ບົດຂ່າວ: ສົມໄຊ ຫຼ້າດວງມະນີ ນັກຂ່າວ ຄຈຂ ຊຽງຂວາງ
ຮູບພາບ: ຈິດວິຊານ ວາງຊຶຊາງວ່າງ ນັກຂ່າວ ຄຈຂ ຫົວພັນ
ເພື່ອເປັນການເສີມຂະຫຍາຍສາຍພົວພັນຮ່ວມມືລະຫວ່າງແຂວງຊຽງຂວາງ ແລະ ແຂວງຫົວພັນ ກໍ່ຄືລະຫວ່າງຄະນະຈັດຕັ້ງແຂວງຊຽງຂວາງ ແລະ ຄະນະຈັດຕັ້ງແຂວງຫົວພັນ; ໃນລະຫວ່າງວັນທີ 13-16 ຕຸລາ 2022 ຄະນະຈັດຕັ້ງແຂວງ-ຄະນະຈັດຕັ້ງເມືອງ ແຂວງຊຽງຂວາງ ແລະ ຄະນະຈັດຕັ້ງແຂວງ-ຄະນະຈັດຕັ້ງເມືອງ ແຂວງຫົວພັນ ໄດ້ພົບປະແລກປ່ຽນບົດຮຽນຮ່ວມກັນທີ່ແຂວງຫົວພັນ, ມີການນຳພ້ອມດ້ວຍຄະນະທັງສອງຝ່າຍເຂົ້າຮ່ວມ, ຄະນະຈັດຕັ້ງແຂວງຊຽງຂວາງ ນຳໂດຍ ສະຫາຍ ສູນທອນ ພັນມີໄຊ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງຊຽງຂວາງ ແລະ ຄະນະຈັດຕັ້ງແຂວງຫົວພັນ ນຳໂດຍ ສະຫາຍ ນາງ ລ້ອງຄຳ ພອນມີໄຊ ກໍາມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງຫົວພັນ, ມີຮອງຫົວໜ້າຄະນະຈັດຕັ້ງແຂວງ, ຜູ້ຕາງໜ້າຄະນະຈັດຕັ້ງບັນດາເມືອງ, ຫົວໜ້າຂະແໜງ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການຄະນະຈັດຕັ້ງແຂວງທັງສອງແຂວງເຂົ້າຮ່ວມທັງໝົດ 47 ສະຫາຍ, ຍິງ 13 ສະຫາຍ.
ການພົບປະແລກປ່ຽນບົດຮຽນໃນຄັ້ງນີ້ແມ່ນເພື່ອທົບທວນຄືນຜົນການຈັດຕັ້ງປະຕິບັດວຽກງານປັບປຸງກົງຈັກການຈັດຕັ້ງ, ກໍ່ສ້າງພັກ-ກໍ່ສ້າງພະນັກງານ ແລະ ພາລະບົດບາດໜ້າທີ່ເປັນເສນາທິການໃຫ້ຄະນະພັກຂັ້ນເທິງ ເພື່ອຕີລາຄາ ແລະ ຖອນຖອນບົດຮຽນ; ໃນພິທີພົບປະຄະນະຈັດຕັ້ງສອງແຂວງໄດ້ພັດປ່ຽນກັນລາຍງານສະພາບພົ້ນເດັ່ນໃນການຈັດຕັ້ງປະຕິບັດວຽກງານຂອງຕົນໃນໄລຍະຜ່ານມາ ຍົກໃຫ້ເຫັນທັງດ້ານດີ, ດ້ານອ່ອນ-ຂໍ້ຄົງຄ້າງທີ່ຈະຕ້ອງສືບຕໍ່ແກ້ໄຂ ແລະ ສະເໜີທິດທາງແຜນການສືບຕໍ່ຮ່ວມມືໃນຕໍ່ໜ້າ. ຈາກນັ້ນ, ຄະນະຜູ້ແທນທັງສອງແຂວງ ໄດ້ສົນທະນາແລກປ່ຽນບົດຮຽນເຊິ່ງກັນ ແລະ ກັນເປັນຕົ້ນ: ວຽກງານປັບປຸງກົງຈັກການຈັດຕັ້ງ, ວຽກງານກໍ່ສ້າງພັກ, ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ, ວຽກງານນະໂຍບາຍຕໍ່ສະມາຊິກພັກ; ໃນນັ້ນ ວຽກງານທີ່ພົ້ນເດັ່ນກວ່າໝູ່ແມ່ນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມຄໍາສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 03 ມັງກອນ 2018, ວຽກງານການຂະຫຍາຍສະມາຊິກພັກຢູ່ສຳນັກງານ-ອົງການອ້ອມຂ້າງເມືອງ-ແຂວງ ແລະ ຂັ້ນຮາກຖານບ້ານ, ການອອກບັດ-ມອບບັດສະມາຊິກພັກສົມບູນ, ວຽກງານກອງປະຊຸມໃຫຍ່ໜ່ວຍພັກບ້ານ, ຄະນະປົກຄອງບ້ານ, ການປັບປຸງແກ້ໄຂປະກົດການຫຍໍ້ທໍ້ຕ່າງໆຢູ່ຮາກຖານພັກບ້ານ, ການຢັ້ງຢືນ ແລະ ທຽບລະດັບທິດສະດີ, ການຍົກຍ້າຍສະມາຊິກພັກ-ພະນັກງານ, ນະໂຍບາຍຕໍ່ພະນັກງານທີ່ໄປຍົກລະດັບວິຊາສະເພາະ, ຮຽນທິດສະດີທັງພາຍໃນ ແລະ ຕ່າງປະເທດ, ການປະຕິບັດນະໂຍບາຍຕໍ່ພະນັກງານທີ່ເສຍຊີວິດທັງຜູ້ປະຈຳການ ແລະ ພະນັກງານບໍານານ.
ກອງປະຊຸມພົບປະແລກປ່ຽນບົດຮຽນຄັ້ງນີ້ ທັງສອງຝ່າຍໄດ້ຕົກລົງເຫັນດີເປັນເອກະພາບກັນໃນບົດບັນທຶກການຮ່ວມມືລະຫວ່າງຄະນະຈັດຕັ້ງແຂວງຫົວພັນ ກັບ ຄະນະຈັດຕັ້ງແຂວງຊຽງຂວາງ ເພື່ອແລກປ່ຽນບົດຮຽນເຊິ່ງກັນ ແລະ ກັນ ໂດຍປ່ຽນກັນເປັນເຈົ້າພາບປີລະຄັ້ງ ເຊິ່ງເລີ່ມແຕ່ປີ 2023 ເປັນຕົ້ນໄປ.
ໃນໂອກາດພົບປະແລກປ່ຽນບົດຮຽນຢູ່ແຂວງຫົວພັນຄັ້ງນີ້ ຄະນະຈັດຕັ້ງແຂວງຫົວພັນໄດ້ນຳພາຄະນະຜູ້ແທນຄະນະຈັດຕັ້ງແຂວງຊຽງຂວາງ ທັດສະນະທ່ຽວຊົມບັນດາຖ້ຳທ່ານຜູ້ນຳການປະຕິວັດ ຢູ່ທີ່ເມືອງວຽງໄຊ ຖານທີ່ໝັ້ນຂອງການປະຕິວັດລາວ, ທ່ຽວຊົມພູຜາຖີ່ ຍຸດທະສາດທາງການທະຫານໃນສະໄໝຕໍ່ສູ້ກູ້ຊາດ ແລະ ຍັງໄດ້ຈັດກິດຈະກຳຫຼິ້ນກິລາມິດຕະພາບ ເພື່ອສືບຕໍ່ຮັດແໜ້ນຄວາມສາມັກຄີອັນເປັນມູນເຊື້ອ ແລະ ເປັນບົດຮຽນທີ່ດີໃຫ້ຄະນະຈັດຕັ້ງທັງສອງແຂວງໃນການຈັດຕັ້ງປະຕິບັດແຜນນະໂຍບາຍ ແລະ ການວາງທິດທາງແຜນການວຽກງານວິຊາສະເພາະໃນຕໍ່ໜ້າ ໃຫ້ສອດຄ່ອງກັບສະພາບຄວາມເປັນຈິງຂອງທ້ອງຖິ່ນຕົນໃນຕໍ່ໜ້າ...ຯ
