ໂດຍ: ສ. ສົດໃສ
ປະຕິບັດຕາມແຜນການບຳລຸງ-ກໍ່ສ້າງພະນັກງານນຳພາ-ຄຸ້ມຄອງຂອງຄະນະຈັດຕັ້ງສູນກາງພັກ ເພື່ອຍົກສູງ ຄວາມຮູ້-ຄວາມສາມາດຂອງພະນັກງານຂັ້ນນຳພາ-ຄຸ້ມຄອງ ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານໃນຕໍ່ໜ້າ; ໃນລະຫວ່າງວັນທີ 26-29 ມັງກອນ 2021 ຄະນະຈັດຕັ້ງສູນກາງພັກ ໄດ້ຈັດຊຸດຝຶກອົບຮົມ ການບໍລິຫານລັດລະບົບຫຼັກສູດພະນັກງານນຳພາ-ຄຸ້ມຄອງລະດັບກາງ ໂດຍການເປັນປະທານຂອງທ່ານ ນາງ ວິໄລວັນ ເພັງສະຫວັດ ຄະນະພັກ ຫົວໜ້າກົມຈັດຕັ້ງພະນັກງານ ຄະນະຈັດຕັ້ງສູນກາງພັກ, ມີທ່ານ ປອ ນາງ ຈັນທາ ອ່ອນໄຊວຽງ ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນ, ມີນັກວິທະຍາກອນຈາກສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນຈຳນວນໜຶ່ງ ພ້ອມດ້ວຍສຳມະນາກອນ 37 ສະຫາຍ ຍິງ 17 ສະຫາຍ ຈາກຄະນະຈັດຕັ້ງສູນກາງພັກເຂົ້າຮ່ວມ.
ຊຸດຝຶກອົບຮົມຄັ້ງນີ້ ໃຊ້ເວລາ 4 ວັນ ຮຽນ 7 ວິຊາຄື: ວຽກງານການບໍລິຫານຄຸ້ມຄອງລັດ, ການນຳພາ ແລະ ການຄຸ້ມຄອງ, ການວາງແຜນຍຸດທະສາດ, ຈັນຍາບັນ ແລະ ຄ່ານິຍົມ, ການບໍລິຫານການປ່ຽນແປງເພື່ອຄວາມກ້າວໜ້າ, ການບໍລິຫານອົງການ ແລະ ການຮ່າງເອກະສານທາງລັດຖະການ.
ເພື່ອເຮັດໃຫ້ຊຸດຝຶກອົບຮົມຄັ້ງນີ້ ມີຜົນສຳເລັດຕາມຈຸດປະສົງ ທ່ານ ນາງ ວິໄລວັນ ເພັງສະຫວັດ ໄດ້ຮຽກຮ້ອງມາຍັງສຳມະນາກອນ ແລະ ຄະນະຮັບຜິດຊອບກ່ຽວຂ້ອງ ມີຄວາມຮັບຜິດຊອບສູງຕໍ່ໜ້າທີ່ທີ່ໄດ້ຮັບມອບໝາຍໃນຊຸດຝຶກອົບຮົມຄັ້ງນີ້ ໂດຍສະເພາະແມ່ນສຳມະນາກອນ ຈົ່ງພ້ອມກັນເອົາໃຈໃສ່ຮັບຟັງການນຳສະເໜີບົດຮຽນຂອງຄູຝຶກ, ຄົ້ນຄວ້າ ແລະ ໃສ່ໃຈການບັນຍາຍຂອງວິທະຍາກອນ, ນຳເອົາປະສົບການວຽກງານຕົວຈິງທີ່ຜ່ານມາສົມທຽບກັບທິດສະດີ, ມີບັນຫາໃດບໍ່ຈະແຈ້ງ ຍັງບໍ່ທັນເຂົ້າໃຈເລິກເຊິ່ງ ຕ້ອງກ້າຕັ້ງຄຳຖາມແລກປ່ຽນນຳຄູຝຶກ ແລະ ສຳມະນາກອນດ້ວຍກັນ ຢ່າງສ້າງສັນ-ກົງໄປກົງມາ ເພື່ອຄວາມເຂົ້າໃຈ ແລະ ສາມາດນຳໄປໝູນໃຊ້ເຂົ້າໃນວຽກງານຕົວຈິງໃຫ້ບັນລຸຜົນ…ຯ
