ບົນຈິດໃຈປ່ຽນແປງໃໝ່ໃນການພັດທະນາປະເທດຊາດ ແນໃສ່ຍົກລະດັບການເຕີບໃຫຍ່ ເຂັ້ມແຂງທາງດ້ານເສດຖະກິດ, ວັດທະນະທຳສັງຄົມກໍຄືລະດັບຊີວິດການເປັນຢູ່ດ້ານວັດຖຸ ແລະຈິດໃຈ ພວກເຮົາພວມເປີດກວ້າງການພົວພັນກັບສາກົນຢ່າງກວ້າງຂວາງ ໂດຍສະເພາະເຂົ້າຮ່ວມຂະບວນວິວັດແຫ່ງການເຊື່ອມໂຍງສາກົນຢ່າງເປັນເຈົ້າການ. ບົນຈິດໃຈດັ່ງກ່າວ, ມັນຮຽກຮ້ອງມາຍັງບັນດາອົງການ, ຂະແໜງການ ທີ່ເຮັດພາລະບົດບາດປະຕິບັດໜ້າທີ່ເສນາທິການ ໂດຍສະເພາະແມ່ນຫ້ອງວ່າການ ໃນຖານະເປັນອົງການເສນາທິການ ກໍໄດ້ຊ່ວຍໃນການອຳນວຍຄວບຄຸມການເຄື່ອນໄຫວວຽກງານ ຂອງຄະນະພັກ, ອົງການປົກຄອງ ແລະ ອົງການຈັດຕັ້ງມະຫາຊົນຂັ້ນຕ່າງໆ ແມ່ນປັດໄຈສຳຄັນທີ່ສຸດຮັບປະກັນໃຫ້ແກ່ການປະຕິບັດໜ້າທີ່ການເມືອງ ຕິດພັນກັບປະສິດທິພາບ ໃນການຊີ້ນຳ-ນຳພາຂອງພັກ. ໃນນັ້ນ, ສ່ວນສຳຄັນ ແລະ ທີ່ຄໍ້າປະກັນໃຫ້ພັກເຮົາເຮັດສຳເລັດບົດບາດນຳພາຂອງຕົນ ແມ່ນຍ້ອນພັກມີອົງການເສນາທິການຊ່ວຍວຽກທີ່ໜັກແໜ້ນເຂັ້ມແຂງ, ໂດຍສະ ເພາະກໍແມ່ນບົດບາດເສນາທິການຂອງຫ້ອງວ່າການໄດ້ມີສ່ວນຮ່ວມສຳຄັນ ແລະ ຕັດສິນການທຸກການເຄື່ອນໄຫວຂອງການນຳ ດັ່ງໃນບົດສະຫຼຸບສະພາບການເຄື່ອນໄຫວວຽກງານຫ້ອງວ່າການທົ່ວປະເທດ ຄັ້ງທີ III ເວົ້າວ່າ: “ປະສິດທິພາບໃນການເຄື່ອນໄຫວ ຂອງຫ້ອງວ່າການ ຕິດພັນກັບປະສິດທິພາບ ຂອງການນຳພາຊີ້ນຳ ຂອງຄະນະພັກ, ອົງການປົກຄອງ ແລະ ການຈັດຕັ້ງມະຫາຊົນຂັ້ນຕ່າງໆ”. ອັນນີ້ ມັນຊີ້ບອກວ່າ ການເຄື່ອນໄຫວວຽກງານ ຂອງຫ້ອງວ່າການ ບໍ່ສາມາດຕັດແຍກອອກຈາກການເຄື່ອນໄຫວຂອງຜູ້ນຳພັກ-ລັດ ແຕ່ລະຂັ້ນໄດ້.
