ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ບາງຄໍາເຫັນໂອ້ລົມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI.
ຈຳນວນຜູ້ອ່ານ: 462
ອະນຸມັດວັນທີ: 28/10/2021

     ໃນພິທີປິດກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ວັນທີ 26 ຕຸລາ 2021 ສະຫາຍ​ ທອງ​ລຸນ ສີ​ສຸ​ລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ ໄດ້ເປັນກຽດໂອລົມຕໍ່ກອງປະຊຸມດັ່ງກ່າວ ເຊິ່ງມີເນື້ອໃນບາງຕອນດັ່ງນີ້:

ກອງ​ປະຊຸມ​ວຽກ​ງານ​ຈັດຕັ້ງທົ່ວ​ປະ​ເທດ​ຄັ້ງນີ້ ​ມີ​ຄວາມ​ໝາຍສໍາຄັນ​ຫຼາຍເປັນ​ບັ້ນສະຫຼຸບ ​ແລະ ຖອດ​ຖອນ​ບົດຮຽນ​ສໍາຄັນ​ວຽກ​ພັກ-ພະນັກງານ​ໃນ​ໄລຍະ​ຜ່ານ​ມາ; ​ເປັນ​ການ​ເຊື່ອມ​ຊຶມ​ເອກະສານ, ນິຕິ​ກໍາ​ສໍາຄັນ​ຂອງ​ພັກ-ລັດ​ກ່ຽວ​ກັບ​ວຽກ​ງານ​ພັກ-ພະນັກງານ ​ແລະ ວຽກ​ກົງຈັກ​ໃນ​ໄລຍະ​ໃໝ່; ​ແມ່ນ​ການຈັດຕັ້ງຜັນ​ຂະຫຍາຍ​ໂດຍ​ກົງ​ເນື້ອ​ໃນ​ຈິດ​ໃຈ​ມະຕິ​ກອງ​ປະຊຸມ​ໃຫຍ່ ຄັ້ງທີ XI ຂອງ​ພັກ. ພັກ​ເຮົາ​ຈະ​ຍົກ​ສູງບົດ​ບາດ​ການ​ນໍາພາຂອງ​ຕົນ, ຈະ​ສາມາດ​ສ້າງ​ການ​ຫັນປ່ຽນ​ຢ່າງ​ແຂງ​ແຮງ, ​ເລິກ​ເຊິ່ງ, ຮອບດ້ານ ​ໃນ​ການ​ປະຕິບັດ​ຄາດໝາຍ​ສູ້​ຊົນ​ທີ່​ກອງ​ປະຊຸມ​ໃຫຍ່ ຄັ້ງທີ XI ຂອງ​ພັກ​ໄດ້ ຫຼື ບໍ່, ປັດ​ໄຈ​ສໍາຄັນ​ຕັດສິນ​ແມ່ນ​ຢູ່​ທີ່​ແນວທາງ​ການຈັດຕັ້ງ, ມັນ​ຂື້ນ​ກັບ​ການ​ຫັນ​ເປັນ​ການ​ກະ​ທໍາ​ຕົວ​ຈິງ​ໃນ​ວຽກ​ງານ​ປັບປຸງ​ກໍ່ສ້າງ​ພັກ, ວຽກ​ງານ​ພະນັກງານ ​ແລະ ວຽກ​ງານ​ປັບປຸງ​ກົງຈັກ​ການຈັດຕັ້ງ.

     ກອງ​ປະຊຸມ​ໃຫຍ່ ຄັ້ງທີ XI ຂອງ​ພັກ ກໍ​ຄືກ​ອງປະຊຸມ​ວຽກ​ງານ​ຈັດຕັ້ງ​ໃນ​ຫຼາຍ​ຄັ້ງຜ່ານ​ມາ, ກະທັ້ງຄັ້ງນີ້ ກໍລ້ວນ​ແຕ່ຢືນຢັນຢ່າງ​ເປັນ​ເອກະ​ພາບ​ວ່າການ​ນໍາພາ​ຂອງ​ພັກ​ແມ່ນ​ປັດ​ໄຈ​ຕັດສິນ​ໄຊຊະນະ​ຂອງ​ການ​ປະຕິວັດ​ລາວ; ​ໄຊຊະນະ, ຜົນງານ​ທີ່​ພັກ​ເຮົາ​ຍາດ​ມາ​ໄດ້​ນັ້ນ, ອັນ​ທີ່​ເປັນ​ພື້ນຖານ​ກວມ​ລວມກວ່າ​ໝູ່​ແມ່ນ​ຍ້ອນ​ຄວາມ​ເປັນ​ເຈົ້າການ​ປັບປຸງ​ກໍ່ສ້າງ​ຕົນ​ເອງ ​ເຊິ່ງພັກ​ເຮົາ​ໄດ້​ຖື​ສໍາຄັນ ​ແລະ ​ເອົາ​ໃຈ​ໃສ່​ຢ່າງ​ຈົດ​ຈໍ່ ນັບ​ແຕ່​ມື້​ສ້າງຕັ້ງພັກ​ເປັນຕົ້ນມາ ອັນ​ໄດ້​ກາຍ​ເປັນ​ທາດ​ແທ້, ​ມູນ​ເຊື້ອ ​ແລະ ຫຼັກການ​ນໍາພາ​ຂອງ​ພັກ​ເຮົາ, ຍ້ອນ​ແນວ​ນັ້ນ ພັກ​ເຮົາ​ຈຶ່ງ​ຄົງ​ຕົວ​ໄດ້ ​ແລະ ສືບ​ຕໍ່​ຂະຫຍາຍຕົວ​ມາ​ຮອດ​ທຸກ​ມື້​ນີ້; ສາມາດ​ນໍາພາ​ການ​ຕໍ່ສູ້​ປົດ​ປ່ອຍ​ຊາດ​ໄດ້​ຢ່າງ​ມີ​ໄຊ, ປົກ​ປ້ອງ​ໝາກຜົນ​ຂອງ​ການ​ປະຕິວັດ, ປົກ​ປັກ​ຮັກສາ​ລະບອບ​ໃໝ່ ​ແລະ ດໍາ​ເນີນ​ການ​ສ້າງສາ​ພັດທະນາ​ປະ​ເທດ​ຊາ​ດ ຕາມ​ແນວທາງ​ປ່ຽນ​ແປງ​ໃໝ່​ຮອບດ້ານ, ມີ​ຫຼັກການ​ຢ່າງ​ມີ​ຜົນ​ສໍາ​ເລັດ ທີ່​ເປັນ​ພື້ນຖານ​ສໍາຄັນ​ຫຼາຍ​ປະການ.

