ໂດຍ: ພິດສະໄໝ
ໃນລະຫວ່າງວັນທີ 10-11 ຕຸລາ 2023 ກະຊວງແຜນການ ແລະ ການລົງທຶນ ໄດ້ຈັດກອງປະຊຸມເຜີຍແຜ່ ເຊື່ອມຊຶມ ແລະ ຜັນຂະຫຍາຍຜົນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະ ໄໝທີ XI ພາຍໃຕ້ການເປັນປະທານ ແລະ ທັງໃຫ້ກຽດເຜີຍແຜ່ເອກະສານໂດຍສະຫາຍ ນາງ ຄໍາຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງ ແຜນການ ແລະ ການລົງທຶນ, ມີບັນດາຄະນະພັກ, ຄະນະນໍາ, ສະມາຊິກພັກ, ພະນັກງານ-ລັດຖະກອນ ທົ່ວກະຊວງແຜນການ ແລະ ການ ລົງທຶນເຂົ້າຮ່ວມທັງໝົດ 179 ທ່ານ, ຍິງ 62 ທ່ານ.
ກອງປະຊຸມໃນຄັ້ງນີ້, ຜູ້ເຂົ້າຮ່ວມໄດ້ຮັບຟັງການເຜີຍແຜ່ ມະຕິກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI, ລົງວັນທີ 18 ສິງຫາ 2023; ຕີລາຄາການຈັດຕັ້ງປະຕິບັດມະຕິ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ໃນໄລຍະຜ່ານມາ; ບົດລາຍງານກ່ຽວກັບການສະຫຼຸບການຈັດຕັ້ງປະຕິບັດກາງສະໄໝ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2021-2025) ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ທິດທາງແຜນການທ້າຍສະໄໝ ຮອດປີ 2025; ບົດສຳຫຼວດ ການນຳພາລວມ ໄລຍະກາງສະໄໝຄົບຄະນະກາງສະໄໝຂອງຄະນະບໍລິຫານງານສູນກາງພັກ ສະໄໝທີ XI; ມະຕິຂອງຄະນະບໍລິຫານງານສູນກາງພັກ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ ສະໄໝທີ XI ສະບັບ 05/ຄບສພ, ລົງວັນວັນທີ 5 ກັນຍາ 2023; ແຜນດໍາເນີນງານ ສະບັບເລກທີ 432/ ຄລສພ, ລົງວັນທີ 8 ກັນຍາ 2023 ເພື່ອຜັນຂະຫຍາຍມະຕິ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວ ທາງປ່ຽນແປງໃໝ່ ລວງເລິກ ສູ່ການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ.
ພ້ອມກັນນັ້ນ, ຍັງຮັບຟັງການເຜີຍແຜ່ເນື້ອໃນບົດຄວາມເຫັນຊີ້ນໍາ ຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ຕໍ່ກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກ ສະໄໝທີ XI ຈໍານວນ 5 ເນື້ອໃນຄື: ບົດຄວາມເຫັນກ່າວໄຂ ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI; ບົດຄວາມເຫັນເຈາະຈິ້ມ ຕໍ່ກອງປະຊຸມ; ບົດຄວາມເຫັນສະຫຼຸບປິດ ຕໍ່ກອງປະຊຸມຄົບຄະນະກາງສະໄໝ; ບົດຄວາມເຫັນກ່າວເປີດ ການດໍາເນີນຊີວິດການເມືອງ, ສໍາຫຼວດການນໍາພາລວມໝູ່ ແລະ ບຸກຄົນ ຂອງຄະນະບໍລິຫານງານສູນກາງພັກ ສະໄໝທີ XI; ບົດຄວາມເຫັນ ກ່າວສະຫຼຸບຜົນການດໍາເນີນຊີວິດການເມືອງ ແລະ ກ່າວປິດກອງປະຊຸມສູນກາງຄົບຄະນະ ກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI.
ກອງປະຊຸມໃນຄັ້ງນີ້, ແມ່ນມີຄວາມໝາຍຄວາມສຳຄັນຫຼາຍ ເພາະຜູ້ເຂົ້າຮ່ວມ ໄດ້ເຊື່ອມຊຶມ, ຮັບຮູ້, ເຂົ້າໃຈ ແລະ ກຳແໜ້ນເນື້ອໃນມະຕິກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກສະໄໝທີ Ⅺ ແລະ ພ້ອມກັນນໍາ ເອົາເນື້ອໃນໃຈ ຈິດດັ່ງກ່າວໄປໝູນໃຊ້ເຂົ້າໃນການຈັດຕັ້ງປະຕິບັດຕົວຈິງໃນວຽກງານທີ່ຕົນຮັບຜິດຊອບໃຫ້ເກີດດອກອອກຜົນເປັນຈິງ.
