ໃນວັນທີ 14 ມັງກອນ 2019 ທີ່ສະໂມສອນຂອງຄະນະຈັດຕັ້ງສູນກາງພັກ ໄດ້ຈັດພິທີປາຖະກະຖາມູນເຊື້ອກອງທັບປະຊາຊົນລາວ ເພື່ອຮ່ວມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ 20 ມັງກອນ 1949 - 20 ມັງກອນ 2019 ເພື່ອໃຫ້ສະມາຊິກພັກ ແລະ ພະນັກງານ-ລັດຖະກອນທີ່ເກີດໃໝ່ໃຫຍ່ລຸນໄດ້ເຊື່ອມຊຶມ ແລະ ເຂົ້າໃຈມູນເຊື້ອປະຫວັດຄວາມເປັນມາພ້ອມທັງຜົນງານ ແລະ ຄວາມເຕີບໃຫຍ່ເຂັ້ມແຂງຂອງກອງທັບປະຊາຊົນລາວນັບແຕ່ມື້ສ້າງຕັ້ງມາເຖິງປະຈຸບັນ.
ເຂົ້າຮ່ວມໃນພິທີ ມີສະຫາຍ ວັນໄຊ ພອງສະຫວັນ ຮອງເລຂາ, ຮອງຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຄະນະພັກ ຄຈສພ, ຫົວໜ້າກົມ, ຮອງຫົວໜ້າກົມ ພ້ອມດ້ວຍພະນັກງານ-ລັດຖະກອນ ທົ່ວສຳນັກງານຄະນະຈັດຕັ້ງສູນກາງພັກເຂົ້າຮ່ວມຢ່າງພ້ອມພຽງ; ໃຫ້ກຽດປາຖະກະຖາເລົ່າມູນເຊື້ອ ໂດຍສະຫາຍ ແສງທອງ ດວງບັນດິດ ຄະນະພັກ ຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ, ຫົວໜ້າກົມໂຄສະນາອົບຮົມ.
ເນື້ອໃນປາຖະກະຖາໄດ້ເວົ້າເຖິງເງື່ອນໄຂທີ່ພາໃຫ້ເກີດມີກອງທັບປະຊາຊົນລາວຕິດພັນກັບມູນເຊື້ອການຕໍ່ສູ້ເຕີບໃຫຍ່ເຂັ້ມແຂງຂອງກອງທັບ, ການຕໍ່ສູ້ຕ້ານກັບສັດຕູຜູ້ຮຸກຮານໃນແຕ່ລະໄລຍະ, ການຕໍ່ສູ້ກັບສະພາບການພັດທະນາໃນໄລຍະໃໝ່ ແລະ ສັງລວມຜົນງານຂອງກອງທັບນັບແຕ່ມື້ສ້າງຕັ້ງມາຈົນເຖິງປະຈຸບັນ. ກອງທັບປະຊາຊົນລາວ ສ້າງຕັ້ງຂຶ້ນຕາມຄວາມຮຽກຮ້ອງຕ້ອງການຂອງຊົນຊັ້ນກໍາມະກອນ ແລະ ໜ້າທີ່ການເມືອງຂອງພັກປະຊາຊົນປະຕິວັດລາວ ທີ່ເປັນຕົວແທນແຫ່ງສິດຜົນປະໂຫຍດຂອງຊົນຊັ້ນກໍາມະກອນ, ກອງທັບປະຊາຊົນລາວແມ່ນກອງທັບຂອງປະຊາຊົນ ມາຈາກປະຊາຊົນ ຕໍ່ສູ້ເພື່ອນຳເອົາເອກະລາດ ອຳນາດອະທິປະໄຕມາໃຫ້ປະຊາຊົນ ທັງຕໍ່ສູ້ທັງປັບປຸງກຳລັງຂອງຕົນໃນແຕ່ລະບັ້ນຮົບ ຍິ່ງຕໍ່ສູ້ຍິ່ງນັບມື້ ເຕີບໃຫຍ່ເຂັ້ມແຂງ, ຍາມບ້ານເມືອງມີຄວາມສະຫງົບກໍ່ພ້ອມກັນເພີ່ມພູນຜະລິດຜົນ.
ກອງທັບປະຊາຊົນລາວ ມີນ້ຳໃຈຮັກຊາດ ອົງອາດກ້າແກ່ນ ເດັດດ່ຽວໜຽວແໜ້ນ ມິໄຫວພິບ ເດັດຂາດບໍ່ຍອມຈຳນົນ, ຈົງຮັກພັກດີຕໍ່ພັກ ຕໍ່ປະເທດຊາດ ແລະ ປະຊາຊົນ, ກຽມພ້ອມທຸກສະຖານະການ ປະກອບສ່ວນເຂົ້າໃນ 2 ໜ້າທີ່ຍຸດທະສາດ ປົກປັກຮັກສາໝາກຜົນຂອງການປະຕິວັດ, ພັດທະນາກຳລັງ ຂອງຕົນ ກໍ່ຄືປະເທດຊາດຕາມອຸດົມການສັງຄົມນິຍົມ ພາຍໃຕ້ການຊີ້ນຳ-ນຳພາຮອບດ້ານເດັດຂາດໂດຍ ກົງຂອງພັກປະຊາຊົນປະຕິວັດລາວ; ກອງທັບປະຊາຊົນລາວເປັນກອງທັບວິລະຊົນ ໄດ້ຮັບຫຼຽນຄຳສູງສຸດ ຂອງຊາດ 5 ຫຼຽນຄຳ, ກອງພົນວິລະຊົນ 1 ກອງພົນ, ກອງພັນວິລະຊົນ 7 ກອງພັນ, ກອງຮ້ອຍວິລະ ຊົນ 37 ກອງຮ້ອຍ, ວິລະຊົນແຫ່ງຊາດ 60 ສະຫາຍ, ນັກຮົບແຂ່ງຂັນ 300 ກວ່າສະຫາຍ; ນອກຈາກນີ້ ຍັງມີກົມກອງວິລະຊົນຫຼາຍກົມກອງ, ແຂວງວິລະຊົນຫຼາຍແຂວງ, ເມືອງວິລະຊົນຫຼາຍເມືອງ ແລະ ບ້ານວິ ລະຊົນຫຼາຍບ້ານຕື່ມອີກ.
ພາຍຫຼັງປາຖະກະຖາເລົ່າມູນເຊື້ອວັນສ້າງຕັ້ງກອງທັບແລ້ວ ໄດ້ຈັດພິທີປະດັບຫຼຽນກາລະນຶກໃຫ້ພະ ນັກງານອະດີດນາຍທະຫານທີ່ຍົກຍ້າຍຈາກກອງທັບມາຢູ່ຄະນະຈັດຕັ້ງສູນກາງພັກ ໄດ້ຮັບຫຼຽນກາລະນຶກ ຕາມມາດຖານ-ເງື່ອນໄຂທີ່ກຳນົດໄວ້ 12 ສະຫາຍ ແລະ ຫຼຽນກາລະນຶກວັນສ້າງຕັ້ງເມືອງວຽງໄຊ ຄົບຮອບ 50 ປີ ໃຫ້ຜູ້ມີຜົນງານ ແລະ ຄຸນງາມຄວາມດີປະກອບສ່ວນເຂົ້າໃນການພັດທະນາເມືອງວຽງໄຊ ໃນໄລຍະຜ່ານມາ ຈຳນວນ 11 ສະຫາຍ.
ໂດຍ: ຄອນຄຳ ໂສລັດຕະນະວົງ
