ພາບ: ບານ ມູນປະເສີດ ຂ່າວໂດຍ: ສ.ສົດໃສ
ໃນລະຫວ່າງວັນທີ 25 ຕຸລາ - 04 ພະຈິກ 2022 ຢູ່ທີ່ສະໂມສອນຄະນະຈັດຕັ້ງສູນກາງພັກ ໄດ້ຈັດຊຸດຝຶກອົບຮົມວຽກງານກວດກາພັກ-ລັດ ໃຫ້ຜູ້ເຮັດວຽກງານກວດກາທີ່ຂຶ້ນກັບຄະນະຈັດຕັ້ງສູນກາງພັກ ໂດຍໃຫ້ກຽດເຂົ້າຮ່ວມເປັນປະທານຂອງສະຫາຍ ປອ ວິສຸກ ພົມພິທັກ ຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ປອ ດາວບົວລະພາ ບາວົງເພັດ ຄະນະປະຈຳພັກ, ຮອງປະທານຄະນະກວດກາສູນກາງພັກ, ມີສຳມະນາກອນຈຳນວນ 18 ສະຫາຍ, ຍິງ 5 ສະຫາຍ ພ້ອມດ້ວຍວິທະຍາກອນ.
ຊຸດຝຶກອົບຮົມດັ່ງກ່າວນີ້ ຈັດຂຶ້ນເພື່ອບຳລຸງກໍ່ສ້າງຄະນະໜ່ວຍພັກ ຜູ້ຮັບຜິດຊອບວຽກງານກວດກາຂອງໜ່ວຍພັກ, ສະມາຊິກພັກຜູ້ຊ່ວຍວຽກພັກ ແລະ ຜູ້ເຮັດວຽກງານກວດກາຂອງຄະນະຈັດຕັ້ງສູນກາງພັກ ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງຄົບຖ້ວນ ກ່ຽວກັບຄວາມຮູ້ພື້ນຖານວຽກງານຕິດຕາມ, ກວດກາພັກ-ລັດ ແລະ ຕ້ານການສໍ້ລາດບັງຫຼວງ ແນໃສ່ໃຫ້ກຳໄດ້ເນື້ອໃນຫຼັກການ, ວິທີການ ແລະ ຂັ້ນຕອນໃນການດຳເນີນຕິດຕາມ, ກວດກາ ແລະ ສ້າງທັດສະນະ, ຄຸນທາດການເມືອງ, ຄຸນສົມບັດສິນທຳປະຕິວັດ ໃຫ້ຜູ້ເຮັດວຽກງານກວດກາ ມີຄວາມໜັກແໜ້ນເທື່ອລະກ້າວ ພ້ອມທັງສາມາດນຳໄປຈັດຕັ້ງປະຕິບັດໃນໜ້າທີ່ວຽກງານຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງ.
ເນື້ອໃນການຝຶກອົບຮົມປະກອບມີ 15 ບົດຄື: ວຽກງານຕິດຕາມກວດກາພັກ-ລັດ, ວິໄນຂອງພັກ, ການສະກັດກັ້ນ ແລະ ຕ້ານການສໍ້ລາດບັງຫຼວງ, ການແກ້ໄຂຄຳຮ້ອງຟ້ອງ, ຮ້ອງທຸກ ແລະ ຄຳສະເໜີ, ການຕິດຕາມກວດກາໂຄງການລົງທຶນຂອງລັດເລີ່ມແຕ່ຫົວທີ, ການຕິດຕາມກວດກາການຈັດຕັ້ງປະຕິບັດຜົນການກວດກາ, ການສືບສວນ-ສອບສວນ ແລະ ການສ້າງເອກະສານ, ສຳນວນ ແລະ ສຳເນົາເອກະສານວຽກກວດກາ ພ້ອມທັງການປັບປຸງກົງຈັກການຈັດຕັ້ງ ແລະ ການບຳລຸງ-ກໍ່ສ້າງພະນັກງານກວດກາ ໂດຍມີວິທະຍາກອນຈາກຄະນະກວດກາສູນກາງພັກ ທີ່ມີປະສົບການ ແລະ ບົດຮຽນທາງດ້ານທິດສະດີ ແລະ ພຶດຕິກຳຕົວຈິງ ຂຶ້ນບັນຍາຍ ຖ່າຍທອດບົດຮຽນ ພ້ອມທັງມີການແລກປ່ຽນບົດຮຽນຈາກປະສົບການຕົວຈິງ.
ການຝຶກອົບຮົມຄັ້ງນີ້ ສຳມະນາກອນ ໄດ້ມີຄວາມເອົາໃຈໃສ່ແລກປ່ຽນບົດຮຽນ ແລະ ປະສົບການຢ່າງກົງໄປກົງມາ ແລະ ເຂົ້າຮ່ວມຝຶກອົບຮົມໄດ້ຕາມຫຼັກສູດ ແລະ ເງື່ອນໄຂທີ່ຄະນະກວດກາສູນກາງພັກວາງອອກ. ໃນຕອນທ້າຍພິທີ ສະຫາຍ ປອ ວິສຸກ ພົມພິທັກ ຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ໃຫ້ກຽດມອບໃບຢັ້ງຢືນໃຫ້ແກ່ສຳມະນາກອນ ແລະ ໃຫ້ກຽດໂອ້ລົມຕໍ່ພິທີ ເຊິ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍສຳມະນາກອນ ທີ່ໄດ້ພ້ອມກັນຕັ້ງໜ້າຄົ້ນຄວ້າ ແລະ ແລກປ່ຽນບົດຮຽນຢ່າງເປັນຂະບວນຟົດຟື້ນ ແລະ ມີຄວາມຮັບຜິດຊອບສູງ ທັງໄດ້ຮຽກຮ້ອງໃຫ້ບັນດາສະຫາຍທີ່ເຂົ້າຮ່ວມຝຶກອົບຮົມຄັ້ງນີ້ ຈົ່ງນຳເອົາບົດຮຽນໃນຊຸດຝຶກອົບຮົມຄັ້ງນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງແຕ່ລະສະຫາຍ ປະກອບສ່ວນເຂົ້າໃນການເສີມຂະຫຍາຍບົດບາດການນຳພາຂອງພັກ ຖືກຕ້ອງກັບທິດທາງໜ້າທີ່ລວມ ແລະ ບັນດາເນື້ອໃນຂໍ້ກຳນົດຕ່າງໆຂອງກົມການເມືອງສູນກາງພັກ, ຄະນະເລຂາທິການສູນກາງພັກ ແລະ ຄະນະພັກ ຄະນະຈັດຕັ້ງສູນກາງພັກ ທັງຮັບປະກັນໃຫ້ວຽກງານກວດກາຂອງໜ່ວຍພັກໄດ້ຮັບການຈັດຕັ້ງປະຕິບັດເປັນປົກກະຕິຕໍ່ເນື່ອງຕາມແຜນການໃນແຕ່ລະໄລຍະການນຳພາຂອງໜ່ວຍພັກ.
