ແຫຼ່ງຂ່າວ: ກະຊວງສາທາລະນະສຸກ
ພາບ: ພອນສະຫວັນ ລາຊະບັນເທົາ
ໃນລະຫວ່າງວັນທີ 27-30 ມິຖຸນາ 2022 ກະຊວງສາທາລະນະສຸກໄດ້ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ທີ່ຂື້ນກັບສິດຄຸ້ມຄອງຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກ ຂື້ນທີ່ ມະຫາວິທະຍາໄລ ວິທະຍາສາດ ສຸຂະພາບ ວິທະຍາເຂດດົງໂພສີ ພາຍໃຕ້ການເປັນປະທານຮ່ວມຂອງສະຫາຍ ປອ.ດຣ.ບຸນແຝງ ພູມມະໄລສິດ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງສາທາລະນະສຸກ ແລະ ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ.
ຈຸດປະສົງຂອງກອງປະຊຸມຄັ້ງນີ້ແມ່ນເພື່ອປະຕິບັດ ມະຕິຂອງກົມການເມືອງສູນກາງພັກ ເລກທີ 032/ກມສພ ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ, ຄໍາແນະນໍາ ເລກທີ 292/ຄຈສພ ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ, ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 158/ຄຈສພ, ລົງວັນທີ 01 ຕຸລາ 2021. ເປົ້າໝາຍຕຳແໜ່ງທີ່ຈະທາບທາມໃນຄັ້ງນີ້ປະກອບດ້ວຍ 7 ຕຳແໜ່ງ ດັ່ງນີ້: 1). ເລຂາຄະນະພັກກະຊວງ, ລັດຖະມົນຕີ; 2) ຮອງເລຂາຄະນະພັກກະຊວງ; 3) ຮອງລັດຖະມົນຕີ; 4) ກຳມະການປະຈຳພັກກະຊວງ; 5) ກຳມະການພັກກະຊວງ; 6) ບັນດາຕຳແໜ່ງຫົວໜ້າກົມ ແລະ ທຽບເທົ່າ (7 ກົມ, 2 ຫ້ອງການ, 2 ສະຖາບັນ 5 ໂຮງໝໍສູນກາງ ແລະ ສູນການແພດຟື້ນຟູໜ້າທີ່ການ); 7) ບັນດາຕຳແໜ່ງໃນ ມະຫາວິທະຍາໄລ ວິທະຍາສາດສຸຂະພາບ (ອະທິການບໍດີ, ຮອງອະທິການບໍດີ, 6 ຄະນະວິຊາ, 2 ຫ້ອງການ ແລະ 1 ສະຖາບັນ).
ກອງປະຊຸມໄດ້ຈັດການທາບທາມເປັນ 3 ຮອບ ໂດຍຜູ້ເຂົ້າຮ່ວມທາບທາມ ຮອບທີ 1 ປະກອບມີ: ຄະນະບໍລິຫານງານພັກກະຊວງ, ລັດຖະມົນຕີ, ຮອງລັດຖະມົນຕີ ແລະ ທຽບເທົ່າ; ສະມາຊິກສະພາແຫ່ງຊາດທີ່ສັງກັດຢູ່ກະຊວງ; ຫົວໜ້າ-ຮອງຫົວໜ້າກົມ ແລະ ທຽບເທົ່າ; ຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກ ຄົບຊຸດ; ເລຂາ ຫຼື ປະທານອົງການຈັດຕັ້ງມະຫາຊົນກະຊວງ ແລະ ພະນັກງານບໍານານອະດີດການນຳຂັ້ນຮອງລັດຖະມົນຕີ ແລະ ທຽບເທົ່າຂື້ນໄປ ຈຳນວນ 256 ສະຫາຍ.
ຜູ້ເຂົ້າຮ່ວມທາບທາມ ຮອບທີ 2 ປະກອບມີ: ຄະນະບໍລິຫານງານພັກກະຊວງ; ລັດຖະມົນຕີ, ຮອງລັດຖະມົນຕີ ແລະ ທຽບເທົ່າ; ເລຂາ, ຮອງເລຂາຄະນະພັກຮາກຖານ; ເລຂາ, ຮອງເລຂາຄະນະໜ່ວຍພັກຮາກຖານ; ຫົວໜ້າກົມ ແລະ ທຽບເທົ່າ ຈຳນວນ 87 ສະຫາຍ. ສ່ວນຜູ້ເຂົ້າຮ່ວມທາບທາມຮອບ 3 ປະກອບມີ ຄະນະບໍລິຫານງານພັກກະຊວງ ຈຳນວນ 17 ສະຫາຍ.
ຂັ້ນຕອນ ແລະ ບາດກ້າວດຳເນີນການສ້າງແຜນກຳນົດພະນັກງານນຳພາ-ຄຸ້ມຄອງ ປະກອບດ້ວຍການເຊື່ອມຊຶມມະຕິຂອງກົມການເມືອງສູນກາງພັກ ເລກທີ 032/ກມສພ ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງໂດຍສະຫາຍ ປອ.ດຣ.ບຸນແຝງ ພູມມະໄລສິດ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງສາທາລະນະສຸກ, ຜ່ານມະຕິຂອງກົມການເມືອງສູນກາງພັກ ເລກທີ 030/ກມສພ, ລົງວັນທີ 03 ມັງກອນ 2018 ວ່າດ້ວຍມາດຕະຖານພະນັກງານນຳພາ-ຄຸ້ມຄອງ ໂດຍສະຫາຍ ດຣ. ສະໜອງ ທອງຊະນະ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງສາທາລະນະສຸກ, ຜ່ານບົດແນະນຳຂອງຄະນະຈັດຕັ້ງສູນກາງພັກເລກທີ 292/ກມສພ, ລົງວັນທີ 26 ເມສາ 2018 ວ່າດ້ວຍການຈັດຕັ້ງປະຕິບັດມະຕິເລກທີ 032/ກມສພ ໂດຍຜູ້ຕາງໜ້າຈາກຄະນະຈັດຕັ້ງສູນກາງພັກ. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ດຳເນີນການທາມທາບດ້ວຍຄວາມຮັບຜິດຊອບສູງ ໂດຍມີຄະນະຮັບຜິດຊອບດຳເນີນການຕາມບາດກ້າວຂັ້ນຕອນ ສະຫລຸບ-ສັງລວມຄະແນນ ແລະ ຜົນການທາບທາມແຕ່ລະຮອບ ພ້ອມທັງມີບົດລາຍງານສະຫລຸບຕີລາຄາຂໍ້ດີ, ຂໍ້ຄົງຄ້າງ ແລະ ບົດຮຽນທີຖອດຖອນໄດ້ ຜ່ານຕໍ່ກອງປະຊຸມຄະນະປະຈຳພັກກະຊວງ ໂດຍມີຕາງໜ້າຄະນະຈັດຕັ້ງສູນກາງພັກເຂົ້າຮ່ວມ.