ຂ່າວ ແລະ ພາບ: ພອນສະຫວັນ
ໃນວັນທີ 30 ມີນາ 2022 ທີ່ຜ່ານມາ ຢູ່ພະແນກແຜນການ ແລະ ການລົງທືນຂອງແຂວງຊຽງຂວາງ ໄດ້ຈັດ ກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນແຂວງຄຸ້ມຄອງ ປີ 2021-2025 ຮອບທີ III ຂອງແຂວງຊຽງຂວາງ ໂດຍການເປັນປະທານຂອງ ສະຫາຍ ບຸນຈັນ ສີວົງພັນ ກຳມະການສູນກາງພັກ, ເລຂາພັກແຂວງ ເຈົ້າແຂວງຊຽງຂວາງ ແລະ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ມີຄະນະບໍລິຫານງານພັກແຂວງ ເຂົ້າຮ່ວມທັງໝົດ 29 ສະຫາຍ, ຍິງ 3 ສະຫາຍ.
ໃນໂອກາດດັ່ງກ່າວ ສະຫາຍເລຂາພັກແຂວງຊຽງຂວາງ ກໍ່ໄດ້ມີຄຳເຫັນໂດຍເນັ້ນໃສ່ 3 ບັນຫາຄື: 1. ຕ້ອງໄດ້ກຳນົດເປົ້າໝາຍ ທີ່ຈະຈັດວາງເຂົ້າໃນຕໍາແໜ່ງງານນຳພາ-ຄຸ້ມຄອງ ແຕ່ລະຂັ້ນ, ແຕ່ລະຂະແໜງການ ເພື່ອແນໃສ່ຮັບປະກັນ ໃຫ້ມີລັກສະນະສືບທອດ, ປ່ຽນແທນຕໍ່ເນື່ອງ ທັງໃນສະເພາະໜ້າ ແລະ ຍາວນານ, 2. ກະກຽມບຸກຄະລາກອນ ທີ່ມີລັກສະນະເປີດກວ້າງ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ-ຄຸ້ມຄອງ ເພື່ອຕອບສະໜອງທາງດ້ານ ຈຳນວນ ແລະ ຄຸນນະພາບ ໂຄງປະກອບບຸກຄະລາກອນໃຫ້ຄົບຊຸດ ຕາມຄວາມຮຽກຮ້ອງຕ້ອງການ ຂອງບັນດາຕໍາແໜ່ງນຳພາ-ຄຸ້ມຄອງ ແຕ່ລະຂັ້ນ, 3. ຕ້ອງມີຄວາມໂປງໄສ ພາວະວິໄສຮອບດ້ານ ແລະ ມີຄວາມຍຸຕິທຳ ຕ້ອງປະຕິບັດຕາມຫຼັກການລວມສູນປະຊາທິປະໄຕ ຢ່າງເຂັ້ມງວດ, ການຄົ້ນຄວ້າເປົ້າໝາຍ ເຂົ້າໃນການກຳນົດ ພະນັກງານຕ້ອງໄດ້ດຳເນີນໄປເປັນໝູ່ຄະນະ ແລະ ຕົກລົງເປັນສຽງສ່ວນຫຼາຍ ແລະ ຕ້ອງຮັບປະກັນຄວາມ ເປັນເອກະພາບສູງ ພາຍໃນຄະນະພັກແຕ່ລະຂັ້ນ ເພື່ອເຮັດໃຫ້ແຜນກຳນົດພະນັກງານ ມີຄຸນນະພາບ ແລະ ສາມາດຈັດຕັ້ງປະຕິບັດຕົວຈິງໄດ້.
ຈາກນັ້ນບັນດາຜູ້ເຂົ້າຮ່ວມກອງປະຊຸມ ກໍ່ໄດ້ສິດບ່ອນບັດເລືອກເຟັ້ນບັນດາ ບຸກຄະລາກອນ ເພື່ອຈະປະກອບເຂົ້າໃນຕຳແໜ່ງງານໃນແຕ່ລະຂະແໜງການຂອງແຂວງ ເພື່ອຮັບປະກັນການສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນແຂວງ ຄຸ້ມຄອງ ປີ 2021-2025 ຮອບທີ III ໃຫ້ໄດ້ຮັບຜົນສຳເລັດຕາມລະດັບຄາໝາຍ ແລະ ມີຄຸນນະພາບທີ່ໄດ້ກຳນົດໄວ້…ຯ