     ໃນ​ຊຸມ​ປິ​ຜ່ານ​ມາ ວຽກ​ງານ​ກໍ່ສ້າງ​ພັກ-ພະນັກງານ​ໄດ້​ຮັບ​ການ​ປັບປຸງ ​ແລະ ຍົກ​ລະດັບ​ຂຶ້ນ​ຢ່າງ​ຕໍ່​ເນື່ອງ, ພາຍ​ໃຕ້​ການ​ຊີ້​ນໍາ​ໂດຍ​ກົງ​ຈາກ​ສູນ​ກາງ​ພັກ, ພວກ​ເຮົາ​ໄດ້​ດໍາ​ເນີນ​ຊີວິດ​ການ​ເມືອງ​ປັບປຸງ​ປົວ​ແປງ​ທົ່ວພັກຢ່າງ​ແຂງ​ແຮງ, ​ເລິກ​ເຊິ່ງສົມຄວນ ຕິດ​ພັນ​ກັບ​ການຄົ້ນຄວ້າ,​ ຕີ​ລາຄາ, ວິ​ເຄາະ, ​ໄຈ້ແຍກ​ຢ່າງ​ກວ້າງຂວາງ,​ ກົງ​ໄປ​ກົງ​ມາ ຕໍ່​ບັດາ​ຈຸດ​ອ່ອນ-ຂໍ້ຄົງຄ້າງ ທີ່​ເປັນ​ໄພ​ອັນຕະລາຍ​ຕໍ່​ລະບອບ​ໃໝ່ ​ແລະ ຕໍ່​ບົດບາດ​ການ​ນໍາພາ​ຂອງ​ພັກ. ຈາກ​ນັ້ນ​ໄດ້​ສ້າງ​ຄວາມ​ເຂົ້າ​ໃຈ​ເອກະ​ພາບ​ສູງ​ຂື້ນ​ກວ່າ​ເກົ່າ ກ່ຽວ​ກັບ​ສະພາບ​ຄວາມ​ເປັນ​ຈິງ​ຢູ່​ພາຍ​ໃນ​ພັກ ​ແລະ ​ໃນ​ສັງຄົມ; ປະຊາທິປະ​ໄຕ​ພາຍ​ໃນ​ພັກ​ໄດ້​ຮັບ​ການ​ເສີມ​ຂະຫຍາຍ​ຢ່າງ​ບໍ່​ຢຸດ​ຢັ້ງ, ສາມາດ​ລະດົມ​ສະຕິ​ປັນຍາ​ຂອງ​ທົ່ວ​ພັກກວ້າງຂວາງເລິກເຊິ່ງກວ່າເກົ່າ, ຮາກ​ຖານ​ພັກ​ມີ​ຄວາມ​ປອດ​ໃສ, ​​ເຂັ້ມ​ແຂງ,​ ໜັກ​ແໜ້ນ; ການວາງ​ແຜນ​ກໍ່ສ້າງ-ບໍາລຸງ​,​​ ເລືອກ​ເຟັ້ນ ​ແລະ ຈັດ​ວາງພະນັກງານ ທີ່​ຕິດ​ພັນ​ກັບ​ການ​ຫັນ​ເປັນ​ໜຸ່ມ​ແໜ້ນ​ໄດ້​ຮັບ​ການ​ຊີ້​ນໍາ​ປະຕິບັດ​ທີ່​ເປັນ​ຮູບ​ປະ​ທໍາ​ເປັນ​ກ້າວໆ, ຮັບປະກັນ​ໂຄງ​ປະກອບ​ເພດ, ​ເຜົ່າ ຕາມ​ອັດຕາ​ສ່ວນ​ທີ່​ເໝາະ​ສົມ ​ແລະ ພວມ​ສ້າງ​ການ​ຫັນປ່ຽນ​ຢ່າງ​ຕັ້ງໜ້າ ​ແລະ ​ແຂງ​ແຮງ​ໃນ​ຂັ້ນຕໍ່​ໄປ.

