ຂ່າວ: ອາລັນ ພີມມະທອນ
ໃນລະຫວ່າງ ເດືອນ ຕຸລາ - ພະຈິກ 2022 ຄະນະຈັດຕັ້ງແຂວງຫົວພັນ ໄດ້ເຄື່ອນໄຫວຊຸກຍູ້ແບບແຜນວີທີການເຮັດວຽກຂອງຄະນະພັກ ແລະ ວິທີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ທີ່ຕິດພັນກັບວຽກງານ 3 ສ້າງ ພາຍໃນ 5 ເມືອງ ຂອງແຂວງຫົວພັນຄື: ເມືອງ ວຽງໄຊ, ເມືອງ ສົບເບົາ, ເມືອງ ຊຽງຄໍ້, ເມືອງ ແອດ ແລະ ເມືອງ ຮ້ຽມ ທັງໝົດ 25 ບ້ານ ເຊິ່ງມີບັນດາສະຫາຍ ຄະນະໜ່ວຍພັກບ້ານ ແລະ ສະມາຊິກພັກແຕ່ລະບ້ານ ເຂົ້າຮ່ວມທັງໝົດ 299 ສະຫາຍ, ຍິງ 63 ສະຫາຍ.
ໃນວາລະກອງປະຊຸມ ໄດ້ຜ່ານບົດສະຫຼຸບລາຍງານແບບແຜນວິທີນຳພາ ແລະ ວິທີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຈາກເລຂາໜ່ວຍພັກ ແຕ່ລະບ້ານ ທີ່ໄດ້ລົງເຄື່ອນໄຫວຊຸກຍູ້ໃນຄັ້ງນີ້. ຄະນະຈັດຕັ້ງແຂວງ ໄດ້ຜ່ານຄຳສັ່ງເລກທີ 01/ກມສພ ແລະ ຄຳແນະນຳເລກທີ 291/ຄຈສພ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ. ຄຳສັ່ງເລກທີ 064/ກມສພ ແລະ ຄຳແນະນຳເລກທີ 201/ຄຈສພ ວ່າດ້ວຍວຽກງານຂະຫຍາຍພັກ ເພື່ອເປັນບ່ອນອິງໃນການຈັດຕັ້ງປະຕິບັດການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ໜ່ວຍພັກແຕ່ລະບ້ານພ້ອມກັນຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ.
