ໂດຍ: ສົມໄຊ ຫຼ້າດວງມະນີ
ນັກຂ່າວແຂວງຊຽງຂວາງ
ໃນວັນທີ 05 ສິງຫາ 2022 ຄະນະຈັດຕັ້ງແຂວງຊຽງຂວາງໄດ້ຈັດພິທີປະກາດການແຕ່ງຕັ້ງຮອງຫົວໜ້າຄະນະຈັດຕັ້ງແຂວງ ໂດຍການເຂົ້າຮ່ວມຂອງສະຫາຍ ສູນທອນ ພັນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ມີສະຫາຍ ຄຳສີ ວິໄລສັກ ເລຂາໜ່ວຍພັກ, ຮອງຫົວໜ້າຄະນະຈັດຕັ້ງແຂວງ, ມີຄະນະໜ່ວຍພັກ, ພະນັກງານ-ລັດຖະກອນພາຍໃນຄະນະຈັດຕັ້ງແຂວງຊຽງຂວາງເຂົ້າຮ່ວມ.
ໃນພິທີໄດ້ປະກາດແຕ່ງຕັ້ງ ສະຫາຍ ຄຳໄຊ ບຸນເພັດ ຄະນະໜ່ວຍພັກ, ຫົວໜ້າຂະແໜງຄຸ້ມຄອງພະນັັກງານ ຂຶ້ນເປັນຮອງຫົວໜ້າຄະນະຈັດຕັ້ງແຂວງຊຽງຂວາງ ຕາມມະຕິຕົກລົງຂອງຄະນະປະຈຳພັກແຂວງຊຽງຂວາງ ສະບັບເລກທີ 280/ຄປພຂ, ລົງວັນທີ 03 ສິງຫາ 2022 ວ່າດ້ວຍການແຕ່ງຕັ້ງຮອງຫົວໜ້າຄະນະຈັດຕັ້ງແຂວງຊຽງຂວາງ. ຈາກນັ້ນ ສະຫາຍ ສູນທອນ ພັນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ ໄດ້ໃຫ້ກຽດມອບມະຕິຕົກລົງ ແລະ ມີຄຳເຫັນໂອ້ລົມຕໍ່ພິທີ ເຊິ່ງສະຫາຍໄດ້ເນັ້ນໃຫ້ຮອງຫົວໜ້າຄະນະຈັດຕັ້ງແຂວງຜູ້ໃໝ່ ພ້ອມດ້ວຍບັນດາສະຫາຍໃນຄະນະພັກ ແລະ ພະນັກງານ-ລັດຖະກອນພາຍໃນຄະນະຈັດຕັ້ງແຂວງຊຽງຂວາງ ຈົ່ງພ້ອມກັນເອົາໃຈໃສ່ຄົ້ນຄວ້າກຳແໜ້ນນິຕິກຳຕ່າງໆໃຫ້ເລິກເຊິ່ງ ປະຕິບັດໜ້າທີ່ວຽກງານຂອງຕົນໃຫ້ສຳເລັດຜົນຕາມການມອບໝາຍ.
ໃນວັນທີ 10 ສິງຫາ 2022 ໄດ້ສືບຕໍ່ຈັດພິທີປະກາດການຈັດຕັ້ງ ຂັ້ນຫົວໜ້າຂະແໜງ, ຮອງຫົວໜ້າຂະແໜງພາຍໃນຄະນະຈັດຕັ້ງແຂວງ ແລະ ເຊື່ອມຊຶມມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະຈັດຕັ້ງແຂວງ ໂດຍການເຂົ້າຮ່ວມຂອງສະຫາຍ ສູນທອນ ພັນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ມີສະຫາຍ ຄຳສີ ວິໄລສັກ ເລຂາໜ່ວຍພັກ, ຮອງຫົວໜ້າຄະນະຈັດຕັ້ງແຂວງ ພ້ອມດ້ວຍພະນັກງານ-ລັດຖະກອນພາຍໃນຄະນະຈັດຕັ້ງແຂວງຊຽງຂວາງເຂົ້າຮ່ວມ.