     ໝາກຜົນ​ດັ່ງກ່າວ​ນັ້ນ, ຢືນຢັນ​ເຖິງ​ຄວາມ​ຮັບຜິດຊອບ​ຂອງ​ຄະນະ​ພັກ​ທຸກຂັ້ນ ​ໃນ​ການຈັດຕັ້ງຜັນ​ຂະຫຍາຍ ມະຕິ​ກອງ​ປະຊຸມ​ໃຫຍ່ ຄັ້ງທີ X ຂອງ​ພັກ​ກ່ຽວ​ກັບ​ວຽກ​ງານ​ກໍ່ສ້າງ​ພັກ-ພະນັກງານ ທັງ​ເປັນ​ບົດຮຽນ​ເພື່ອ​ສືບ​ຕໍ່​ຈັດຕັ້ງປະຕິບັດ​ໃຫ້​ນັບ​ມື້​ມີ​ຄຸນ​ນະພາ​ບ, ສ້າງ​ໄດ້​ສະມາຊິກ​ພັກ-ພະນັກງານ​ທີ່​ມີ​ຄວາມ​ຮູ້,​ ຄວາມ​ສາມາດ, ມີ​ຄວາມ​ຄົ້ນຄິດປະດິດ​ສ້າງ, ກ້າ​ເຮັດ, ກ້າ​ຮັບຜິດຊອບ​ຕໍ່​ທຸກ​ວຽກ​ງານທີ່​ການຈັດຕັ້ງມອບ​ໝາຍ​​ໃຫ້. ທັງ​ໝົດ​ນັ້ນ, ນອກຈາກ​ມີ​ການ​ນໍາພາ​ຊີ້​ນໍາ​ລວມຂອງ​ສູນ​ກາງ​ພັກ​ແລ້ວ, ປັດ​ໄຈ​ທີ່​ມີ​ລັກສະນະ​ຕັດສິນ​ໂດຍ​ກົງ​ກໍ່​ຍັງ​ແມ່ນ​ຄວາມ​ບຸກບືນ​ສູ້​ຊົນ​ຂອງ​ຄະນະ​ພັກ, ອົງການ​ເສນາ​ທິການ​ໃຫ້​ແກ່​ຄະນະ​ພັກ​ແຕ່ລະ​ຂັ້ນ ກໍ່​ຄື​ຖັນ​ແຖວ​ພະນັກງານ-ສະມາຊິກ​ພັກ ທີ​ຮັບຜິດຊອບ​ວຽກ​ງານ​ກໍ່ສ້າງ​ພັກ-ພະນັກງານ ​ແລະ ປັບປຸງ​ກົງຈັກ​ການຈັດຕັ້ງ ທີ່​ໄດ້​ເອົາ​ໃຈ​ໃສ່​ປະຕິບັດ​ໜ້າ​ທີ່, ຂອບ​ເຂດ​ສິດ​ຂອງ​ຕົນ​ດ້ວຍ​ຄວາມ​ຮັບ​ຜິດ​ຊອບ, ອົດທົນ​ຜ່ານ​ຜ່າ​ທຸກ​ຄວາມ​ຫຍຸ້ງຍາກ, ມີ​ຄວາມ​ຈົງ​ຮັກ​ພັກດີ, ມີ​ຄວາມ​ບໍລິສຸດ​ສັດ​ຊື່ຕໍ່ໜ້າ​ທີ່​ວຽກ​ງານທີ່​ການຈັດຕັ້ງມອບ​ໝາຍໃຫ້.

     ອີງ​ໃສ່​ບົດ​ລາຍ​ງານ​ກ່ຽວ​ກັບ​ວຽກ​ງານ​ກໍ່ສ້າງ​ພັກ-ພະນັກງານ ​ແລະ ປັບປຸງ​ກົງຈັກ​ການຈັດຕັ້ງ​ ໄລຍະ 5 ປີຜ່ານມາ​ໂດຍ​ສະ​ເພາະ​ພາກ​ຕີ​ລາຄາ​ດ້ານ​ອ່ອນ, ຂໍ້ຄົງຄ້າງ​ນັ້ນ ​ໄດ້​ຊີ້​ໃຫ້​ພວກ​ເຮົາ​ເຫັນ​ຫຼາຍ​ບັນຫາ​ທີ່​ຕັ້ງຂຶ້ນ, ​ເປັນ​ສິ່ງ​ທ້າ​ທາຍ​ທົດ​ສອບ​ໂດຍ​ກົງຕໍ່​ວຽກ​ງານ​ພັກ-ພະນັກງານ, ວຽກ​ງານ​ກົງຈັກ​ການຈັດຕັ້ງ, ສັງຄົມ​ກໍ​ຕິດຕາມ​ຢ່າ​ງຈົດ​ຈໍ່ ​ແລະ ສ່ອງ​ແສງ, ວິພາກ​ວິຈານຕໍ່​ພັກ​ເຮົາ​ຢ່າງ​ລຽນຕິດ ​ເຊິ່ງມັນ​ເລັ່ງທວງ​ໃຫ້​ພັກ​ເຮົາ​ຕ້ອງ​ຮີບ​ຮ້ອນ​ດໍາ​ເນີນ​ການ​ປັບປຸງ, ​ແກ້​ໄຂ​ໃຫ້​ທັນ​ການ,​​ເດັດຂາດ, ​ເຂັ້ມງວດ​ແທ້ໆ ເປັນຕົ້ນ: ບັນຫາການຄົ້ນຄວ້າ,​ ຜັນຂະຫຍາຍແນວທາງຂອງພັກຢູ່ຫຼາຍບ່ອນຍັງຊັກຊ້າ, ບໍ່ທັນກັບສະພາບການ, ເນື້ອໃນບໍ່ເລິກເຊິ່ງ,​ ບໍ່ທັນສາມາດຄົ້ນຄວ້າກໍານົດ ແລະ ປະຕິບັດໜ້າທີ່ວຽກງານຕົວຈິງຢ່າງຈະແຈ້ງ; ບັນຫາການກໍ່ສ້າງພັກດ້ານການເມືອງ-ແນວຄິດບໍ່ທັນຕອບສະໜອງໄດ້ການເລັ່ງທວງໃນໄລຍະໃໝ່; ບັນຫາການເສື່ອມຖອຍດ້ານຄຸນທາດການເມືອງ, ຄຸນສົມບັດສິນທໍາປະຕິວັດໃນຖັນແຖວສະມາຊິກພັກ-ພະນັກງານ, ປະກົດການແນວຄິດຄອງເດີມ, ເອື່ອຍອີງ, ບໍ່ກ້າຄິດ-ບໍ່ກ້າລິເລີ່ມ, ບໍ່ກ້າຮັບຜິດຊອບຕໍ່ຜົນໄດ້-ຜົນເສຍໃນການຈັດຕັ້ງປະຕິບັດວຽກງານ ແລະ ການເສຍສະຫຼະເພື່ອພາລະກິດສ່ວນລວມຍັງບໍ່ທັນສູງ; ການຊີ້ນໍາເພື່ອສ້າງຄວາມເຂັ້ມແຂງຂອງວຽກງານກວດກາ, ການປະຕິບັດວິໄນ,​ກົດໝາຍ,​ການຕ້ານ-ສະກັດກັ້ນການສໍ້ລາດບັງຫຼວງຍັງອືດອາດຊັກຊ້າ, ບໍ່ທັນມີຈຸດສຸມ, ການແກ້ໄຂຜົນຂອງການກວດກາຍັງສືບຕໍ່ແກ່ຍາວ ແລະ ມີຄວາມຫຍຸ້ງຍາກສັບສົນ; ບັນດາຂອດໃນວຽກງານພະນັກງານ ຍັງບໍທັນປະຕິບັດໄດ້ຢ່າງເປັນລະບົບຄົບຊຸດ, ຫຼາຍດ້ານບໍ່ສອດຄ່ອງ-ແທດຕົວຈິງ ແລະ ບໍ່ທັນສາມາດເປັນກໍາລັງແຮງຕົວຈິງໃນເງື່ອນໄຂໃໝ່; ບັນຫາກົງຈັກໃຫຍ່ໂຕ, ​ພາລະບົດບາດຊໍ້າຊ້ອນ-ກ້າວກ່າຍກັນ, ສິ້ນເປືອງ, ປະສິດທິຜົນວຽກງານບໍ່ສູງ ຍັງບໍ່ທັນໄດ້ຮັບການແກ້ໄຂ ແລະ ອື່ນໆ. ບັນຫາ​ເຫຼົ່ານັ້ນ, ​ແນ່ນອນ​ຈະ​ສົ່ງ​ຜົນ​ສະທ້ອນ​ໂດຍ​ກົງ​ເຖິງ​ການ​ຜັນ​ຂະຫຍາຍ ​ແລະ ຈັດຕັ້ງປະຕິບັດ​ມະຕິ​ກອງ​ປະຊຸມ​ໃຫຍ່ ຄັ້ງທີ XI ຂອງ​ພັກ, ກົດ​ລະບຽບ​ພັກ ສະ​ໄໝ​ທີ XI, ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ 5 ປີ ຄັ້ງທີ 9. ​ໃນ​ປະຈຸ​ບັນ ສະພາບ​ດັ່ງກ່າວ​ມານັ້ນ ​ແມ່ນ​ຄວາມ​ຮັບຜິດຊອບ​ໂດຍ​ກົງ​ຂອງ​ຄະນະ​ພັກ​ແຕ່ລະ​ຂັ້ນ ກໍ່​ຄື​ຄະນະ​ຈັດຕັ້ງ ​ແລະ ພາກສ່ວນ​ກ່ຽວຂ້ອງ​ແຕ່ລະ​ຂັ້ນ​ໃນ​ການ​ເປັນ​ເສນາ​ທິການ​ໃຫ້​ສູນ​ກາງ​ພັກ, ລັດຖະບານ ສືບ​ຕໍ່​ຄົ້ນຄວ້າ,​ ສະ​ເໜີ​ທິດ​ນໍາ, ວິທີ​ການ ​ແລະ ມາດ​ຕະການ​ຕົວ​ຈິງ ​ເພື່ອ​ແກ້​ໄຂ ​ແລະ ຍົກ​ລະດັບ​ຄຸນ​ນະພາ​ບວຽກ​ງານ​ສ້າງ​ພັກ-ພະນັກງານ ​ແລະ ວຽກ​ງານ​ກົງຈັກ​ການຈັດຕັ້ງ​ໃຫ້​ມີ​ການ​ຫັນປ່ຽນ​ແຂງ​ແຮງ, ​ເລິກ​ເຊິ່ງອີ​ຫຼີ, ບັນຫາ​ສໍາຄັນ​ແມ່ນ​ຈະເຮັດ​ແນວ​ໃດ​ໃຫ້​ເຂົ້າສູ່​ການ​ກະທໍາ​ຕົວ​ຈິງ ​ແລະ ​ເກີດ​ເປັນ​ຮູບ​ປະ​ທໍາ.

     ໃນ​ຊຸມ​ປີ​ຕໍ່ໜ້າ​ນີ້, ​ໜຶ່ງ​ໃນ​ບັນດາ​ທິດ​ທາງ​ຕົ້ນຕໍ​ ທັງ​ເປັນ​ເປົ້າໝາຍ​ໃຈກາງ​ຂອງ​ການ​ບູລະນະ​ລະບອບ​ປະຊາທິປະ​ໄຕ​ປະຊາຊົນ ​ໃຫ້​ສົມບູນ​ຍິ່ງ​ຂຶ້ນ​ນັ້ນ ​ແມ່ນ​ຖື​ເອົາ​ການ​ສ້າງ ​ແລະ ປັບປຸງ​ຄຸນ​ນະພາ​ບກົງຈັກ​ການຈັດຕັ້ງຂອງ​ພັກ ຕິດ​ພັນ​ກັບ​ການ​ຫັນປ່ຽນ​ຢ່າງ​ແຂງ​ແຮງ​ຮອບດ້ານ ຂອງ​ກະ​ໂຕ​ສະມາຊິກ​ພັກ​ແຕ່​ລະສະ​ຫາຍ​ໃຫ້​ໄປ​ສູ່​ຄຸນ​ນະພາ​ບ​ໃໝ່​ຢ່າງ​ເປັນ​ຮູບ​ປະ​ທໍາ​ແທ້. ຢາກ​ເຮັດ​ໄດ້​ແນວ​ນັ້ນ, ພັກ​ເຮົາ​ຕ້ອງ​ສືບ​ຕໍ່​ຮຽນ​ຮູ້​ສິ່​ງ​ໃໝ່ໆ​ທາງ​ດ້ານ​ທິດ​ສະ​ດີ ​ແລະ ພຶດຕິ​ກໍາ​ຂອງ​ຍຸກ​ສະ​ໄໝ ທາງ​ດ້ານ​ວິທະຍາສາດ​ຂອງ​ການ​ນໍາພາ​ຂອງ​ພັກ, ຮູ້​ຫຼັກ​ວິທະຍາສາດ​ທາງ​ດ້ານ​ຫຼັກການ​ແຫ່ງ​ການ​ຄົງ​ຕົວ ​ແລະ ຂະຫຍາຍຕົວ​ຂອງ​ປະ​ເທດ​ເຮົາ, ຮຽນ​ຮູ້​ຄວາມ​ຜັນ​ແປ​ຂອງ​ສະພາບ​ການ​ຂອງ​ໂລກ ​ແລະ ການ​ຂະຫຍາຍຕົວ​ທີ່​ປ່ຽນ​ແປງ​ໄປ​ຕາມ​ຄວາມ​ຕ້ອງການຂອງ​ການ​ຊີ້ນໍາ-ນຳພາ​ທີ່​ມີ​ການ​ຂະຫຍາຍ​ຕົວຂອງ​ທິດ​ສະ​ດີ​ພື້ນຖານຂອງ​ລັດທິ​ມາກ-​ເລ​ນິນ ສົມທົບ​ກັບ​ແນວ​ຄິດ​ໄກສອນ ​ພົມວິຫານ ​ແລະ ພຶດຕິ​ກໍາ​ຕົວ​ຈິງ​ຂອງ​ພັກ​ເຮົາ ​ເພື່ອດຶງອອກ​ມາ​ໃຫ້​​ເປັນ​ແນວທາງ, ນະ​ໂຍບາຍ​ຂອງ​ພັກ ​ແຕ່ລະ​ໄລຍະ​ທີ່​ຖືກຕ້ອງ,​ ສອດຄ່ອງ ​ແລະ ​ເຫັນ​ເປັນ​ຕົນ​ເປັນ​ໂຕ​ອອກ​ມາ,​ ສາມາດ​ສໍາ​ພັດ​ໄດ້​ໃນ​ຂະ​ບວນວິວັດ​ແຫ່ງ​ການ​ນໍາພາ​ແຕ່ລະ​ໄລຍະ​ທີ່​ຖືກຕ້ອງ, ສອດຄ່ອງ ​ແລະ ສາມາດ​ໃຫ້​ເປັນ​ພັດທະນາ​ການ ທີ່​ສາມາດ​ຈັບບາຍ​ໄດ້​ຂອງ​ພັກ​ເຮົາ. ພັກ​ເຮົາ​ເດີນ​ຕາມ​ລັດທິ​ມາກ-​ເລ​ນິນ, ​ເຕີບໃຫຍ່​ຂຶ້ນ​ມາ ​ແລະ ນໍາພາ​ປະຊາຊົນ​ເຮົາ​ຕໍ່ສູ້​ກອບ​ກູ້​​ເອົາ​ເອກະລາດ, ອໍານາດ​ອະທິປະ​ໄຕ​ຂອງ​ຊາດ ​ແລະ ສືບ​ຕໍ່​ນໍາພາ ​ພາລະກິດປົກ​ປັກ​ຮັກສາ ​ແລະ ພັດທະນາ​ປະ​ເທດ​ຊາດ​ຈົນ​ເທົ່າ​ທຸກ​ວັນ​ນີ້. ພັກ​ປະຊາຊົນ​ປະຕິວັດ​ລາວ ອາດ​ຈະ​ມີ​ອັນ​ຄ້າຍຄື ​ແລະ ມີ​ອັນ​ແຕກ​ຕ່າງຈາກ​ພັກ​ກອມ​ມູນິດ ​ແລະ ພັກ​ກໍາມະກອນ​ຂອງ​ປະ​ເທດ​ອື່ນ, ​ແຕ່​ສິ່ງ​ສໍາຄັນ ພັກ​ເຮົາ​ໄດ້​ເຕີບ​ໃຫຍ່​ຂຶ້ນ​ດ້ວຍ​ທາດ​ແທ້​ອັນ​ບໍ່​ປ່ຽນ​ແປງ, ໜັກ​ແໜ້ນ​ຕໍ່​ຫຼັກການ​ພື້ນຖານ, ປັບປຸງ​ໃຫ້​ແທດ​ເໝາະ​ກັບ​ກາລະ​ເທສະ, ຄ່ອງ​ຕົວ​ທາງ​ດ້ານ​ການວາງ​ນະ​ໂຍບາຍ,​ ສະດຸ້ງ​ໄວ​ທາງ​ດ້ານ​ການ​ຊີ້​ນໍາ​ປະຕິບັດ, ຜ່ານ​ຜ່າ​ໄດ້​ທຸກ​ເຫດການ​ທີ່​ຫຼໍ່ແຫຼມ, ສັບ​ສົນ ທີ່​ກະທົບ​ຕໍ່​ລະບົບ​ແນວ​ຄິດ-ຈິດ​ໃຈ​ຂອງ​ພັກ. ການ​ຜ່ານ​ຜ່າ​ໄດ້, ຜ່ານ​ພົ້ນ​ໄດ້​ສິ່ງ​ຕ່າງໆ ທີ່​ກ່າວ​ມານັ້ນ, ຈຶ່ງ​ເຮັດ​ໃຫ້​ພັກ​ເຮົາ ຖືກ​ກຍອມຮັບ​ຈາກ​ປະຊາຊົນ, ​ເປັນ​ພັກ​ທີ່​ຍອມຮັບ​ຈາກ​ບັນດາ​ພັກ​ການ​ເມືອງ​ຂອງ​ໂລກ. ​ເພື່ອ​ປະຕິບັດ​ໃຫ້​ສໍາ​ເລັດ​ພາລະ​ໜ້າ​ທີ່​ອັນ​ມີ​ກຽດ,​ ໜັກໜ່ວງ ​ແລະ ທ້າ​ທາຍ ຂອງ​ການ​ປະຕິ​ບັດ​ມະຕິ​ກອງ​ປະຊຸມ​ໃຫຍ່ ຄັ້ງທີ XI ຂອງພັກເຮົາ, ຂ້າພະເຈົ້າຈຶ່ງຂໍມີຄໍາເຫັນເພີ່ມຕື່ມດັ່ງນີ້:

