ໂດຍ: ສ.ສົດໃສ
ກະຊວງສາທາລະນະສຸກ ໄດ້ເປິດຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ່ XXV ໃຫ້ແກ່ພະນັກງານ, ສະມາຊິກພັກ ໃນວັນທີ 31 ຕຸລາ 2022 ທີ່ຫ້ອງປະຊຸມສະຖາບັນສາທາລະນະສຸກສາດ ແລະ ການແພດເຂດຮ້ອນ ໂດຍການໃຫ້ກຽດເປັນປະທານຂອງ ສະຫາຍ ປອ. ດຣ. ບຸນແຝງ ພູມມະໄລສິດ ກໍາມະການສູນກາງພັກ ເລຂາຄະນະພັກກະຊວງ, ລັດຖະມົນຕີກະຊວງສາທາລະນະສຸກ, ເປັນກຽດເຂົ້າຮ່ວມມີສະຫາຍ ນ. ບຸນມີ ຈຸນລະຈັກ ຮອງເລຂາຄະນະພັກ, ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ, ມີບັນດາວິທະຍາກອນ, ຄະນະຮັບຜິດຊອບຊຸດຝຶກອົບຮົມ ແລະ ສໍາມະນາກອນທີ່ມາຈາກກົມກອງອ້ອມຂ້າງກະຊວງສາທາລະນະສຸກ ທັງໝົດ 46 ສະຫາຍ, ຍິງ 19 ສະຫາຍ.
ຊຸດຝຶກອົບຮົມຄັ້ງນີ້ ສຳມະນາກອນຈະໄດ້ຄົ້ນຄວ້າຮ່ຳຮຽນພື້ນຖານຂອງທິດສະດີມາກ-ເລນິນ ແລະ ແນວທາງນະໂຍບາຍຂອງພັກ ມີທັງໝົດ 5 ພາກວິຊາ ແລະ 40 ບົດຄື: 1. ພາກວິຊາປັດຊະຍາ 8 ບົດ; 2. ພາກວິຊາເສດຖະສາດການເມືອງ ແລະ ແນວທາງເສດຖະກິດຂອງພັກ 10 ບົດ; 3. ພາກວິຊາລັດທິສັງຄົມນິຍົມວິທະຍາສາດ 8 ບົດ; 4. ພາກ ວິຊາບໍລິຫານສາດ 8 ບົດ; 5. ພາກວິຊາກໍ່ສ້າງພັກ 5 ບົດ ແລະ ແນວທາງສາທາລະນະສຸກຂອງພັກ 1 ບົດ.
ຕອນທ້າຍຂອງພິທີ ສຳມະກອນຍັງໄດ້ຮັບຟັງຄຳເຫັນໂອ້ລົມຂອງສະຫາຍ ປອ. ດຣ. ບຸນແຝງ ພູມມະໄລສິດ ກຳມະການສູນກາງພັກ ເລຂາຄະນະພັກກະຊວງ, ລັດຖະມົນຕີກະຊວງສາທາລະນະສຸກ ເຊິ່ງສະຫາຍໄດ້ຮຽກຮ້ອງເຖິງສຳມະກອນທຸກສະຫາຍ ທີ່ເຂົ້າຮ່ວມຝຶກອົບຮົມຄັ້ງນີ້ ຈົ່ງພ້ອມກັນເອົາໃຈໃສ່ຄົ້ນຄວ້າຮ່ຳຮຽນ, ແລກປ່ຽນບົດຮຽນປະກອບຄຳຄິດເຫັນນຳວິທະຍາກອນທີ່ມາສິດສອນ ເພື່ອກຳແໜ້ນບົດຮຽນ, ທິດສະດີມາກ-ເລນິນ, ແນວຄິດປະທານ ໄກສອນ ພົມວິຫານ, ບັນດາຫຼັກມູນພື້ນຖານ, ກົດໝາຍ ກໍຄືແນວທາງນະໂຍບາຍຂອງພັກ ແລະ ກົດໝາຍຂອງລັດຢ່າງຈະແຈ້ງ. ກາຍເປັນພະນັກງານຫຼັກແຫຼ່ງທີ່ເຂັ້ມແຂງ ມີຄຸນນະພາບ ເຮັດສຳເລັດທຸກໜ້າທີ່ຕາມການມອບໝາຍຂອງການຈັດຕັ້ງ. ຊຸດຝຶກອົບຮົມດັ່ງກ່າວ ຈະດຳເນີນການຮຽນການສອນໄປຈົນເຖິງວັນທີ 23/12/2022 ຈິ່ງຈະສໍາເລັດ.