ໃນພິທີໄດ້ຈັດເປັນ 2 ວາລະຄື: ວາລະທຳອິດໄດ້ເຊື່ອມຊຶມມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະຈັດຕັ້ງແຂວງ ໂດຍການບັນຍາຍຂອງສະຫາຍ ຄຳສີ ວິໄລສັກ ເລຂາໜ່ວຍພັກ, ຮອງຫົວໜ້າຄະນະຈັດຕັ້ງແຂວງ ເຊິ່ງເນື້ອໃນໄດ້ຍົກໃຫ້ເຫັນພາລະບົດບາດ ແລະ ການເຄື່ອນໄຫວຂອງຄະນະຈັດຕັ້ງແຂວງ ໃນການເປັນເສນາທິການວຽກງານຈັດຕັ້ງໃຫ້ຄະນະບໍລິຫານງານພັກແຂວງ ເຊິ່ງບັນດາສະຫາຍສະມາຊິກພັກ, ພະນັກງານ-ລັດຖະກອນພາຍໃນຄະນະຈັດຕັ້ງແຂວງ ຈະຕ້ອງໄດ້ພ້ອມກັນເປັນເຈົ້າການປະຕິບັດໜ້າທີ່ວຽກງານວິຊາສະເພາະຂອງຕົນໃຫ້ບັນລຸຜົນສຳເລັດຕາມການມອບໝາຍ.
ໃນວາລະທີ 2 ໄດ້ປະກາດຍົກຍ້າຍ, ແຕ່ງຕັ້ງ, ຊັບຊ້ອນ ຂັ້ນຫົວໜ້າຂະແໜງ, ຮອງຫົວໜ້າຂະແໜງ ຕາມຂໍ້ຕົກລົງຂອງຫົວໜ້າຄະນະຈັດຕັ້ງແຂວງຊຽງຂວາງ ສະບັບເລກທີ 22/ຄຈຂ, ລົງວັນທີ 09 ສິງຫາ 2022 ວ່າດ້ວຍການບັນຈຸ, ຊັບຊ້ອນພະນັກງານພາຍໃນຄະນະຈັດຕັ້ງແຂວງ ດັ່ງມີລາຍຊື່ລຸ່ມນີ້:
1. ທ່ານ ສົມພອນ ພັນທະລັງສີ ຫົວໜ້າຂະແໜງຈັດຕັ້ງ-ນະໂຍບາຍ ເປັນຫົວໜ້າຂະແໜງຈັດຕັ້ງ ແລະ ກົດລະບຽບພັກ.
2. ທ່ານ ນາງ ສຸດສະໝອນ ວົງທອງຈິດ ຫົວໜ້າຂະແໜງປ້ອງກັນພັກ-ພະນັກງານ ເປັນຫົວໜ້າຂະແໜງພະນັກງານ.
3. ທ່ານ ຫັດສະດີ ສອນພະຈັນ ເປັນຫົວໜ້າຂະແໜງບໍລິຫານ-ສັງລວມ.
4. ທ່ານ ສຸວອນ ພົມມະວີ ເປັນຫົວໜ້າຂະແໜງພັກ.
5. ທ່ານ ນາງ ບົວຈິດ ຄໍາມະນີວົງ ຮອງຫົວໜ້າຂະແໜງບໍລິຫານ-ສັງລວມ ເປັນຮອງຫົວໜ້າຂະແໜງຈັດຕັ້ງ ແລະ ກົດລະບຽບພັກ.
6. ທ່ານ ສົມໄຊ ຫຼ້າດວງມະນີ ຮອງຫົວໜ້າຂະແໜງຈັດຕັ້ງ-ນະໂຍບາຍ ເປັນຮອງຫົວໜ້າຂະແໜງບໍລິຫານ-ສັງລວມ.
ໃນຕອນທ້າຍ ສະຫາຍ ສູນທອນ ພັນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ ໄດ້ມີຄຳເຫັນໂອ້ລົມຕໍ່ພິທີ ເຊິ່ງສະຫາຍໄດ້ກ່າວວ່າ: ການແຕ່ງຕັ້ງ, ຍົກຍ້າຍ, ຊັບຊ້ອນ ຄັ້ງນີ້ ແມ່ນປະຕິບັດຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ, ຕອບສະໜອງໄດ້ໜ້າທີ່ການເມືອງໃນແຕ່ລະໄລຍະ ທັງເປັນການມອບໝາຍໜ້າທີ່ຄວາມຮັບຜິດຊອບຢ່າງຖືກຕ້ອງ; ບັນດາສະຫາຍທີ່ໄດ້ຮັບການແຕ່ງຕັ້ງ, ຍົກຍ້າຍ, ຊັບຊ້ອນ ຈົ່ງພ້ອມກັນຄົ້ນຄວ້ານິຕິກໍາຕ່າງໆສ້າງຄວາມເຂົ້າໃຈ ແລະ ກຳແໜ້ນໜ້າທີ່ວຽກງານຄວາມຮັບຜິດຊອບໃໝ່ຂອງຕົນໃຫ້ເລິກເຊິ່ງ ສາມາດເປັນເສນາທິການໃຫ້ຄະນະຈັດຕັ້ງແຂວງ ເຮັດລ້ອນໜ້າທີ່ການເມືອງທີ່ໄດ້ຮັບການມອບໝາຍ.