ຫ້ອງວ່າການປົກຄອງແຂວງຄຳມ່ວນ ເປັນອົງປະກອບໜຶ່ງທີ່ສຳຄັນໃນໂຄງປະກອບກົງຈັກ ຂອງອົງການປົກຄອງແຂວງ ເປັນຜູ້ຊ່ວຍວຽກໃຫ້ແກ່ຕົວແທນ ຂອງລັດຖະບານ ໃນການຄຸ້ມຄອງ-ບໍລິຫານລັດຢ່າງຮອບດ້ານ ຢູ່ຂັ້ນທ້ອງຖິ່ນ, ເປັນບ່ອນພົວພັນປະສານວຽກງານລະຫວ່າງຄະນະພັກແຂວງ, ເລຂາພັກແຂວງ, ເຈົ້າແຂວງ, ຮອງເຈົ້າແຂວງກັບບັນດາອົງການຈັດຕັ້ງຕ່າງໆ ຂອງພັກ-ລັດ, ປະຊາຊົນພາຍໃນແຂວງ, ລວມທັງພາຍໃນ ແລະ ຕ່າງປະເທດ; ປະຕິບັດບົດບາດ ເປັນເສນາທິການຊ່ວຍວຽກໃຫ້ແກ່ສະຫາຍເລຂາພັກແຂວງ, ເຈົ້າແຂວງ ແລະ ຮອງເຈົ້າແຂວງ ໃນການອຳນວຍ, ຄວບຄຸມ, ຊຸກຍູ້ ຕິດຕາມ ການຈັດຕັ້ງປະຕິບັດມະຕິກອງປະຊຸມຄະນະບໍລິຫານງານພັກແຂວງ, ອົງການປົກຄອງແຂວງ, ເປັນເຈົ້າການຊ່ວຍວຽກ ໃນການຄົ້ນຄວ້າກຳນົດກົນໄກການຈັດຕັ້ງຜັນຂະຫຍາຍແນວທາງ, ແຜນນະໂຍບາຍຂອງພັກ ແລະ ລະບຽບກົດໝາຍຂອງລັດ, ຄົ້ນຄວ້າຮ່າງລະບອບແບບແຜນວິທີເຮັດວຽກ ຂອງຄະນະບໍລິຫານງານພັກແຂວງ, ຄະນະປະຈຳພັກແຂວງ, ຄົ້ນຄວ້າທາງດ້ານເນື້ອໃນກະກຽມແກ່ກອງປະຊຸມບັ້ນຕ່າງໆ ລວມທັງຄົ້ນຄວ້າ ແລະ ຮ່າງບັນດານິຕິກຳທີ່ກ່ຽວຂ້ອງ ເພື່ອນຳສະ ເໜີຂັ້ນເທິງພິຈາລະນາ ຕະຫຼອດຮອດຕິດຕາມ, ຊຸກຍູ້ການຈັດຕັ້ງປະຕິບັດມະຕິຄຳສັ່ງ ຂອງບັນດາຂະແໜງການກ່ຽວຂ້ອງຂັ້ນແຂວງ ແລະ ເມືອງ ເພື່ອສັງລວມລາຍງານໃຫ້ຄະນະພັກ-ຄະນະນຳ ຂອງແຂວງ ຮັບຊາບເປັນປະຈຳ. ເປັນເຈົ້າການປະຕິບັດພາລະບົດບາດພົວພັນປະສານງານຢ່າງສະໜິດແໜ້ນ ກັບບັນດາອົງການຈັດຕັ້ງທີ່ເປັນເສນາທິການ ນັບທັງສູນກາງ, ບັນດາແຂວງ, ພະແນກການ, ກົມກອງອ້ອມຂ້າງແຂວງ, ບັນດາເມືອງ ໃນການສ້າງແຜນເຄື່ອນໄຫວ ໃຫ້ແກ່ຄະນະນຳຂອງແຂວງ ໃຫ້ມີຄວາມສອດຄ່ອງກົມກຽວກັນໃນທຸກທ່າບຸກທະລຸ ແລະ ເປັນເຈົ້າການປະສານກັບທຸກພາກສ່ວນ ພ້ອມກັນຄົ້ນຄວ້າແກ້ໄຂບັນຫາທີ່ພົ້ນເດັ່ນ ແລະ ພົບຂໍ້ຫຍຸ້ງຍາກ, ສົມທົບແໜ້ນກັບທຸກພາກສ່ວນທີ່ກ່ຽວຂ້ອງ ໃນການປະຕິບັດພາລະບົດບາດຄຸ້ມຄອງ-ບໍລິຫານຮັບໃຊ້, ທັງຮັບປະກັນເງື່ອນໄຂຄວາມພ້ອມຢ່າງຮອບດ້ານ. ເພື່ອເອື້ອອຳນວຍໃຫ້ແກ່ການເຄື່ອນໄຫວຊີ້ນຳ-ນຳພາ ຂອງຄະນະພັກ-ຄະນະນຳ ຂອງແຂວງ ຮັບປະກັນໄດ້ ໃຫ້ມີປະສິດທິຜົນສູງ.
