ໂດຍ: ສໍສົດໃສ
ພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວ ແລະກອງປະຊຸມວຽກງານຈັດຕັ້ງທົ່ວປະເທດຄັ້ງທີ X ໄດ້ສຳເລັດຄະນະຈັດຕັ້ງສູນກາງພັກ, ບັນດາແຂວງ, ກະຊວງ-ອົງການກໍພ້ອມພາກັນຜັນຂະຫຍາຍເນື້ອໃນຂອງກອງປະຊຸມດັ່ງກ່າວລົງສູ່ຮາກຖານໃນທົ່ວປະເທດ.
ເຊັ່ນດຽວກັນ ໃນລະຫວ່າງວັນທີ 23-24 ມັງກອນ 2017 ແຂວງສະຫວັນນະເຂດ ໄດ້ຈັດກອງປະຊຸມເຜີຍແຜ່ເນື້ອໃນກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ແລະ ສະຫຼຸບວຽກງານຈັດຕັ້ງທົ່ວແຂວງສະຫວັນນະເຂດ 5 ປີຄັ້ງທີ VI ແລະວາງທິດທາງແຜນການໃນ 5 ປີຕໍ່ໜ້າໃຫ້ສອດຄ່ອງກັບທິດ ຊີ້ນຳລວມຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ແລະກອງປະຊຸມວຽກງານຈັດຕັ້ງທົ່ວປະເທດຄັ້ງທີ X.ເປັນກຽດເຂົ້າຮ່ວມກອງປະຊຸມຄັ້ງນີ້ມີສະຫາຍຈັນສີ ໂພສີຄຳກຳມະການກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ, ເປັນປະທານກອງປະຊຸມໂດຍສະຫາຍສັນຕິພາບພົມວິຫານກຳມະການສູນກາງພັກ ເລຂາຄະນະບໍລິຫານງານພັກແຂວງສະຫວັນນະເຂດ,ມີບັນດາສະຫາຍຄະນະປະຈຳພັກແຂວງ, ກຳມະການພັກແຂວງ,ຄະນະພັກຮາກຖານ, ເລຂາໜ່ວຍພັກຮາກຖານ, ຫົວໜ້າພະແນກການ ແລະອົງການທຽບເທົ່າອ້ອມຂ້າງແຂວງ, ຫົວໜ້າຄະນະຈັດຕັ້ງເມືອງ ແລະຜູ້ເຮັດວຽກງານຈັດຕັ້ງໃນທົ່ວແຂວງເຂົ້າຮ່ວມຈຳນວນ 100 ກວ່າສະຫາຍ.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງບົດລາຍງານກ່ຽວກັບວຽກງານຈັດຕັ້ງທົ່ວປະເທດ ຄັ້ງທີ X, ບົດໂອ້ລົມຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X, ບົດລາຍງານວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວແຂວງສະຫວັນນະເຂດ ໄລຍະ 5 ປີ (2011-2015) ແລະ ທິດທາງແຜນການ 2016-2020 ພ້ອມນີ້ຜູ້ເຂົ້າຮ່ວມກໍ່ໄດ້ປະກອບຄຳເຫັນຢ່າງກົງໄປກົງມາຕໍ່ການຕີລາຄາລວມວຽກງານຈັດ ຕັ້ງທົ່ວແຂວງໃນໄລຍະ 5 ປີຜ່ານມາ, ຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ ແລະ ສະເໜີວິທີການ ແກ້ໄຂໃນຕໍ່ໜ້າເຮັດໃຫ້ກອງປະຊຸມມີບັນຍາກາດຟົດຟື້ນ ແລະ ມີເນື້ອໃນອຸດົມສົມບູນດີ.
