ເພື່ອຕິດຕາມຊຸກຍູ້ວຽກງານຈັດຕັ້ງ, ກໍ່ສ້າງພັກ-ພະນັກງານ ຢູ່ບັນດາແຂວງໃນທົ່ວປະເທດ, ໃນລະຫວ່າງວັນທີ 12-13 ພະຈິກ 2018 ສະຫາຍ ຈັນສີ ໂພສີຄຳ ກຳມະການກົມ ການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວຊີ້ນຳ ແລະ ເກັບກຳສະພາບວຽກງານຈັດຕັ້ງ, ກໍ່ສ້າງພັກ-ພະນັກງານຢູ່ແຂວງໄຊສົມບູນ ເຊິ່ງ ໄດ້ເຮັດວຽກຢູ່ 3 ຈຸດໃຫຍ່ ຄື: ເທດສະບານແຂວງ ແລະ 2 ເມືອງ ຄື: ເມືອງທ່າໂທມ ແລະ ເມືອງລ້ອງແຈ້ງ.
ໃນຕອນເຊົ້າຂອງມື້ທຳອິດ ໄດ້ເຮັດວຽກຢູ່ສຳນັກງານປົກຄອງເມືອງທ່າໂທມ ໃຫ້ການ ຕ້ອນຮັບຢ່າງອົບອຸ່ນຈາກສະຫາຍ ພິມພາ ນິລາວົງ ກຳມະການພັກແຂວງໄຊສົມບູນ, ເລຂາ ພັກເມືອງ ເຈົ້າເມືອງທ່າໂທມ ພ້ອມດ້ວຍຄະນະ; ໃນໂອກາດເຮັດວຽກຢູ່ເມືອງດັ່ງກ່າວສະຫາຍ ຈັນສີ ໂພສີຄຳ ໄດ້ຮັບຟັງການລາຍງານການຈັດຕັ້ງປະຕິບັດວຽກງານຮອບດ້ານຂອງເມືອງທ່າໂທມ ແລະ ມີທິດຊີ້ນຳຕໍ່ເມືອງດັ່ງກ່າວ.
ເມືອງທ່າໂທມ ເປັນເມືອງພູດອຍ ກວມ 75% ຂອງເນື້ອທີ່ທັງໝົດ, ຊຶ່ງເໝາະແກ່ການປູກຝັງ-ລ້ຽງສັດ, ການກໍ່ສ້າງເຂື່ອນໄຟຟ້ານ້ຳຕົກ, ການບໍລິການທາງຜ່ານ ແລະ ການທ່ອງທ່ຽວ; ເປັນເມືອງທີ່ແຍກອອກຈາກເມືອງໝອກໃໝ່ ແຂວງຊຽງຂວາງ ຂຶ້ນກັບເຂດພິເສດ ໄຊສົມບູນ ປີ 1994 – 2006 ແລະ ໄດ້ໂອນຄືນມາຂຶ້ນກັບແຂວງຊຽງຂວາງອີກໃນປີ 2007–2013, ຮອດປີ 2014 ເປັນຕົ້ນມາ ໄດ້ແຍກອອກຈາກແຂວງຊຽງຂວາງ ມາຂຶ້ນກັບ ແຂວງໄຊສົມບູນຈົນເຖິງປະຈຸບັນ.
ເມືອງທ່າໂທມປະກອບມີ 4 ກຸ່ມບ້ານ, ມີ 26 ບ້ານ, 3.700 ກວ່າຄົວເຮືອນ, ພົນລະເມືອງ 22.000 ກວ່າຄົນ, ຍິງ 10.000 ກວ່າຄົນ; ເມືອງໄດ້ກຳນົດສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດຢູ່ 3 ກຸ່ມບ້ານຄື: ກຸ່ມບ້ານທ່າວຽງ, ກຸ່ມບ້ານປາກຍອງ ແລະ ກຸ່ມບ້ານຍາມ; ລວມຍອດຜະລິດຕະພັນພາຍໃນຂອງເມືອງ ປະຕິບັດໄດ້ 155,35 ຕື້ກີບ ສະເລ່ຍ ລາຍຮັບຕໍ່ຫົວຄົນໄດ້ປະມານ 7 ລ້ານກວ່າກີບ/ຄົນ/ປີ ຫຼື ເທົ່າກັບ 900 ກວ່າໂດລາສະຫະ ລັດ/ຄົນ/ປີ;
ຄະນະບໍລິຫານງານພັກເມືອງມີ 19 ສະຫາຍ, ມີ 8 ຄະນະພັກຮາກຖານ, ມີ 61 ໜ່ວຍພັກ, ມີສະມາຊິກພັກທັງໝົດ 1.000 ກວ່າສະຫາຍ, ໜ່ວຍພັກທີ່ຮັບຮອງ ແລະ ປະ ກາດເປັນໜ່ວຍພັກເຂັ້ມແຂງ-ຮູ້ນຳພາຮອບດ້ານ ໃນປີ 2017 ໄດ້ 51 ໜ່ວຍພັກ ເທົ່າກັບ 83% ທຽບໃສ່ແຜນການ 5 ປີ ລື່ນຄາດໝາຍ 3%, ພ້ອມນີ້ກໍ່ໄດ້ກຳນົດຕຳແໜ່ງງານພະນັກ ງານນຳພາ-ຄຸ້ມຄອງ ເພື່ອກະກຽມບຸກຄະລາກອນໃຫ້ແກ່ກອງປະຊຸມໃຫຍ່ຂອງອົງຄະນະພັກເມືອງ ຄັ້ງທີ V ສຳເລັດ.