ຜ່ານໄລຍະແຫ່ງການຈັດຕັ້ງປະຕິບັດພາລະບົດບາດໜ້າທີ່ຮັບໃຊ້ການນຳພັກ-ລັດ ຫ້ອງວ່າການໄດ້ຮັບການທົດສອບ, ຊຸບຫຼໍ່ ແລະ ເຕີບໃຫຍ່ຂຶ້ນເປັນກ້າວໆ ຫ້ອງວ່າການປົກຄອງແຂວງຄຳມ່ວນ ໄດ້ປະກອບສ່ວນຢ່າງຕັ້ງໜ້າ ໃຫ້ສົມຄູ່ກັບໜ້າທ່ີການເມືອງທີ່ໄດ້ຮັບມອບໝາຍ ເພື່ອຍົກສູງບົດບາດ ແລະ ໜ້າທີ່ ທີ່ມີກຽດອັນສູງສົ່ງນັ້ນກໍຄືສາມາດບັນລຸໄດ້ຕາມຄຳຂວັນທີ່ວ່າ “ສ້າງຫ້ອງວ່າການປົກຄອງແຂວງໃຫ້ກາຍເປັນເສນາທິການທີ່ດີ ເປັນຜູ້ຄົ້ນຄວ້າ-ສັງລວມທີ່ດີ, ເປັນຜູ້ປະສານງານທີ່ດີ ແລະ ເປັນຜູ້ຮັບໃຊ້ທີ່ດີ”. ຫ້ອງວ່າການປົກຄອງແຂວງຄຳມ່ວນ ມີສະມາຊິກພັກທັງໝົດ 64 ສະຫາຍ ຍິງ 20 ສະຫາຍ, ສະມາຊິກພັກສຳຮອງ 3 ສະຫາຍ ຍິງ 2 ສະຫາຍ; ປະກອບດ້ວຍ 5 ຂະແໜງ, ມີພະນັກງານລັດຖະກອນທັງໝົດ 79 ຄົນ, ຍິງ 28 ຄົນ; ລະດັບວິຊາສະເພາະມີ: ປະລິນຍາໂທ 11 ຄົນ, ປະລິນຍາຕີ 35 ຄົນ ຍິງ 18 ຄົນ, ຊັ້ນສູງ 16 ຄົນ ຍິງ 9 ຄົນ, ຊັ້ນກາງ 7 ຄົນ, ບໍມີຊັ້ນວິຊາສະເພາະ 9 ຄົນ ຍິງ 2 ຄົນ.
ຄຽງຄູ່ກັບບັນດາຜົນສຳເລັດໃນຫຼາຍດ້ານ ໃນການເຮັດໜ້າທີ່ເປັນເສນາທິການຊ່ວຍວຽກໃຫ້ແກ່ອົງການປົກຄອງ ແຂວງຍັງເຫັນວ່າມີບາງບັນຫາທີ່ຕັ້ງຂຶ້ນທີ່ຄວນໄດ້ຮັບການເພີ້ມທະວີຄວາມເອົາໃຈໃສ່ສືບຕໍ່ແກ້ໄຂ ແລະ ປັບປຸງຍົກລະດັບໃຫ້ດີຂຶ້ນກວ່າເກົ່າເປັນຕົ້ນ:
ໜຶ່ງ: ການປະຕິບັດພາລະບົດບາດເສນາທິການ, ບໍລິການຮັບໃຊ້ໃຫ້ແກ່ຄະນະພັກແຂວງ ແລະ ອົງການປົກຄອງແຂວງເວົ້າລວມ, ເວົ້າສະເພາະແມ່ນການຊ່ວຍວຽກເລຂາພັກແຂວງ, ເຈົ້າແຂວງ, ຮອງເຈົ້າແຂວງ ມີບາງດ້ານມີລັກສະນະຊັກຊ້າ, ການນຳໃຊ້ຫົວຄິດປະດິດສ້າງ ແລະ ແບບແຜນວິທີເຮັດວຽກ ຍັງບໍ່ທັນກົມກຽວກັນ ແລະ ຖ້າທຽບໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ຍັງບໍ່ທັນໄດ້ດີເທົ່າທີ່ຄວນ.
ສອງ: ການພົວພັນປະສານງານກັບພາກສ່ວນພະແນກການ, ກົມກອງ ແລະ ບັນດາເມືອງຂອງແຂວງ, ບັນດາແຂວງ, ກໍຄືການຈັດຕັ້ງສູນກາງ ມີບາງກໍລະນີຍັງບໍ່ທັນກົມກຽວກັນ, ຍັງບໍ່ທັນສາມາດບຸກທະລຸໄດ້ດີເທົ່າທີ່ຄວນ ທາງດ້ານລະບອບລະບຽບການບໍລິຫານ-ຄຸ້ມຄອງລັດ, ຍັງເກີດມີການປະຕິບັດວຽກງານຊ້ຳຊ້ອນກັນໃນບາງຄັ້ງ.