  1. ການຄົ້ນຄວ້າທິດສະດີ ແລະ ພືດຕິກໍາໃຫ້ແກ່ພັກ: ເພື່ອໃຫ້ເປັນຄັງສາງຂອງພັກເຮົາ, ເພື່ອນໍາມາເປັນທິດສະດີ,​ ເປັນແນວທາງປະຕິບັດໃຫ້ແກ່ພັກເຮົາ ແລະ ວາງບັນດາທິດນໍາຂອງພັກໃຫ້ຖືກຕ້ອງສອດຄ່ອງນັ້ນ, ການຄົ້ນຄວ້າວິທະຍາສາດ, ລັດຖະສາດການເມືອງ ເປັນເລື່ອງຈໍາເປັນພາວະວິໄສບໍ່ສາມາດຢຸດນິ້ງ ແລະ ບໍ່ໃຫ້ຂາດໄປໄດ້; ເລນິນໄດ້ເວົ້າວ່າ “ຮຽນແລ້ວຮຽນອີກ, ຮຽນເລື້ອຍໆໄປ”, ພວກເຮົາໄດ້ຮຽນ, ກໍາລັງຮຽນ ແລະ ຈະຮຽນ ຢ່າງບໍ່ຢຸດຢັ້ງ, ​ຮຽນນໍາພຶດຕິກໍາຕົວຈິງ, ຮຽນນໍາເພື່ອນມິດ, ຮຽນນໍາຕົນເອງ, ຮຽນນໍາປະຊາຊົນ ຢ່າງຕໍ່ເນື່ອງ ໂດຍສະເພາະວຽກງານຈັດຕັ້ງຂອງພັກເຮົາ ກໍ່ເຄີຍຮຽນຮູ້, ເຄີຍປັບປຸງ-ປ່ຽນແປງມາໂດຍຕະຫຼອດທຸກໆສະໄໝຂອງວິວັດທະນາການຂອງພັກເຮົາ ​ແຕ່​ທຽບ​ໃສ່​ຄວາມ​ຮຽກຮ້ອງ​ຕ້ອງການ ກໍ່​ເຫັນ​ວ່າ​ຍັງ​ໄກ​ຫຼາຍ, ​ທິດ​ສະ​ດີ​ໃໝ່ໆ ຍັງ​ບໍ່​ຫຼາຍ, ທຽບ​ໃສ່​ພັກ​ອ້າ​ນນ້ອງ ພວກ​ເຮົາ​ຕ້ອງ​ໄດ້​ບຸກບືນ​ຕື່ມ​ຫຼາຍ​ທີ່​ສຸດ ​ເພື່ອ​ຕອບ​ໂຈດ​ທີ່​ວ່າ: "ຖ້າ​ບໍ່​ມີ​ທິດ​ສະ​ດີ​ປະຕິວັດ ກໍ່​ຈະ​ບໍ່​ມີ​ຂະ​ບວນການ​ປະຕິວັດ" ດັ່ງນັ້ນ, ສະເໜີວ່າຄວນປັບປຸງບັນດາສະຖາບັນ, ໂຮງຮຽນການເມືອງ-ການປົກຄອງໃຫ້ມີຈຸດສຸມທາງດ້ານການຄົ້ນຄວ້າ, ວິໄຈ, ເພື່ອໃຫ້ສາມາດເຂົ້າສູ່ການນໍາໃຊ້ຢ່າງມີປະສິດທິຜົນ ແລະ ປະສິດທິພາບຢ່າງແທ້ຈິງ ແລະ ໃຫ້ທັນຍຸກສະໄໝ.
  2. ການປັບປຸງພັກດ້ານການຈັດຕັ້ງ: ການປັບປຸງພັກດ້ານການຈັດຕັ້ງໃຫ້ປອດໃສ, ເຂັ້ມແຂງ ແລະ ໜັກແໜ້ນນັ້ນ, ມັນເປັນທັງຄວາມຮຽກຮ້ອງຕ້ອງການພາວະວິໄສ, ເປັນທັງການເລັ່ງທວງຂອງສະຖານະການຄວາມຈໍາເປັນທີ່ແທ້ຈິງຂອງພັກ, ຂອງລັດ ແລະ ຂອງປະເທດຊາດ.... ວຽກນີ້ພວກເຮົາຈະຖືເປັນວຽກທໍາມະດາແມ່ນບໍ່ໄດ້,​ ເຮັດໄປຕາມເປັນຕາມເກີດ ຫຼື ໄປຕາມອັດທະຍາໄສ ຍິ່ງບໍ່ໄດ້. ບັນດາສະຫາຍຜູ້ນໍາຂອງທຸກຂັ້ນ, ຜູ້ຮັບຜິດຊອບວຽກງານຈັດຕັ້ງທຸກສະຫາຍ ຕ້ອງກວດກາຄືນບັນດາຈຸດອ່ອນ,​ ຂໍ້ບົກຜ່ອງຂອງວຽກງານນີ້ ຢ່າງມີຄວາມຮັບຜິດຊອບແທ້.... ຂ້າພະເຈົ້າເຫັນວ່າ: ມັນເຖິງເວລາແລ້ວ ບັນດາສະຫາຍການນໍາ, ບັນດາສະຫາຍທີ່ເຮັດວຽກງານຈັດຕັ້ງ ຕ້ອງເດັດດ່ຽວທັບມ້າງເພື່ອໃຫ້ບັນຫາທີ່ບໍ່ເພິ່ງປາຖະໜາທີ່ຕົກຄ້າງຢູ່ໃນພັກເຮົາ ໄດ້ຖືກແກ້ໄຂໃຫ້ຕົກໄປຍິ່ງໄວຍິ່ງດີ.
