ໂດຍ: ສ.ສົດໃສ
ໃນວັນທີ 28 ມິຖຸນາ 2022 ກະຊວງການຕ່າງປະເທດ ໄດ້ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງ ຂອງກະຊວງການຕ່າງປະເທດ ໂດຍການເປັນປະທານຂອງສະຫາຍ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ ເລຂາຄະນະບໍລິຫານງານພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ໂດຍມີຄະນະພັກກະຊວງ, ຮອງລັດຖະມົນຕີ, ຄະນະໜ່ວຍພັກ, ຄະນະຫ້ອງການ, ຫົວໜ້າກົມ, ຮອງຫົວໜ້າກົມ ແລະ ຫົວໜ້າພະແນກທີ່ເປັນຄະນະໜ່ວຍພັກພາຍໃນກະຊວງການຕ່າງປະເທດ ແລະ ພະນັກງານຈາກຄະນະຈັດຕັ້ງສູນກາງພັກຈຳນວນໜຶ່ງເຂົ້າຮ່ວມ.
ໃນວາລະຂອງກອງປະຊຸມ ສະຫາຍ ສະເຫຼີມໄຊ ກົມມະສິດ ໄດ້ກ່າວເປີດກອງປະຊຸມ ເຊິ່ງໄດ້ຍົກໃຫ້ເຫັນເຖິງຄວາມໝາຍ ຄວາມສຳຄັນໃນການສ້າງແຜນກຳນົດພະນັກງານ ໂດຍການຄາດຄະເນເປົ້າໝາຍພະນັກງານທີ່ຈະຈັດວາງເຂົ້າໃນຕຳແໜ່ງນຳພາ-ຄຸ້ມຄອງ ຂັ້ນສູນກາງຄຸ້ມຄອງໃນກະຊວງຂອງຕົນ ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງ ເພື່ອຕອບສະໜອງກັບໜ້າທີ່ການເມືອງຂອງພັກ-ລັດໃນສະເພາະໜ້າ ແລະ ຍາວນານ ເປັນການຫັນຍຸດທະສາດກ່ຽວກັບວຽກງານພະນັກງານໃຫ້ເປັນອັນລະອຽດ ທັງເປັນພື້ນຖານໃຫ້ແກ່ການສ້າງແຜນກໍ່ສ້າງ-ບຳລຸງ, ຄາດຄະເນສັບຊ້ອນ ແລະ ຈັດວາງພະນັກງານຢ່າງສົມເຫດສົມຜົນ.
ພ້ອມນັ້ນ ສະຫາຍຍັງໄດ້ແນະນຳໃຫ້ຜູ້ເຂົ້າຮ່ວມຄົ້ນຄວ້າຢ່າງເລິກເຊິ່ງຕໍ່ກັບເປົ້າໝາຍທີ່ຈະເລືອກເຟັ້ນກຳນົດເຂົ້າໃສ່ແຕ່ລະຕຳແໜ່ງ, ຕ້ອງຄັດເລືອກໃຫ້ໄດ້ບຸກຄົນທີ່ພົ້ນເດັ່ນ ພຽບພ້ອມໄປດ້ວຍຄວາມຮູ້, ຄວາມສາມາດ, ຄຸນສົມບັດສິນທຳປະຕິວັດ, ຮູ້ຜັນຂະຫຍາຍແນວທາງນະໂຍບາຍ ແລະ ນິຕິກຳຕ່າງໆຂອງພັກ-ລັດ ເຂົ້າໃນການນຳພາປະຕິບັດໜ້າທີ່ວຽກງານ, ມີພາວະຄວາມເປັນຜູ້ນຳ, ໂດຍສະເພາະແມ່ນການນຳພາພະນັກງານ-ລັດຖະກອນ ແລະ ມະຫາຊົນເຄື່ອນໄຫວວຽກງານຕ່າງໆທີ່ການຈັດຕັ້ງມອບໝາຍໃຫ້, ມີຄວາມສະດຸ້ງໄວຕໍ່ບັນຫາຕ່າງໆ, ແກ້ໄຂບັນຫາຕ່າງໆຢ່າງມີປະສິດທິຜົນ, ມີຄວາມດຸໝັ່ນ, ພາກພຽນ, ປະຢັດ, ສັດຊື່, ປອດໃສ, ບໍ່ຫຼິ້ນກິນຟູມເຟືອຍ, ບໍ່ສໍ້ລາດບັງຫຼວງ, ມີທັດສະນະມະຫາຊົນ ແລະ ເປັນເຈົ້າການໃນການເຕົ້າໂຮມຄວາມສາມັກຄີ, ເຮັດວຽກມີແບບແຜນ, ມີໂຄງການ, ມີການຊຸກຍູ້ຕິດຕາມ, ກວດກາ, ສະຫຼຸບຕີລາຄາ, ຖອດຖອນບົດຮຽນ ແລະ ໃກ້ຊິດຕິດແທດກັບມະຫາຊົນຢ່າງແທ້ຈິງ.
ເພື່ອສາມາດເລືອກໄດ້ບຸກຄົນຄືດັ່ງກ່າວ ສະຫາຍຍັງໃຫ້ທິດຊີ້ນຳວ່າ ຕ້ອງຫຼີກລ້ຽງແນວຄິດອິດສາບັງບຽດ, ກຸ່ມກ້ອນ, ແນວຄິດພັກພວກ, ເພື່ອນສະໜິດມິດສະຫາຍ ເພື່ອສ້າງເຄືອຂ່າຍ ແລະ ຜົນປະໂຫຍດໃດໜຶ່ງແກ່ຕົນເອງ; ຕ້ອງກ້າສົ່ງເສີມບຸກຄົນທີ່ດີເດັ່ນ ແລະ ມີມາດຖານເງື່ອນໄຂຄົບຖ້ວນເຂົ້າໃນຕຳແໜ່ງນຳພາ-ຄຸ້ມຄອງ. ການສ້າງແຜນກຳນົດພະນັກງານ ຕ້ອງຮັບປະກັນລັກສະນະເປີດກວ້າງ, ມີຄວາມໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ຕ້ອງຮັບປະກັນໂຄງປະກອບເພດ, ເຜົ່າ ແລະ ເລັ່ງໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ.
ຈາກນັ້ນ, ສະຫາຍ ຕິ່ງ ສຸກສັນ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດ ໄດ້ຜ່ານມະຕິຂອງກົມການເມືອງສູນກາງພັກ ເລກທີ 032/ກມສພ ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ຂຶ້ນຜ່ານຄຳແນະນຳຂອງຄະນະຈັດຕັ້ງສູນກາງພັກ ເລກທີ 292/ຄຈສພ ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ.
ກອງປະຊຸມ ຈະດຳເນີນການປ່ອນບັດທາບທາມ 3 ຮອບ ໃຊ້ເວລາ 3 ວັນ ເຊິ່ງຈະອັດລົງໃນວັນທີ 30 ມິຖຸນາ 2022.