ສາມ: ໃນການບໍລິການຮັບໃຊ້ໃຫ້ແກ່ການນຳຂອງແຂວງ ຍັງບໍ່ສາມາດຮັບປະກັນໄດ້ທາງດ້ານມາດຖານ, ລະບຽບການຄຸ້ມຄອງນຳໃຊ້ຍັງບໍ່ຈະແຈ້ງ, ຍັງບໍ່ທັນສາມາດຍົກສູງໄດ້ຈິດໃຈປະຢັດມັດທະຍັດກໍເກີດມີຫາງສຽງວິພາກວິຈານຈາກສັງຄົມ.
ສີ່: ການຊີ້ນຳ-ນຳພາ ຂອງຄະນະພັກຮາກຖານຍັງບໍ່ທັນແທດເຖິງເລິກເຊິ່ງ ແລະ ກົມກຽວກັບວຽກງານບໍລິຫານເບື້ອງລັດເທົ່າທີ່ຄວນ, ການສຶກສາອົບຮົມການເມືອງ-ນຳພາແນວຄິດຍັງຊັກຊ້າ, ບັນດາອົງການຈັດຕັ້ງມະຫາຊົນຍັງບໍ່ທັນໄດ້ເຄື່ອນໄຫວຕາມພາລະຢ່າງເຕັມສ່ວນ.
ຫ້າ: ກົງຈັກການຈັດຕັ້ງຢູ່ຫ້ອງວ່າການປົກຄອງແຂວງ ມີການປັບປຸງສັບຊ້ອນໄປຕາມແຕ່ລະໄລຍະ, ເຮັດໃຫ້ການຊີ້ນຳ-ນຳພາ ບໍ່ຕໍ່ເນ່ືອງນັບທັງບຸກຄະລາກອນຢູ່ໃນກົງຈັກ ກໍມີການປັບປຸງຍົກຍ້າຍສັບຊ້ອນປ່ຽນແປງເລື້ອຍໆ.
- ການບັນຈຸສັບຊ້ອນພະນັກງານຍັງບໍ່ທັນແທດເໝາະບໍ່ຖືກກັບວິຊາສະເພາະເທົ່າທີ່ຄວນ, ພະນັກງານຈຳນວນໜຶ່ງຄຸນທາດການເມືອງຍັງບໍ່ທັນໜັກແໜ້ນ ຍັງຖືເບົາ ຂາດການຝຶກຝົນຫຼໍ່ຫຼອມຕົນເອງ ທາງດ້ານຄຸນສົມບັດສິນທຳປະຕິວັດ ເປັນຕົ້ນແມ່ນຄວາມສາມາດໃນການຄົ້ນຄວ້າ, ໝູນໃຊ້ລັດທິມາກ-ເລນິນ ເຂົ້າສູ່ພຶດຕິກຳຕົວຈິງ ແລະ ການຫັນເອົາແນວທາງນະໂຍບາຍຂອງພັກມາເປັນແຜນການ, ໂຄງການ ແລະ ແຜນງານອັນລະອຽດບໍ່ທັນໄດ້ດີ, ບໍ່ທັນແທດເໝາະກັບກາລະໂອ ກາດ, ສະພາບຈຸດພິເສດ ແລະ ໜ້າທີ່ຄວາມຮັບຜິດຊອບ, ລະດັບຄວາມຮູ້ທາງດ້ານທິດສະດີການເມືອງຂອງພະນັກງານ ຍັງມີຂີດຈຳກັດ, ມີແຕ່ກວມສ່ວນໜ້ອຍ ບວກກັບລະດັບຄວາມຕື່ນຕົວ ຫຼື ສະດຸງໄວ ໃນການຄົ້ນຄວ້າເຊື່ອມຊຶມຍັງຕໍ່າ, ນອກນັ້ນຍັງມີພະນັກງານຈຳນວນໜຶ່ງ ແມ່ນລໍຖ້າປະຕິບັດຕາມຄຳສັ່ງ, ຂາດຄວາມບຸກບືນ ບໍ່ປະດິດສ້າງ.
