ສະຫາຍ ນ. ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ ໃນວັນທີ 20 ເມສາ 2022 ໂດຍມີ ສະຫາຍ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆ ວຽງຈັນ ພ້ອມດ້ວຍຄະນະ ໃຫ້ການຕ້ອນຮັບ ແລະ ເຂົ້າຮ່ວມຕິດຕາມ.
ສະຫາຍ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆ ວຽງຈັນ ໄດ້ລາຍງານ ສະພາບການຊີ້ນໍາ-ນໍາພາວຽກງານຕ່າງໆ ໂດຍສະເພາະແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ການຜັນຂະຫຍາຍກົດລະບຽບຂອງພັກ ສະໄໝ ທີ XI, ແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX, ການພັດທະນາຊົນນະບົດແກ້ໄຂຄວາມທຸກຍາກຂອງປະຊາຊົນ, ການຈັດຕັ້ງປະຕິບັດສອງວາລະແຫ່ງຊາດ ແລະ ການຈັດຕັ້ງປະຕິບັດນິຕິກໍາກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງພາຍໃນແຂວງວຽງຈັນ ເຊິ່ງໄດ້ຍົກໃຫ້ເຫັນຂໍ້ສະດວກ, ຜົນງານທີ່ພົ້ນເດັ່ນຫຼາຍດ້ານ ແລະ ຂໍ້ຫຍຸ້ງຍາກຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ ແລະ ຕອບ່າຍຂອງວັນດຽວກັນນັ້ນ, ສະຫາຍ ຫົວໜ້າຄະນະຈັດຕັ້ງສູນກາງພັກຍັງໄດ້ໄປຢ້ຽມຢາມພົບປະພະນັກງານ-ສະມາຊິກພັກ ແລະ ພໍ່ແມ່ປະຊາຊົນຮາກຖານພັກບ້ານຢູ່ເມືອງທຸລະຄົມຈໍານວນໜຶ່ງ.
ໃນການເຄື່ອນໄຫວຢ້ຽມຢາມຄັ້ງນີ້ ສະຫາຍ ນ. ສີໃສ ລືເດດມູນສອນ ໄດ້ໂອ້ລົມຄະນະພັກ, ຄະນະນໍາ ແລະ ພະນັກງານ-ລັດຖະກອນຄະນະຈັດຕັ້ງແຂວງ, ຫົວໜ້າຄະນະ ຈັດຕັ້ງ 11 ເມືອງຂອງແຂວງວຽງຈັນ ດັ່ງນີ້: ພະນັກ ງານທີ່ເຮັດວຽກງານຈັດຕັ້ງຕ້ອງໄດ້ຝຶກຝົນຕົນເອງໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ, ຈັນຍາທໍາຂອງພະນັກງານ, ມີແນວຄິດຊື່ຕົງ, ບໍລິສຸດສັດຊື່, ບໍ່ເຫັນຜົນປະໂຫຍດຕົນເອງສູງກວ່າສ່ວນລວມ, ມີສາຍຕາເບິ່ງກວ້າງມອງໄກ; ຕ້ອງມີຄວາມອົດທົນ, ດຸໝັ້ນ, ຊອກຮູ້ຄົ້ນຄວ້າຮໍ່າຮຽນແນວທາງນະໂຍບາຍ, ມະຕິ, ຄໍາສັ່ງ, ຂໍ້ກໍານົດ, ບົດແນະນໍາຂອງພັກ, ກົດໝາຍ ແລະ ລະບຽບການຕ່າງໆຂອງລັດກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ; ຕ້ອງກໍາແໜ້ນປະຫວັດຕົ້ນກໍາເນີດ, ປະຫວັດການເຄື່ອນໄຫວຂອງພະນັກງານ-ລັດຖະກອນໃນແຕ່ລະໄລຍະ, ການປະສານງານລະຫວ່າງຄະນະຈັດຕັ້ງກັບຫ້ອງການພາຍໃນ, ສາຍຕັ້ງສາຍຂວາງ ລວມທັງລະບອບສ່ອງແສງລາຍງານໃຫ້ຄະນະພັກຂັ້ນຂອງຕົນເປັນປົກກະຕິ. ນອກຈາກນັ້ນວຽກງານກໍ່ສ້າງພັກຄະນະພັກຕ້ອງເພີ່ມທະວີການສຶກສາອົບຮົມມູນເຊື້ອການນໍາພາຂອງພັກ, ການເຄື່ອນໄຫວຊີ້ນໍາ-ນໍາພາຂອງຄະນະພັກແຂວງ, ພັກເມືອງແຕ່ລະໄລຍະໃຫ້ພະນັກງານ-ສະມາຊິກພັກ ກໍຄືປະຊາຊົນໄດ້ຮັບຮູ້ເຂົ້າໃຈຢ່າງເລິກເຊິ່ງທົ່ວເຖິງ, ຖືສໍາຄັນການຕິດຕາມເກັບກໍາສະພາບຫາງສຽງຂອງສັງຄົມ; ຄະນະພັກຕ້ອງຍົກສູງຄວາມຮັບຜິດຊອບຂອງຕົນຕໍ່ກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄືຂອງອົງຄະນະພັກຕົນ, ເອົາໃຈໃສ່ການກໍ່ສ້າງ-ປັບປຸງພັກຕາມ 5 ຫຼັກການ 3 ທິດນໍາໂດຍສະເພາະຫຼັກການຕໍານິຕິຊົມຕົນເອງ ແລະ ຕໍານິສົ່ງຂ່າວໝູ່ຄູ່; ເພີ່ມທະວີຄວາມຮັບຜິດຊອບຕໍ່ການຈັດຕັ້ງຮາກຖານພັກໃນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຕາມ 5 ເນື້ອໃນທີ່ໄດ້ກໍານົດໄວ້, ເອົາໃຈໃສ່ການກໍ່ສ້າງພັກທາງດ້ານການຈັດຕັ້ງຂະຫຍາຍພັກໃນຂະບວນການວຽກງານຕົວຈິງຂອງມະຫາຊົນ; ປະຕິບັດຢ່າງເຂັ້ມງວດຫຼັກການນໍາພາຂອງພັກໂດຍສະເພາະຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ມີຄວາມສາມັກຄີເປັນເອກະພາບພາຍໃນພັກ, ເອົາໃຈໃສ່ຊຸກຍູ້ຄະນະກວດກາພັກແຕ່ລະຂັ້ນໃນການປະຕິບັດພາລະບົດບາດ, ສິດ, ໜ້າທີ່ຂອງຕົນ ບັນຫາເກີດຂື້ນຢູ່ບ່ອນໃດແມ່ນຄະນະພັກຢູ່ບ່ອນນັ້ນເປັນຜູ້ແກ້ໄຂ; ເພີ່ມທະວີການປັບປຸງລະບອບແບບແຜນນໍາພາວິທີເຮັດວຽກ, ແບ່ງງານແບ່ງຄວາມຮັບຜິດຊອບກັນຢ່າງລະອຽດຈະແຈ້ງ, ສົມທົບຢ່າງກົມກຽວການນໍາພາຂອງບຸກຄົນຄະນະພັກກັບການນໍາພາລວມຂອງໝູ່ຄະນະ, ເສີມຂະຫຍາຍຫົວຄິດປະດິດສ້າງ, ກ້າຄິດ, ກ້າເຮັດ, ກ້າຮັບຜິດຊອບ ແລະ ແບບແຜນວິທີເຮັດວຽກທີ່ຕິດແທດຮາກຖານ, ຕິດແທດມະຫາຊົນ; ເອົາໃຈໃສ່ການສ້າງແຜນກໍານົດພະນັກງານນໍາພາ-ຄຸ້ມຄອງແຕ່ລະຂັ້ນໃຫ້ຄໍານຶງເຖິງພະນັກງານທັງສາມຮຸ້ນ, ເພດ, ເຜົ່າ ແຕ່ຕ້ອງຮັບປະກັນມາດຕະຖານ-ເງື່ອນໄຂທີ່ໄດ້ກໍານົດໄວ້; ເອົາໃຈໃສ່ການສ້າງແຜນບໍາລຸງ-ກໍ່ສ້າງ ແຕ່ສໍາຄັນພາຍຫຼັງການບໍາລຸງ-ກໍ່ສ້າງມາແລ້ວຕ້ອງໄດ້ປະເມີນຄວາມຮັບຜິດຊອບວຽກງານຂອງຜູ້ກ່ຽວ; ປະສານສົມທົບລະຫວ່າງສາຍຕັ້ງສາຍຂວາງໃນການຕົກລົງແຕ່ງຕັ້ງຍົກຍ້າຍ, ໜູນວຽນ, ສັບຊ້ອນ, ຈັດວາງພະນັກງານ ແລະ ເອົາໃຈໃສ່ຈັດຕັ້ງຜັນຂະຫຍາຍມະຕິຂອງຄະນະເລຂາທິການສູນກາງພັກ ສະບັບເລກທີ 04/ຄລສພ ວ່າດ້ວຍເພີ່ມທະວີການນໍາພາຂອງພັກເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ ໃຫ້ເປັນຮູບປະທໍາ.
