ໂດຍ: ນ.ວິລະສະໄໝ
ໃນວັນທີ 15 ກໍລະກົດ 2022 ຢູ່ທີ່ກະຊວງແຜນການ ແລະ ການລົງທຶນ ໄດ້ຈັດພິທີໂຄສະນາ-ປາຖະກະຖາ ປີສາມັກຄີມິດຕະພາບ ລາວ-ຫວຽດນາມ (ວັນເຊັນສົນທິສັນຍາມິດຕະພາບ-ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ); ພ້ອມນີ້ ໃນວາລະທີ 2 ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ; ມອບໃບຍ້ອງຍໍຜົນງານປະຈໍາປີ 2021 ແລະ ມອບບັດສະມາຊິກພັກສົມບູນ ຊຸດທີ VIII.
ໃຫ້ກຽດເຂົ້າຮ່ວມພິທີດັ່ງກ່າວ, ປາຖະກະຖາ ແລະ ມອບໃບຢັ້ງຢືນ ໂດຍສະຫາຍ ຄຳເຈນ ວົງໂພສີ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງແຜນການ ແລະ ການລົງທຶນ, ມີຄະນະພັກກະຊວງ, ຄະນະກົມ, ຫ້ອງການ, ຄະນະພະແນກ, ສະມາຊິກພັກສົມບູນ-ສໍາຮອງ ແລະ ພະນັກງານ-ລັດຖະກອນ ພາຍໃນກະຊວງແຜນການ ແລະ ການລົງທຶນ ເຂົ້າຮ່ວມ 300 ກວ່າສະຫາຍ, ຍິງ 143 ສະຫາຍ.
ເພື່ອເປັນການຈາລຶກຄຸນງາມຄວາມດີຂອງພັກ-ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງ ແລະ ລໍ້າຄ່າໃນໄລຍະການຕໍ່ສູ້ປົດປ່ອຍຊາດ ກໍ່ຄືພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດ ສປປ ລາວ ທັງເປັນການປະກອບສ່ວນຂອງປະຊາຊົນລາວບັນດາເຜົ່າ ເຂົ້າໃນການທ້ອນໂຮມປະເທດ ສສ ຫວຽດນາມ ໃຫ້ເປັນອັນໜຶ່ງອັນດຽວໃນເມື່ອກ່ອນ ແລະ ການປົກປັກຮັກສາ, ສ້າງສາພັດທະນາປະເທດ ສສ ຫວຽດນາມ ໃນປະຈຸບັນ; ໃນປີ 2022 ນີ້ ພໍດີ ຄົບຮອບ 45 ປີ (18/7/1977-17/7/2022) ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຫວຽດນາມ-ລາວ ແລະ ຄົບຮອບ 60 ປີ (5/9/1962-5/9/2022) ວັນສ້າງຕັ້ງສາຍພົວພັນການທູດ ລາວ-ຫວຽດນາມ ເຊິ່ງເປັນປີສາມັກຄີມິດຕະພາບ ລາວ-ຫວຽດນາມ.
ຕະລອດໄລຍະເຄິ່ງສະຕະວັດທີ່ຜ່ານມາ ສອງຊາດລາວ-ຫວຽດນາມ ໄດ້ຄຽງບ່າຄຽງໄຫຼ່ກັນຕໍ່ສູ້ຢ່າງພິລະອາດຫານ, ຜ່ານຜ່າທຸກອຸປະສັກທຸລະກັນດານ ທີ່ເຕັມໄປດ້ວຍຄວາມເສຍສະຫຼະ ໄດ້ສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ນັບມື້ນັບເພີ່ມທະວີຄວາມເລິກເຊິ່ງຍິ່ງຂຶ້ນ. ປະທານສຸພານຸວົງ ເວົ້າວ່າ “.....ທະນຸຖະໜອມມິດຕະພາບນັ້ນ ຄືກັນກັບເກືອຮັກສາຄວາມເຄັມ, ໝາກເພັດຮັກສາຄວາມຮ້ອນ, ຕາບໃດຍັງມີຟ້າ ແລະ ດິນ, ຕາບນັ້ນກໍ່ຍັງມີຄວາມສາມັກຄີ ລາວ-ຫວຽດນາມ”
ນອກຈາກປາຖະກະຖາແລ້ວ ວາລະຕໍ່ມາໄດ້ມີພິທີມອບໃບຢັ້ງຢືນ ໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ໃຫ້ກັບ 17 ໜ່ວຍພັກຄື: ໜ່ວຍພັກ ຫ້ອງການ ສູນສະຖິຕິແຫ່ງຊາດ; ໜ່ວຍພັກ ກົມສະຖິຕິເສດຖະກິດ; ໜ່ວຍພັກ ກົມສະຖິຕິສັງຄົມ; ໜ່ວຍພັກ ກົມບໍລິການສະຖິຕິ; ໜ່ວຍພັກ ຫ້ອງການ ກະຊວງ ຜທ; ໜ່ວຍພັກກົມຈັດຕັ້ງ ແລະ ພະນັກງານ; ໜ່ວຍພັກ ກົມກວດກາ; ໜ່ວຍພັກ ກົມນິຕິກໍາ; ໜ່ວຍພັກ ກົມແຜນການ; ໜ່ວຍພັກ ກົມປະເມີນຜົນ; ໜ່ວຍພັກ ກົມສົ່ງເສີມການລົງທຶນ; ໜ່ວຍພັກ ກົມຮ່ວມມືສາກົນ; ໜ່ວຍພັກ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ; ໜ່ວຍພັກ ຫ້ອງການຄະນະກໍາມະການຮ່ວມມື ລາວ-ຫວຽດນາມ; ໜ່ວຍພັກ ຫ້ອງການຄະນະກໍາມະການຮ່ວມມື ລາວ-ຈີນ; ໜ່ວຍພັກ ສະຖາບັນຄົ້ນຄວ້າວິໄຈການພັດທະນາ ແລະ ໜ່ວຍພັກ ສູນຝຶກອົບຮົມພະນັກງານຄຸ້ມຄອງເສດຖະກິດແຜນການ.
ໃນລາລະສຸດທ້າຍ ໄດ້ຈັດພິທີຍ້ອງຍໍຜົນງານ ປະຈຳປີ 2021 ໃຫ້ການຈັດຕັ້ງ ແລະ ບຸກຄົນ; ໃນນີ້ ໄດ້ຍ້ອງຍໍການຈັດຕັ້ງ 17 ກົມກອງ ແລະ ບຸກຄົນ 619 ທ່ານ, ຍິງ 230 ທ່ານ. ນັ້ນໃນ ໄດ້ຮັບໃບຍ້ອງຍໍຂັ້ນກະຊວງ 606 ທ່ານ, ຍິງ 233 ທ່ານ ແລະ ໃບຊົມເຊີຍ 13 ທ່ານ, ຍິງ 07 ທ່ານ. ພ້ອມນີ້ ຍັງໄດ້ມອບຮັບ ບັດສະມາຊິກພັກສົມບູນ ຊຸດທີ VIII ຈໍານວນ 46 ສະຫາຍ, ຍິງ 19 ສະຫາຍ.