ເພື່ອຕອບສະໜອງໄດ້ຄວາມຮຽກຮ້ອງຕ້ອງ ການຂອງໜ້າທີ່ວຽກງານໃນໄລຍະໃໝ່ ໃນການປະຕິບັດພາລະບົດບາດເສນາທິການ ສັງລວມ, ປະສານງານ ແລະ ບໍລິການຮັບໃຊ້ໃຫ້ແກ່ອົງຄະນະພັກແຂວງ, ອຳນາດການປົກຄອງແຂວງ, ການຍົກສູງບົດບາດການນຳພາຂອງພັກຢູ່ຫ້ອງວ່າການປົກຄອງແຂວງຄຳມ່ວນ ໃນເງື່ອນໄຂແຫ່ງການເຊື່ອມໂຍງກັບພາກພື້ນ ແລະສາກົນ, ກໍຄືການບຸກທະລຸໄດ້ຕາມທິດທາງ, ຄາດໝາຍສູ້ຊົນຮອດປີ 2030, 2025 ແລະ ທິດທາງໜ້າທີ່ຈຸດສຸມຮອດປີ 2020 ຂອງແຂວງຄຳມ່ວນ ແລະ ບັນຫາອື່ນໆ ໃຫ້ສຳເລັດຜົນ ສິ່ງເຫຼົ່ານີ້ແມ່ນບັນຫາພື້ນຖານທີ່ຄະນະພັກ-ຄະນະນຳຂອງແຂວງ ກໍຄືຄະນະພັກ-ຄະນະນຳຂອງຫ້ອງວ່າການປົກຄອງແຂວງ ຕະຫຼອດຮອດ ສະມາຊິກພັກ, ພະນັກງານທັງໝົດຄວນໄດ້ເພີ້ມທະວີຄວາມເອົາໃຈໃສ່ບາງບັນຫາດັ່ງນີ້:
ໜຶ່ງ: ກ່ອນອື່ນໝົດຄວນໄດ້ເອົາໃຈໃສ່ຊ່ວຍສະຫາຍເລຂາພັກແຂວງ, ເຈົ້າແຂວງ, ຮອງເຈົ້າແຂວງ ຄົ້ນຄວ້າ ແລະ ຜັນຂະຫຍາຍແນວທາງແຜນນະໂຍບາຍຂອງພັກ, ລະບຽບກົດໝາຍຂອງລັດເວົ້າລວມ, ເວົ້າສະເພາະມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ, ຍົກສູງພາລະບົດບາດ ແລະ ຄຸນນະພາບວຽກງານບັນນາທິການ, ການຄົ້ນຄວ້າກັ່ນຕອງ ແລະ ປະກອບຄຳຄິດຄຳເຫັນຕໍ່ຮ່າງນິຕິກຳຕ່າງໆ ລວມທັງບັນດາຮ່າງສັນຍາ ແລະ ບົດບັນທຶກຄວາມເຂົ້າໃຈຂອງພາກສ່ວນຕ່າງໆ ຂອງແຂວງ ເພື່ອນຳສະເໜີຄະນະພັກ-ຄະນະນຳຂອງແຂວງ ພິຈາລະນາ ຮັບຮອງ ຫຼື ປະກາດນຳໃຊ້, ເພີ້ມທະວີວຽກງານປະສານສົມທົບ ກັບທຸກພາກສ່ວນທີ່ກ່ຽວຂ້ອງນັບທັງສູນກາງ, ບັນດາແຂວງ ແລະ ພາຍໃນແຂວງ, ຮັບຟັງຂໍ້ສະເໜີ ແລະຄວາມຄິດເຫັນຕ່າງໆ ຕໍ່ກັບຜົນກະທົບດ້ານຕັ້ງໜ້າ ແລະ ຫຍໍ້ທໍ້ ກ່ຽວກັບການຈັດຕັ້ງປະຕິບັດຂອງແຂວງ ກໍຄືຂອງລັດຖະບານ ຢ່າງພາວະວິໄສ.
ສອງ: ກຳນົດແຜນການເຄື່ອນໄຫວໃຫ້ແກ່ຄະນະພັກ-ຄະນະນຳຂອງແຂວງ ໃຫ້ສອດຄ່ອງກັບສະພາບການຕົວຈິງ ແຕ່ລະໄລຍະ ໃນການເຄື່ອນໄຫວຊີ້ນຳ-ນຳພາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງຢູ່ບັນດາພະແນກການ, ກົມກອງ ແລະເມືອງ ຕະຫຼອດຮອດການເຄື່ອນໄຫວວຽກງານຕ່າງປະເທດ ໃຫ້ລະອຽດຊັດເຈນ.
