ພາບ ແລະ ຂ່າວໂດຍ: ສ.ສົດໃສ
ໃນວັນທີ 03 ມັງກອນ 2024 ຢູ່ທີ່ສະໂມສອນກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມເຜີຍແຜ່ເຊື່ອມຊຶມ ແລະ ຜັນຂະຫຍາຍບັນດານິຕິກຳກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍການເປັນປະທານຂອງສະຫາຍ ປອ ເພັດ ພົມພິພັກ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາສະຫາຍຄະນະປະຈຳພັກ, ຄະນະບໍລິຫານງານພັກກະຊວງ; ສະຫາຍເລຂາ, ຮອງເລຂາ, ຄະນະພັກຮາກຖານ; ເລຂາ, ຮອງເລຂາ, ຄະນະໜ່ວຍພັກຮາກຖານ; ສະຫາຍຫົວໜ້າກົມທີ່ຂຶ້ນກັບຄະນະພັກຮາກຖານ; ເລຂາ, ຮອງເລຂາ ແລະ ປະທານ-ຮອງປະທານ 3 ອົງການຈັດຕັ້ງມະຫາຊົນຂັ້ນກະຊວງ; ຜູ້ຊ່ວຍວຽກຄະນະພັກຮາກຖານ, ໜ່ວຍພັກຮາກຖານເຂົ້າຮ່ວມ.
ໃນກອງປະຊຸມ ບັນດາຜູ້ເຂົ້າຮ່ວມໄດ້ຮັບຟັງເອກະສານທີ່ສຳຄັນຕ່າງໆເຊັ່ນ: ບົດຄວາມເຂົ້າໃຈກ່ຽວກັບກອງປະຊຸມໃຫຍ່ 3 ຂັ້ນຂອງພັກ; ຄຳສັ່ງຂອງເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 411/ຄລສພ, ລົງວັນທີ 08 ສິງຫາ 2023; ຄຳແນະນຳຂອງຄະນະຈັດຕັ້ງສູນກາງພັກ ການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 211/ຄຈສພ, ລົງວັນທີ 16 ສິງຫາ 2023 ໂດຍການເຜີຍແຜ່ຂອງສະຫາຍ ປອ ເພັດ ພົມພິພັກ. ຈາກນັ້ນ, ໄດ້ຮັບຟັງຄຳແນະນຳຂອງຄະນະໂຄສະນາອົບຮົມສູນກາງພັກ ກ່ຽວກັບການສ້າງຂະບວນການເພື່ອກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 254/ຄຈສພ, ລົງວັນທີ 06 ພະຈິກ 2023. ຈາກນັ້ນ, ຮັບຟັງບົດແນະນຳ (ສະບັບປັບປຸງ) ຂອງຫ້ອງວ່າການສູນກາງພັກ ກ່ຽວກັບການກະກຽມເນື້ອໃນຮ່າງລາຍງານການເມືອງຂອງອົງຄະນະພັກແຕ່ລະຂັ້ນ ສະບັບເລກທີ 05/ຫສພ, ລົງວັນທີ 31 ຕຸລາ 2023; ຄຳແນະນຳ ຂອງຄະນະກວດກາສູນກາງພັກ ການກະກຽມ ແລະ ດຳເນີນຊີວິດການເມືອງທ້າຍສະໄໝ ກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 285/ຄກສພ, ລົງວັນທີ 15 ກັນຍາ 2023; ແຜນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ໃນທົ່ວອົງຄະນະພັກກະຊວງກະສິກຳ ແລະ ປ່າໄມ້ ສະບັບເລກທີ 0353/ຄພ.ກປ, ລົງວັນທີ 25 ຕຸລາ 2023.
ຕອນທ້າຍກອງປະຊຸມ ສະຫາຍ ປອ ເພັດ ພົມພິພັກ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ມີຄຳເຫັນໂອ້ລົມໃຫ້ຄະນະພັກທຸກຂັ້ນ, ສະມາຊິກພັກ-ພະນັກງານທຸກສະຫາຍ ຜູ້ຊ່ວຍວຽກຄະນະພັກຮາກຖານ, ໜ່ວຍພັກຮາກຖານ ຈົ່ງສ້າງຄວາມຮັບຮູ້ເຂົ້າໃຈ ແລະ ເປັນເອກະພາບກຳແໜ້ນເນື້ອໃນບັນດານິຕິກຳກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກໃຫ້ເລິກເຊິ່ງ ເພື່ອເຮັດໃຫ້ການກະກຽມ ແລະ ດຳເນີນມະຕິກອງປະຊຸມໃຫຍ່ອົງຄະນະພັກກະຊວງກະສິກຳ ແລະ ປ່າໄມ້ ຄັ້ງທີ VII ນີ້ໃຫ້ເປັນຂະບວນການຟົດຟື້ນ, ກວ້າງຂວາງ ແລະ ມີຜົນສຳເລັດຕາມລະດັບຄາດໝາຍທີ່ວາງໄວ້.