ຜ່ານການຕີລາຄາວຽກງານຈັດຕັ້ງທົ່ວແຂວງສະຫວັນນະເຂດ 5 ປີຜ່ານມາເຫັນວ່າຄະນະພັກທຸກຂັ້ນ ໄດ້ເອົາໃຈໃສ່ເຮັດວຽກງານການເມືອງ-ແນວຄິດເປັນວຽກແຖວໜ້າ, ເປັນວຽກກົກ ແລະ ເປັນສ່ວນສຳຄັນຂອງວຽກງານກໍ່ສ້າງພັກ-ພະນັກງານ, ຄະນະພັກໄດ້ຍົກສູງທັດສະນະຫຼັກໝັ້ນ, ອຸດົມການ, ທາດແທ້ຊົນຊັ້ນລັກສະນະນຳໜ້າ ແລະ ລັກສະນະຕໍ່ສູ້ຂອງພັກ, ຕ້ານກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ, ຕ້ານທຸກປະກົດການຫຍໍ້ທໍ້ ເຮັດໃຫ້ພະນັກງານ, ສະມາຊິກພັກ ມີຄວາມເປັນເອກະພາບ ແລະ ເຄື່ອນໄຫວວຽກງານໄປຕາມທິດຊີ້ນຳລວມຂອງພັກກໍ່ຄືໜ້າທີ່ການເມືອງທີ່ຕົນຮັບຜິດຊອບ ແນໃສ່ກໍ່ສ້າງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ.
ປະຈຸບັນ ທົ່ວແຂວງສະຫວັນນະເຂດມີພະນັກງານ-ລັດຖະກອນ ທັງໝົດ 17.000 ກວ່າຄົນ, ຍິງ 8.000 ກວ່າຄົນ, ມີສະມາຊິກພັກ 24.000 ກວ່າສະຫາຍ, ຍິງ 6.000 ກວ່າສະຫາຍ, ໃນນີ້ມີສະມາຊິກພັກແຂງຮອບດ້ານ 6.500ກວ່າສະຫາຍ, ສະມາຊິກພັກແຂງດ້ານໃດໜຶ່ງ 11.000ກວ່າສະຫາຍ, ໄດ້ອອກບັດ-ມອບບັດໃຫ້ສະມາຊິກພັກສົມບູນແລ້ວເກືອບ 8 ພັນສະຫາຍ, ເທົ່າກັບ 32% ຂອງຈຳນວນສະມາຊິກພັກສົມບູນທັງໝົດ, ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານໄດ້ 766 ໜ່ວຍ ກວມເອົາ 46% ຂອງໜ່ວຍພັກທັງໝົດ 1.659 ໜ່ວຍ.
ໃນໂອກາດເຂົ້າຮ່ວມຊີ້ນຳກອງປະຊຸມຄັ້ງນີ້ສະຫາຍ ຈັນສີ ໂພສີຄຳ ກໍໄດ້ຕັ້ງບັນຫາ ແລະ ມີການຖາມ-ຕອບແລກປ່ຽນບົດຮຽນກັບຜູ້ຮັບຜິດຊອບແຕ່ລະວຽກຢ່າງລະອຽດຈະແຈ້ງ ພ້ອມທັງມີຄຳເຫັນໂອ້ລົມໃຫ້ທິດຊີ້ນຳໃນການກໍ່ສ້າງພັກທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນຳພາຂອງພັກໃຫ້ຮັບປະກັນໄດ້ການນຳພາຂອງພັກຢ່າງມີຄຸນນະພາບ ເຮັດໃຫ້ການຈັດຕັ້ງປະຕິບັດຖືກຕ້ອງ ແລະ ເປັນເອກະພາດກັນໃນທົ່ວພັກ, ເພີ່ມທະວີຄວາມເປັນເຈົ້າໃນການສ້າງແຜນການເຄື່ອນໄຫວກວດກາ, ຕິດຕາມ, ຊຸກຍູ້ການເຄື່ອນໄຫວປະຕິບັດບົດບາດໜ້າທີ່ຂອງບັນດາການຈັດຕັ້ງພັກໃຫ້ມີບາດກ້າວທີ່ຕັ້ງໜ້າ ກວ່າເກົ່າ, ສອດຄ່ອງ ແລະ ເໝາະສົມກັບການພັດທະນາຂອງຍຸກສະໄໝຕໍ່ໜ້າທີ່ການເມືອງໃນແຕ່ລະ ໄລຍະ...