ສາມ: ເປັນເຈົ້າການໃນການຊ່ວຍການນຳແຂວງ ຂຶ້ນແຜນກະກຽມຮອບດ້ານ ແລະ ອຳນວຍຄວບຄຸມກອງປະຊຸມຄົບຄະນະບໍລິຫານງານພັກແຂວງ, ກອງປະຊຸມຄະນະປະຈຳພັກແຂວງ, ກອງປະຊຸມອົງການປົກຄອງແຂວງ, ກອງປະຊຸມກັບພາກສ່ວນຕ່າງໆ ທັງພາຍໃນ ແລະ ຕ່າງປະເທດໃຫ້ມີປະສິດທິພາບ, ມີປະສິດທິຜົນສູງ ແລະ ທັນເວລາ.
ສີ່: ເອົາໃຈໃສ່ຕິດຕາມຊຸກຍູ້ ແລະ ປະເມີນຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ແລະ ແຜນການແຕ່ລະສົກປີ ໃຫ້ສາມາດບັນລຸໄດ້ຕາມລະດັບຄາດໝາຍ ໂດຍມີກຳນົດໝາຍ ແລະ ກຳນົດເວລາ, ບັນດາໂຄງການຂອງລັດຖະບານ, ໂຄງການຍຸດທະສາດຂອງແຂວງ, ຕິດຕາມສະພາບເສດຖະກິດໂດຍລວມຂອງແຂວງ, ສະພາບຄວາມສະຫງົບປອດໄພ ແລະ ບັນດາປະກົດການຫຍໍ້ທໍ້ຕ່າງໆ ສະພາບການພົ້ນເດ່ັນທາງດ້ານເສດຖະກິດ-ສັງຄົມ ແລະ ການເມືອງພາຍໃນ ແລະ ຕ່າງປະເທດທີ່ສົ່ງຜົນກະທົບຕໍ່ແຂວງເຮົາ; ພ້ອມທັງສຶກສາຄົ້ນຄວ້າບັນຫາ ແລະ ໃຫ້ຄຳເຫັນດ້ານວິຊາການຊ່ວຍການນຳແຂວງໃນການວາງແນວທາງຮັບມື ແລະ ແກ້ໄຂໄດ້ຢ່າງເໝາະສົມ.
ຫ້າ: ເອົາໃຈໃສ່ໃນການສັງລວມ-ຄົ້ນຄວ້າ ແລະ ກັ່ນຕອງບັນດາຂໍ້ມູນຂ່າວສານ, ບັນຫາພົ້ນເດັ່ນຢ່າງຄົບຖ້ວນ ແລະ ເລິກເຊິ່ງ ເພື່ອສ່ອງແສງລາຍງານຕໍ່ກອງປະຊຸມຄະນະປະຈຳພັກແຂວງຢ່າງທັນການ ສະໜອງຂໍ້ມູນໃນການຊີ້ນຳ ແລະພິຈາລະນາຈົກລົງໃຫ້ຊັດເຈນ; ພ້ອມນັ້ນກໍຕ້ອງຍົກສູງວຽກງານປະຊາສຳພັນຜ່ານສື່ສານມວນຊົນ ແລະ ລະບົບອີເລັກໂທນິກທີ່ທັນສະໄໝໃນຕໍ່ໜ້າ.
ຫົກ: ວາງແຜນກຳນົດສ້າງພະນັກງານໃຫ້ພຽງພໍ, ແທດເໝາະກັບວິຊາສະເພາະ ແລະ ຄວາມຕ້ອງການ ໃນສະເພາະໜ້າ ແລະ ຍາວນານ ແນໃສ່ຮັບປະກັນລັກສະນະສືບທອດຕໍ່ເນື່ອງ, ທັງມີຄຸນທາດການເມືອງໜັກແໜ້ນ ພຽບພ້ອມໄປດ້ວຍຄວາມຮູ້-ຄວາມສາມາດ ແລະ ຄຸນສົມບັດ ສິນທຳປະຕິວັດ ອັນສູງສົ່ງ, ກຳນົດແຜນວຽກງານບຳລຸງ-ກໍ່ສ້າງພະນັກງານໃຫ້ມີຄວາມຫຼາກຫຼາຍ ມີທັງໄລຍະສັ້ນ, ໄລຍະກາງ ແລະ ໄລຍະຍາວ ໂດຍມີການຂຶ້ນແຜນກໍານົດພະນັກງານເພື່ອກໍ່ສ້າງຢູ່ພາຍໃນ ແລະ ຕ່າງປະເທດ ຮັບປະກັນໄດ້ພື້ນຖານກຳແໜ້ນ ແລະ ປະຕິບັດໃຫ້ສອດຄ່ອງຕາມທັດສະນະຂອງພັກກ່ຽວກັບພະນັກງານ, ຮັບປະກັນໂຄງປະກອບທາງດ້ານຊົນຊັ້ນ, ເພດ-ໄວ, ຊົນເຜົ່າ, ປັນຍາຊົນປະຕິວັດ, ນອນໃນແຜນສືບທອດກຳລັງແຮງໜຸ່ມນ້ອຍ ພຽບພ້ອມໄປດ້ວຍຄວາມຮູ້ຄວາມສາມາດທີ່ບົ່ມຊ້ອນໃນແຕ່ລະຂະແໜງການ.
