້ໂປຣແກຣມດັ່ງກ່າວນີ້ ເປັນ 1 ໃນ 8 ແຜນງານ 47 ໂຄງການ ທີ່ໄດ້ກໍານົດຢູ່ໃນແຜນດໍາເນີນງານຂອງຄະນະຈັດຕັ້ງສູນກາງພັກ ໂດຍມີຫ້ອງການ ຄຈສພ ເປັນເສນາທິການສ້າງໂປຣແກຣມ ເຊິ່ງແມ່ນພະແນກຂໍ້ມູນຂ່າວສານຂອງຫ້ອງການ ເປັນຜູ້ຮັບຜິດຊອບອອກແບບສ້າງໂປຣແກຣມດັ່ງກ່າວ ພາຍຫຼັງສຳເລັດແລ້ວ ຄະນະຮັບຜິດຊອບກ່ຽວຂ້ອງໄດ້ທົດລອງນຳໃຊ້ຢູ່ພາຍໃນສຳນັກງານ ເພື່ອປັບປຸງຂໍ້ບົກຜ່ອງຕ່າງໆໃຫ້ດີຍິ່ງຂຶ້ນ, ຈາກນັ້ນ ຈິ່ງຈະຂະຫຍາຍການນຳໃຊ້ອອກສູ່ກົມຈັດຕັ້ງບັນດາກະຊວງ-ອົງການ, ຄະນະຈັດຕັ້ງແຂວງ-ນະຄອນຫຼວງວຽງຈັນ, ຄະນະຈັດຕັ້ງເມືອງ ແລະ ນະຄອນ ເພື່ອເຮັດໃຫ້ການຄຸ້ມຄອງສະມາຊິກພັກມີຂໍ້ມູນທີ່ຖືກຕ້ອງ, ຊັດເຈນ, ເກັບຮັກສາໄວ້ໄດ້ຍາວນານ, ສະດວກວ່ອງໄວທັນກັບສະພາບການພັດທະນາຂອງຍຸກສະໄໝ ແກ້ໄຂໃຫ້ໄດ້ບັນຫາ ການເກັບກໍາຊີວະປະຫວັດຂອງສະມາຊິກພັກໃນໄລຍະຜ່ານມາ ທີ່ ເກັບກຳໄວ້ໃນຮູບແບບສຳເນົາ ເປັນແຟ້ມເອກະສານ, ເວລາຕ້ອງການສະຫຼຸບລາຍງານເຫັນວ່າພົບຄວາມຫຍຸ້ງຍາກຫຼາຍຢ່າງເປັນຕົ້ນ: ການເກັບມ້ຽນເອກະສານຮັກສາບໍ່ໄດ້ດົນ ນ້ຳມຶກຈືດຈາງ ເຈັ້ຍເອກະສານມີການຈີກຂາດເຊື່ອມຄຸນນະພາບ, ປວກກິນ ... ເມື່ອມີການສັບປ່ຽນໜ້າທີ່ຮັບຜິດຊອບແມ່ນສ້າງຄວາມຫຍຸ້ງຍາກໃຫ້ກັບຜູ້ມາຮັບໜ້າທີ່ໃໝ່ ບາງຂໍ້ມູນ ມີການຄາດເຄື່ອນ ບໍ່ຖືກກັບຄວາມເປັນຈິງ, ການຄົ້ນຫາຂໍ້ມູນຂອງສະມາຊິກພັກ ແມ່ນໃຊ້ເວລາດົນ ແລະ ບາງຄັ້ງເອກະສານກໍ່ຊອກບໍ່ເຫັນ.
ການຝຶກອົບຮົມການນໍາໃຊ້ໂປຣແກຣມຄຸ້ມຄອງສະມາຊິກພັກຄັ້ງນີ້ ໄດ້ດຳເນີນເປັນເວລາ 3 ວັນ ດ້ວຍຄວາມຮັບຜິດຊອບສູງ ແລະ ໄດ້ຮັບຜົນສຳເລັດ ຢ່າງຈົບງາມ ເຊິ່ງເປັນອີກໜຶ່ງບາດກ້າວໃໝ່ ຂອງວຽກງານຄຸ້ມຄອງສະມາຊິກພັກ ໃນການຫັນເປັນທັນສະໄໝຂຶ້ນເທື່ອລະກ້າວ.
