ໂດຍ: ບານ ມູນປະເສີດ
ໃນວັນທີ 17 ມັງກອນ 2024 ຄະນະຈັດຕັ້ງສູນກາງພັກ (ຄຈສພ) ໄດ້ເຂົ້າອວຍພອນກອງທັບປະຊາຊົນລາວ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949 – 20/1/2024) ເຊິ່ງຕາງໜ້າ ຄຈສພ ມີທ່ານ ປອ. ວິສຸກ ພົມພິທັກ ຮອງຫົວໜ້າ ຄຈສພ ພ້ອມດ້ວຍຄະນະ ແລະ ເປັນກຽດຕ້ອນຮັບໂດຍ ພົນໂທ ທອງລອຍ ສິລິວົງ ຮອງລັດຖະມົນຕີ, ຫົວໜ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ ພ້ອມດ້ວຍຄະນະນາຍ ແລະ ພົນທະຫານກະຊວງປ້ອງກັນປະເທດ.
ໃນໂອກາດດັ່ງກ່າວ ທ່ານ ປອ. ວິສຸກ ພົມພິທັກ ໄດ້ກ່າວອວຍພອນໄຊ ແລະ ຊົມເຊີຍມາຍັງກອງທັບປະຊາຊົນລາວ ກໍຄືນາຍ ແລະ ພົນທະຫານ ທີ່ໄດ້ເສຍສະຫຼະ ອອກເຫື່ອເທແຮງ ສຸມທຸກກຳລັງເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມສະຫງົບສຸກຂອງບ້ານເມືອງ ແລະ ເພື່ອເສີມຂະຫຍາຍມູນເຊື້ອ, ທາດເເທ້, ຜົນງານໄຊຊະນະອັນໃຫຍ່ຫຼວງ, ວິລະກໍາອັນລໍ້າເລີດຂອງກອງທັບປະຊາຊົນລາວໃຫ້ເຕີບໃຫຍ່ເຂັ້ມແຂງເລື້ອຍມາ.
ໃນໂອກາດດຽວກັນ ທ່ານ ພົ.ທ ທອງລອຍ ສິລິວົງ ຮອງລັດຖະມົນຕີ ຫົວໜ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ ກໍ່ໄດ້ກ່າວຄໍາຂອບໃຈ ທີ່ການຈັດຕັ້ງພັກລັດໃຫ້ຄວາມເຊື່ອໝັ້ນໄວ້ວາງໃຈ ແລະ ໃຫ້ການສະໜັບສະໜູນ ຊຸກຍູ້ສົ່ງເສີມຕະລອດມາ ໂດຍສະເພາະການກໍ່ສ້າງ, ຄຸ້ມຄອງ ສັບຊ້ອນຈັດວາງບຸກຄະລາກອນ ແລະ ວຽກງານອື່ນໆທີ່ເປັນໃຈກາງ ເຮັດໃຫ້ກຳລັງກໍຄືກອງທັບປະຊາຊົນລາວມີຄວາມເຂັ້ມຂຶ້ນເລື້ອຍໆ.