ເຈັດ: ຈັດວາງສັບຊ້ອນພະນັກງານ ຄວນອີງໃສ່ຄວາມຮຽກຮ້ອງຕ້ອງການໜ້າທີ່ການເມືອງຂອງກົງຈັກການຈັດຕັ້ງ, ສົມເຫດສົມຜົນ ແລະ ຖືກກັບຄວາມຮູ້ຄວາມສາມາດແຕ່ລະຄົນ, ບໍ່ຈຳແນກຊົນຊ້ັນ, ວັນນະ, ເຜົ່າ, ເດັດດ່ຽວແກ້ໄຂໃຫ້ໄດ້ແນວຄິດທີ່ບໍ່ຖືກຕ້ອງເປັນແນວຄິດຄັບແຄບ, ທ້ອງຖິ່ນ, ຈຸ້ມເຈື້ອເຊື້ອສາຍພີ່ນ້ອງ, ການສັບຊ້ອນຄວນເບິ່ງຄວາມຮູ້-ຄວາມສາມາດ, ພອນສະຫວັນ ແລະ ຄຸນສົມບັດຂອງພະນັກງານ, ຄວນເອົາໃຈໃສ່ພະນັກງານ ທີ່ໄດ້ຮັບການທົດສອບຈາກຮາກຖານ, ລະຫວ່າງພະນັກງານອາວຸໂສ ແລະ ພະນັກງານໜຸ່ມນ້ອຍ, ລະຫວ່າງພະນັກງານທິດສະດີການເມືອງກັບພະນັກງານວິຊາສະເພາະ. ພ້ອມນັ້ນດ້ານວຽກງານນະໂຍບາຍກໍສຳຄັນ ເປັນພື້ນຖານທີ່ຕິດພັນກັບຜົນປະໂຫຍດ ແລະ ຊີວິດການເປັນຢູ່ຂອງພະນັກງານ-ລັດຖະກອນ ທັງເປັນເຄື່ອງມືໃນການສ້າງແຮງຈູງໃຈໃຫ້ພະນັກງານມີຄວາມຫ້າວຫັນ, ບຸກບືນໃນການປະຕິບັດໜ້າທີ່ວຽກງານນັບມື້ນັບດີຂຶ້ນເລື້ອຍໆ ແຕ່ຄວນຮັບປະກັນປະຕິບັດໃຫ້ໄດ້ຄວາມໂປງໃສ ຍຸຕິທຳ ແລະ ທົ່ວເຖິງ ຄວນຕິດພັນກັບການຈັດຕັ້ງການເມືອງ-ນຳພາແນວຄິດ ໃຫ້ເຂົາເຈົ້າເຂົ້າໃຈ ແລະ ເຫັນໄດ້ສະພາບຄວາມເປັນຈິງຂອງຊາດ ແລະ ເງື່ອນໄຂຄວາມສາມາດຕອບສະໜອງໄດ້.
ແປດ: ວຽກງານຄຸ້ມຄອງ-ປ້ອງກັນພັກ ແມ່ນຄວນໄດ້ເອົາໃຈໃສ່ການເຜີຍແຜ່ລະບຽບ ແລະ ວິທີການຄຸ້ມຄອງສະມາຊິກພັກໃນອົງການຈັດຕັ້ງ, ຄຸ້ມຄອງທາງດ້ານຊີວະປະຫວັດ, ສະຖິຕິສະມາຊິກພັກ, ຮັບເອົາມະຫາຊົນກ້າວໜ້າເຂົ້າພັກ, ຍ້ອງຍໍ ແລະ ເດັດຂາດປະຕິບັດວິໄນຕໍ່ຜູ້ທີ່ກະທຳຜິດລະບຽບຂອງພັກ; ຕິດຕາມຄຸ້ມຄອງສັບຊ້ອນຈັດວາງ, ບຳລຸງສ້າງດ້ວຍການຍົກລະດັບທາງດ້ານການເມືອງ-ແນວຄິດ ແລະ ໜ້າທີ່ວຽກງານໃຫ້ພະນັກງານສະມາຊິກພັກ ພາຍໃນຄະນະພັກຮາກຖານຢ່າງຄົບຖ້ວນ, ຮັບຜິດຊອບການຕີລາຄາ ແລະ ປະເມີນການປະຕິບັດໜ້າທີ່ຂອງສະມາຊິກພັກ, ຊຸກຍູ້ການຈັດຕັ້ງມະຫາຊົນ ຢູ່ພາຍໃນຄະນະພັກຮາກຖານ ແລະ ກົມກອງຂອງຕົນ. ເພື່ອຮັບປະກັນໄດ້ສະມາຊິກພັກ ທີ່ມີຄວາມປອດໃສ, ໜັກແໜ້ນ ແລະ ເຂ້ັມແຂງ.