  3. ບັນຫາວຽກງານພະນັກງານ: ຍ້ອນ​ຮັບ​ຮູ້​ວ່າ​ບັນຫາ​ພະນັກງານ​ເປັນ​ບັນຫາ​ສໍາຄັນ,​ ພະນັກງານ​ແມ່ນ​ທັງ​ເປັນ​ກໍາລັງ​ແຮງ, ​ເປັນ​ຜູ້​ຕັດສິນ​ຊີ້​ຂາດ​ຜົນ​ສໍາ​ເລັດ ຫຼື ຄວາມ​ຫຼົ່ມ​ເຫຼວ ຂອງ​ວຽກ​ງານ, ​ດັ່ງນັ້ນ ສູນ​ກາງ​ພັກ ຈຶ່ງ​ຕົກ​ລົງ​ໃຫ້​ເອົາ​ວຽກ​ງານ​ເພີ່ມ​ທະວີ​ການ​ນໍາພາ​ຂອງ​ພັກ ​ເພື່ອ​ສ້າງ​ການ​ຫັນປ່ຽນ​ຢ່າງ​ແຂງ​ແຮງ ​ແລະ ​ເລິກ​ເຊິ່ງວຽກ​ງານ​ພະນັກງານ ​ເຂົ້າກອງ​ປະຊຸມ​ສະ​ໄມ​ວິສາມັນຂອງ​ຄະນະ​ບໍລິຫານ​ງານ​ສູນ​ກາງ​ພັກ  ​ແລະ ​ໄດ້​ອອກ​ເປັນ​ມະຕິ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ສະບັບ​ເລກທີ 04/ຄບສພ, ລົງ​ວັນ​ທີ 30 ກັນຍາ 2021. ພະນັກງານທຸກຄົນຂອງພວກເຮົາໃນທົ່ວປະເທດຫຼາຍຄົນກໍ່ມີຈຸດດີ-ຈຸດອ່ອນແຕກຕ່າງກັນ, ມີທັງຄົນດີ, ຄົນເດັ່ນ, ມີທັງຄົນຈົງຮັກພັກດີຕໍ່ຊາດ, ຕໍ່ພັກ, ​ມີນໍ້າໃຈເສຍສະຫຼະ ເພື່ອປະຊາຊົນຢ່າງບໍລິສຸດໃຈ, ມີຄົນເກັ່ງ, ມີຄວາມຮູ້ວິຊາ, ມີຄວາມກະຕືລືລົ້ນຕໍ່ໜ້າທີ່ວຽກງານ, ມີຄວາມອົດທົນຜ່ານຜ່າອຸປະສັກ ແລະ ຂໍ້ຫຍຸ້ງຍາກນາໆປະການ.... ຂ້າພະເຈົ້າສະເໜີວ່າ: ຂໍໃຫ້ພວກເຮົາພ້ອມກັນສົ່ງເສີມ,​ ໃຫ້ຄວາມເອົາໃຈໃສ່,​ ໃຫ້ມີການກໍ່ສ້າງ, ຍົກ ຍ້ອງຄວາມດີ,​ ສ້າງໂອກາດໃຫ້ຄົນທີ່ດີ, ຄົນເກັ່ງ, ມີຄວາມຮູ້ຄວາມສາມາດ ແລະ ມີຄຸນສົມບັດສິນທໍາປະຕິວັດ ໄດ້ຮັບໜ້າທີ່ວຽກງານສົມກັບຄຸນສົມບັດ, ຄຸນທາດ ແລະ ຄວາມຮູ້, ຄວາມສາມາດ, ຄວາມອົດທົນພະຍາຍາມຂອງເຂົາເຈົ້າ,​ ຢ່າກັ່ນແກ້ງ ແລະ ຢ່າມີອັກຄະຕິຕໍ່ເຂົາເຫຼົ່ານັ້ນ. ແຕ່ຖ້າຜູ້ໃດປະພຶດບໍ່ດີ, ຂາດຄຸນສົມບັດສິນທໍາປະຕິວັດ, ມີການກະທໍາທີ່ບໍ່ສົມເປັນພະນັກງານ,​ ມີຄວາມຄິດໂລບມາກ,​ ໂລພາ, ສໍ້ສົນ, ສ້າງກຸ່ມກ້ອນຂຶ້ນ ເພື່ອຫາຜົນປະໂຫຍດ,​ ມີພຶດຕິກໍາທີ່ບໍ່ເພິ່ງປາຖະໜາ, ​ແນວຄິດເອກະຊົນ, ​ເອກາທິປະໄຕ, ຂາດລະບຽບວິໄນ.... ຢ່າໃຫ້ເຂົ້າມາຢູ່ໃນຖັນແຖວການຈັດຕັ້ງ ຫຼື ເປັນຜູ້ມີອໍານາດໜ້າທີ່ໃນຖັນແຖວການຈັດຕັ້ງ.... ແນ່ນອນວ່າພະນັກງານເຮົາມີຜູ້ຜິດໜ້ອຍ,​ ຮູ້ເທົ່າບໍ່ເຖິງການ, ​ບໍ່ມີເຈດ ຕະນາ ກໍ່ໃຫ້ສຶກສາອົບຮົມກໍ່ສ້າງ, ​ແຕ່ຖ້າຫາກມີການກະທໍາໂດຍເຈດຕະນາ ແລະ ກະທໍາຜິດຫຼາຍຄັ້ງ, ບໍ່ປ່ຽນແປງ ກໍ່ຕ້ອງໄດ້ຮັບຜິດຊອບຕໍ່ຄວາມຜິດ.  ການຈັດຕັ້ງ, ການນໍາຂັ້ນນັ້ນໆ ກໍ່ຕ້ອງຮັບຜິດຊອບຕໍ່ສິ່ງດັ່ງກ່າວ, ຖ້າຫາກປະໄວ້ຈະເປັນພິດໄພຕໍ່ການຈັດຕັ້ງ ແລະ ຕໍ່ສັງຄົມ ກໍ່ຕ້ອງໄດ້ເດັດດ່ຽວແກ້ໄຂ.