ໃນຕອນບ່າຍຂອງວັນດຽວກັນ ສະຫາຍ ຈັນສີ ໂພສີຄຳ ພ້ອມດ້ວຍຄະນະ ໄດ້ເຄື່ອນ ໄຫວເຮັດວຽກຢູ່ເມືອງລ້ອງແຈ້ງ ແຂວງໄຊສົມບູນ ໂດຍການຕ້ອນຮັບຂອງສະຫາຍ ແຮ ວົງສຸວັດ ກຳມະການພັກແຂວງ, ເລຂາພັກເມືອງ ເຈົ້າເມືອງລ້ອງແຈ້ງ ພ້ອມດ້ວຍພະນັກງານຫຼັກແຫຼ່ງຂອງເມືອງ.
ເມືອງລ້ອງແຈ້ງ ມີພູມສັນຖານສູງຊັນ ກວມເອົາ 90% ຂອງເນື້ອທີ່ທັງໝົດ, ມີສາຍນ້ຳຫຼາຍສາຍໄຫຼຜ່ານເໝາະສົມແກ່ການຜະລິດກະສິກຳ ແລະ ການສ້າງເຂື່ອນໄຟຟ້ານ້ຳຕົກ. ເມືອງດັ່ງກ່າວມີທີ່ຕັ້ງຫ່າງຈາກສຳນັກງານປົກຄອງແຂວງໄຊສົມບູນ 73 ກິໂລແມັດ; ປະກອບ ມີ 3 ກຸ່ມບ້ານ, ມີທັງໝົດ 10 ບ້ານ, ມີ 1.800 ຄອບຄົວ, ມີພົນລະເມືອງທັງໝົດ 8.600 ຄົນ, ເສດຖະກິດໄດ້ມີການຂະຫຍາຍຕົວຢ່າງໝັ້ນທ່ຽງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນເທື່ອລະກ້າວ, ການເກັບລາຍຮັບເຂົ້າງົບປະມານຂອງເມືອງໃນໄລ ຍະ 10 ເດືອນທຳອິດຂອງປີ 2018 ປະຕິບັດໄດ້ 525 ລ້ານກວ່າກີບ ເທົ່າກັບ 80%, ທົ່ວເມືອງມີສະມາຊິກພັກທັງໝົດ 300 ກວ່າສະຫາຍ, ມີພະນັກງານ-ລັດຖະກອນທັງໝົດ 280 ຄົນ.
ພາຍຫຼັງເຄື່ອນໄຫວເຮັດວຽກຢູ່ 2 ເມືອງດັ່ງກ່າວແລ້ວ ຄະນະໄດ້ສືບຕໍ່ເດີນທາງເຮັດ ວຽກຢູ່ເທດສະບານແຂວງໄຊສົມບູນ ດ້ວຍການຕ້ອນຮັບຂອງສະຫາຍ ປອ ພົຕ ທອງລອຍ ສີລິວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍການນຳ ຫຼັກແຫຼ່ງຂອງແຂວງ.
ໃນວັນທີ 13 ພະຈິກ 2018 ສະຫາຍ ຈັນສີ ໂພສີຄຳ ພ້ອມດ້ວຍຄະນະ ໄດ້ເຂົ້າຮ່ວມຮັບຟັງການລາຍງານບາງວຽກງານທີ່ພົ້ນເດັ່ນໃນການຊີ້ນຳ-ນຳພາ ພັດທະນາຮອບ ດ້ານຂອງແຂວງໄຊສົມບູນ ແລະ ທິດທາງຈຸດສຸມໃນຕໍ່ໜ້າ; ຕະຫຼອດໄລຍະຊຸມປີທີ່ຜ່ານມາ ອົງຄະນະພັກ, ອົງການປົກຄອງແຂວງໄຊສົມບູນ ໄດ້ມີຄວາມພະຍາຍາມຢ່າງຕັ້ງໜ້າ ໃນການນຳພາປົກປັກຮັກສາ ແລະ ພັດທະນາແຂວງຂອງຕົນ ສຸມໃສ່ຈັດຕັ້ງຜັນຂະຫຍາຍປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ແຫ່ງລັດ ຄັ້ງທີ VIII, ມະຕິກອງປະຊຸມຕົວແທນສະມາຊິກພັກ ແລະ ແຜນພັດທະນາເສດຖະກິດ-ສັງຄົມແຂວງໄຊສົມບູນ ໄລຍະ 5 ປີ (2016-2020).