ເກົ້າ: ຍົກສູງພາລະບົດບາດກວດກາ, ຕິດຕາມ ແລະ ຊຸກຍູ້ບັນດາພະແນກການ, ກົມກອງ ແລະ ບັນດາເມືອງ ໃນການປະຕິບັດ ແລະ ຜັນຂະຫຍາຍບັນດາແນວທາງນະໂຍບາຍຂອງພັກ, ມະຕິ, ຄຳສັ່ງ... ແລະ ການຊີ້ນຳຂອງຄະນະພັກ-ຄະນະນຳຂອງແຂວງ ພ້ອມທັງສັງລວມລາຍງານໃຫ້ໄດ້ເປັນປົກກະຕິ, ຊັດເຈນ, ແທດເຖິງຄວາມຈິງ ແລະ ທັນກັບສະພາບການ.
ສັງລວມແລ້ວ: ບັນຫາໃນການຍົກສູງບົດບາດເສນາທິການຂອງຫ້ອງວ່າການປົກຄອງແຂວງຄຳມ່ວນ ໃນຕໍ່ໜ້າຄວນສຸມໃສ່ຕາມວິທີການ ແລະ ທິດທາງທີ່ກ່າວມາຂ້າງເທິງ ຖືເອົາວຽກງານດັ່ງກ່າວຕິດພັນກັບໜ້າທີ່ການເມືອງ ຂອງຄະນະພັກ, ອົງການປົກຄອງແຂວງ, ຍາມໃດກໍຖືເອົາການປະສານງານ ແລະ ການບໍລິການຮັບໃຊ້ການນຳເປັນສຳຄັນ, ຍົກສູງການເປັນເສນາທິການ ຕາມທິດວ່ອງໄວ, ທັນກັບສະພາບການ, ປະດິດສ້າງ ແລະ ມີປະສິດທິຜົນ ສອດຄ່ອງກັບຄຳເວົ້າທີ່ວ່າ: “ສືບຕໍ່ຍົກສູງຄວາມສາມາດໃນການປະຕິບັດບົດບາດ ແລະ ໜ້າທີ່ຂອງການເປັນເສນາທິການ, ການເປັນໃຈກາງປະສານງານ ແລະການບໍລິການຮັບໃຊ້ຂອງຫ້ອງວ່າການແຕ່ລະຂັ້ນ ໃຫ້ມີຄວາມໜັກແໜ້ນເຂັ້ມແຂງ, ມີຄຸນນະພາບ ແລະທັນສະໄໝເທື່ອລະກ້າວ”. ຢາກເຮັດໄດ້ທັງໝົດເຫຼົ່ານັ້ນ; ຄະນະພັກ, ອົງການປົກຄອງແຂວງ ກໍຄືຄະນະຫ້ອງວ່າການປົກຄອງແຂວງ ຕ້ອງໄດ້ເພີ້ມທະວີການຊີ້ນຳ-ນຳພາ ຕໍ່ວຽກງານທັງໝົດ ຂອງຫ້ອງວ່າການຢ່າງຈົດຈໍ່, ປັບປຸງກົງຈັກການຈັດຕັ້ງ ແລະ ປະກອບບຸກຄະລາກອນ, ສະໜອງອຸປະກອນ, ມີການຊຸກຍູ້, ຕິດຕາມກວດກາການປະຕິບັດໜ້າທີ່ວຽກງານ, ຈັດຕັ້ງປະເມີນຜົນ, ປະຕິບັດນະໂຍບາຍຢ່າງສົມເຫດສົມຜົນ ແລະເຂັ້ມງວດດ້ານວິໄນ.
ໂດຍ: ຈັນທະບູນ ວົງສຸດທິ