  4. ພັກຊີ້ນໍາວຽກງານຈັດຕັ້ງ, ວຽກງານພະນັກງານໂດຍກົງ, ຮອບດ້ານ: ອົງການນໍາຂອງພັກທຸກຂັ້ນຕ້ອງຊີ້ນໍາໂດຍກົງ,​ ຮອບດ້ານໃນວຽກງານກໍ່ສ້າງພັກ,​ ກໍ່ສ້າງພະນັກງານ ແລະ ມີໜ້າທີ່ຊີ້ນໍາໂດຍກົງຕໍ່ການເຄື່ອນໄຫວຂອງອົງການຈັດຕັ້ງພັກ ແລະ ຕໍ່ການປັບປຸງ, ບັນຈຸ ສັບຊ້ອນພະນັກງານ ທີ່ຢູ່ໃນຄວາມຮັບຜິດຊອບຂອງຕົນ, ບໍ່ສາມາດປ່ອຍປະລະເລີຍ ແລະ ໂອນຖ່າຍວຽກນີ້ໃຫ້ຜູ້ອື່ນໄດ້. ການນໍາແຕ່ລະຂັ້ນ, ສະຫາຍເລຂາຄະນະພັກ, ຄະນະປະຈໍາພັກຂອງຄະນະພັກ ຕ້ອງຮັບຜິດຊອບຕໍ່ຜົນໄດ້ຜົນເສຍຂອງການເຄື່ອນໄຫວຂອງການຈັດຕັ້ງພັກ, ຂອງພະນັກງານທີ່ຢູ່ພາຍໃຕ້ການຄຸ້ມຄອງຂອງຕົນ, ບໍ່ອະນຸຍາດໃຫ້ໂຍນຄວາມຮັບຜິດຊອບໃຫ້ຄົນອື່ນໄດ້. ສະຫາຍ​ເລຂາ​ຄະນະ​ພັກ​ຢູ່​ແຕ່​ລະ​ບ່ອນ ຕ້ອງ​ຊີ້​ນໍາ​ຜູ້​ຮັບຜິດຊອບ​ວຽກ​ຈັດຕັ້ງຂອງ​ຕົນ​ໃນ​ການ​ປັບປຸງ​ກົງຈັກ, ສັບ​ຊ້ອນ​ຈັດ​ວາງ​ພະນັກງານ​ຕາມ​ລະບອບ​ແບບ​ແຜນ​ວິທີ​ເຮັດ​ວຽກ ທີ່​ມີ​ປະຊາທິປະ​ໄຕ​ລວມສູນ​ຢ່າງ​ເຄັ່ງ​ຄັດ. ຂ້າພະເຈົ້າສະເໜີໃຫ້ຄະນະຈັດຕັ້ງສູນກາງພັກ, ຄະນະໂຄສະນາອົບຮົມສູນກາງພັກ, ຄະນະກວດກາສູນກາງພັກ ມີການປະສານງານກັນ ແລະ ສ້າງລະບອບກົນໄກເຮັດວຽກຮ່ວມກັນ ເພື່ອເຮັດໃຫ້ວຽກງານຈັດຕັ້ງພະນັກງານກ້າວສູ່ການປັບປຸງປ່ຽນແປງທີ່ຕັ້ງໜ້າ.
  5. ສະເໜີໃຫ້ພາກສ່ວນທີ່ກ່ຽວຂ້ອງ ໂດຍສະເພາະຄະນະກໍາມະການແຂ່ງຂັນຮັກຊາດ ແລະ ພັດທະນາ ປັບປຸງພາລະບົດບາດ ແລະ ແບບແຜນວິທີປະຕິບັດວຽກງານແຂ່ງຂັນ-ຍ້ອງຍໍ ໃຫ້ມີການຫັນປ່ຽນໄປໃນທາງທີ່ດີຂື້ນ ການແຂ່ງຂັນ, ການຍ້ອງຍໍມີຄວາມສໍາຄັນ, ແຕ່ການທີ່ໄດ້ຮັບການຍ້ອງຍໍ,​ ໄດ້ຫຼຽນໄຊ,​ ໄດ້ຮັບນາມມະຍົດຕ່າງໆນັ້ນ, ຕ້ອງໃຫ້ສົມກຽດ,​ ສົມສັກສີຢ່າງແທ້ຈິງ.

     ສິ່ງທີ່ກ່າວມາທັງໝົດນັ້ນ, ຄືບາງຄໍາຄິດຄໍາເຫັນ ແນ່ນອນວ່າໃນເວລາຈັດຕັ້ງປະຕິບັດຕົວຈິງ ນອກຈາກບັນດາບັນ ຫາພື້ນຖານທີ່ຍົກຂຶ້ນໃນບົດລາຍງານຂອງຄະນະຈັດຕັ້ງສູນກາງພັກ, ກະຊວງພາຍໃນ ກໍ່ຄືໃນບົດຄວາມເຫັນຂອງບັນດາສະຫາຍຜູ້ແທນ ແລະ ບັນຫາທີ່ຂ້າພະເຈົ້າໄດ້ຍົກຂຶ້ນມາຂ້າງເທິງ ກໍ່ອາດຈະຍັງມີອີກຫຼາຍບັນຫາທີ່ຈະເກີດຂຶ້ນຕື່ມ ເຊິ່ງຂ້າພະເຈົ້າເຊື່ອໝັ້ນວ່າ ຄະນະພັກແຕ່ລະຂັ້ນ ກໍ່ຄືຜູ້ທີ່ເຮັດວຽກງານຈັດຕັ້ງຈະສືບຕໍ່ຄົ້ນຄວ້າ, ວິໄຈ, ສະຫຼຸບ, ​ຖອດຖອນບົດຮຽນເພື່ອປັບປຸງວຽກງານນີ້ໃຫ້ມີການຫັນປ່ຽນຢ່າງແຂງແຮງ, ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

ພາບ: ນັກຂ່າວສື່ກໍ່ສ້າງພັກ