ພາບ ແລະ ຂ່າວ: ຄອນຄຳ ໂສລັດຕະນະວົງ
ໃນວັນທີ 28 ມັງກອນ 2022 ສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ຢ້ຽມຢາມ ພົບປະໂອ້ລົມ ແລະ ເຮັດວຽກກັບຄະນະຈັດຕັ້ງແຂວງເຊກອງ ໂດຍມີສະຫາຍ ບຸນຫຼາຍ ບຸດທິ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງເຊກອງ ພ້ອມດ້ວຍຄະນະໃຫ້ການຕ້ອນຮັບ.
ໃນໂອກາດດັ່ງກ່າວ ສະຫາຍຫົວໜ້າຄະນະຈັດຕັ້ງແຂວງເຊກອງ ໄດ້ລາຍງານສະພາບລວມວຽກງານຈັດຕັ້ງໃນໄລຍະຜ່ານມາ, ດ້ານດີທີ່ຕັ້ງໜ້າ, ບັນຫາທີ່ພົບພໍ້ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານວິຊາສະເພາະ ພ້ອມກັບມີການຖາມ-ຕອບ ແລກປ່ຽນຄຳເຫັນທາງດ້ານວິຊາການລະຫວ່າງທີມງານຈາກຄະນະຈັດຕັ້ງສູນກາງພັກ ແລະ ຄະນະຈັດຕັ້ງແຂວງ.
ພາຍຫຼັງມີການແລກປ່ຽນບົດຮຽນທາງດ້ານວິຊາການຈາກສອງຄະນະແລ້ວ ສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ມີຄຳເຫັນໂອ້ລົມໃຫ້ທິດຊີ້ນຳຕໍ່ຄະນະຈັດຕັ້ງແຂວງ ໃນຖານະເປັນເສນາທິການວຽກງານພັກ-ພະນັກງານ ແລະ ວຽກງານກົງຈັກການຈັດຕັ້ງໃຫ້ຄະນະບໍລິຫານງານພັກແຂວງ ຕ້ອງກຳໄດ້ນິຕິກຳວຽກງານພັກ-ພະນັກງານ, ກົດໝາຍຂອງລັດ ແລະ ນິຕິກຳທີ່ກ່ຽວຂ້ອງວຽກງານວິຊາສະເພາະຂອງຕົນ, ສິ່ງສຳຄັນພະນັກງານຈັດຕັ້ງຕ້ອງມີຄວາມທ່ຽງທຳ, ມີຈັນຍາບັນ, ມີຄຸນທາດການເມືອງໜັກແໜ້ນ, ແກ້ໄຂບັນຫາຢ່າງພາວະວິໄສ ປະຕິບັດຕາມຫຼັກການເຮັດວຽກຂອງພັກ ຮັບປະກັນການເປັນເສນາທິການວຽກງານຈັດຕັ້ງໃຫ້ທ້ອງຖິ່ນຂອງຕົນນັບມື້ມີຄວາມເຂັ້ມແຂງ ແລະ ກ້າວໄປສູ່ຄຸນນະພາບໃໝ່ຢ່າງບໍ່ຢຸດຢັ້ງ.