ປະຈຸບັນ ແຂວງໄຊສົມບູນ ໄດ້ມີບາດລ້ຽວຫັນປ່ຽນໃໝ່ຢ່າງຕັ້ງໜ້າ ແຂວງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ; ເສດຖະກິດໄດ້ຮັບການພັດທະນາຂະຫຍາຍຕົວດີຂຶ້ນເທື່ອລະກ້າວ, ສະແດງອອກການເຕີບໂຕຂອງເສດຖະກິດຢູ່ໃນລະດັບ 7-8%, ລວມຍອດຜະລິດຕະພັນພາຍໃນ ບັນລຸໄດ້ 900 ກວ່າຕື້ກີບ, ລາຍໄດ້ສະເລ່ຍຕໍ່ຫົວຄົນ 10 ລ້ານກວ່າກີບ/ຄົນ/ປີ ຫຼື ເທົ່າກັບ 1.200 ໂດລາສະຫະລັດ/ຄົນ/ປີ.
ການພັດທະນາກຸ່ມບ້ານ, ພັດທະນາຊົນນະບົດ, ລຶບລ້າງຄວາມທຸກຍາກຂອງປະຊາ ຊົນ ໄດ້ຮັບການແກ້ໄຂດີຂຶ້ນເປັນລຳດັບ ທົ່ວແຂວງຍັງມີ 12 ບ້ານທຸກຍາກ, ຄອບຄົວທຸກຍາກ 1.300 ຄອບຄົວ ເທົ່າກັບ 9% ຂອງຄອບຄົວທັງໝົດ.
ແຂວງໄຊສົມບູນ ປະກອບມີ 5 ເມືອງ, ມີ 89 ບ້ານ, 17 ກຸ່ມບ້ານ, 14.000 ຄອບຄົວ, ມີປະຊາກອນ 90.000 ກວ່າຄົນ. ທົ່ວແຂວງມີ 266 ໜ່ວຍພັກ, ມີສະມາຊິກພັກທັງໝົດ 3.600 ສະຫາຍ, ພະນັກງານ-ລັດຖະກອນທັງໝົດ 2.800 ຄົນ. ການຊຸກຍູ້ສົ່ງເສີມຜະລິດເປັນສິນຄ້າຂອງປະຊາຊົນຕາມທ່າແຮງແຕ່ລະເມືອງ ສ່ວນໃຫຍ່ແມ່ນການຜະລິດກະສິ ກຳເປັນສິນຄ້າ ເຊັ່ນ: ການປູກເຂົ້າ, ສາລີ, ມັນຕົ້ນ, ໝາກນັດ, ໝາກກ້ຽງ, ພືດຜັກ, ຢາງ ພາລາ, ລ້ຽງສັດ ປະເພດງົວ, ຄວາຍ, ໝູ ແລະ ສັດປີກ.
ໃນການເຄື່ອນໄຫວຢ້ຽມຢາມ-ເຮັດວຽກຢູ່ແຕ່ລະບ່ອນ ສະຫາຍ ຈັນສີ ໂພສີຄຳ ໄດ້ມີ ຄຳ ເຫັນໂອ້ລົມ ຊີ້ນຳວຽກງານຈັດຕັ້ງ, ກໍ່ສ້າງພັກ-ພະນັກງານ ໂດຍສະເພາະການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນຫຼວງ; ອົງຄະນະພັກເມືອງ-ນະຄອນ ແລະ ຮາກ ຖານພັກໃນທົ່ວປະເທດ ໂດຍມີການຖາມ-ຕອບແລກປ່ຽນບົດຮຽນຈາກສະຫາຍຜູ້ຮັບຜິດຊອບວຽກງານຈັດຕັ້ງ, ກໍ່ສ້າງພັກ-ພະນັກງານຂອງແຂວງ, ຂອງເມືອງຢູ່ແຕ່ລະບ່ອນຢ່າງກົງໄປກົງມາ ນອກນັ້ນ, ສະຫາຍໄດ້ເນັ້ນໜັກບາງບັນຫາທີ່ສຳຄັນຄື:
ໃນໂອກາດຢ້ຽມຢາມ ແລະ ເຮັດວຽກຢູ່ແຕ່ລະບ່ອນ ຄະນະໄດ້ນຳເຄື່ອງຄອມພິວເຕີ ພ້ອມດ້ວຍປິ້ນເຕີ ມອບໃຫ້ບ່ອນລະຊຸດ ເພື່ອນຳໃຊ້ເຂົ້າໃນການປະຕິບັດໜ້າທີ່ວຽກງານໃຫ້ມີ ຄວາມທັນສະໄໝວ່ອງໄວມີປະສິດທິຜົນກວ່າເກົ່າ.
ໂດຍ: ສໍສົດໃສ
