ຂ່າວ ແລະ ພາບ: ພອນສະຫວັນ
ເພື່ອເປັນການຈັດຕັ້ງປະຕິບັດ ການຜັນຂະຫຍາຍມະຕິຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແລະ ຮັບປະກັນໃນການຈັດຕັ້ງປະຕິບັດມະຕິ 04/ຄບສພ ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ທຸກຂອດໃນວຽກງານພະນັກງານ ໂດຍສະເພາະແມ່ນການສ້າງ ແລະ ປະຕິບັດແຜນກຳນົດພະນັກງານນຳພາ-ຄຸ້ມຄອງຢ່າງເປັນລະບົບ ແລະ ສອດຄ່ອງກັບຕົວຈິງ. ໃນລະຫວ່າງວັນທີ 29-30 ມີນາ 2022 ຢູ່ສະໂມສອນໃຫຍ່ຂອງພະແນກແຜນການ ແລະ ການລົງທືນແຂວງຊຽງຂວາງ ໄດ້ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງຄຸ້ມຄອງຂອງແຂວງ ໂດຍການເປັນປະທານຂອງ ສະຫາຍ ບຸນຈັນ ສີວົງພັນ ກຳມະການສູນກາງພັກ, ເລຂາຄະ ນະບໍລິຫານງານພັກແຂວງ, ເຈົ້າແຂວງຊຽງຂວາງ ແລະ ເປັນກຽດເຂົ້າຮ່ວມໂດຍ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຄະນະບໍລິຫານງານພັກແຂວງ, ປະທານ-ຮອງປະທານຄະນະກຳມາທິການສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳແຂວງ; ເລຂາ-ຮອງເລຂາຄະນະພັກຮາກຖານ, ເລຂາໜ່ວຍພັກ; ຫົວໜ້າ, ຮອງຫົວໜ້າພະແນກການ ແລະ ອົງການທຽບເທົ່າຂັ້ນແຂວງ, ເລຂາ-ຮອງເລຂາພັກເມືອງ 7 ເມືອງ; ເລຂາ, ຮອງເລຂາຄະນະພັກ, ຫົວໜ້າ, ຮອງຫົວໜ້າກອງບັນຊາການປກຊ-ປກສ ແລະ ພະນັກງານບຳນານ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມຄັ້ງນີ້ ແມ່ນເປັນການຄາດຄະເນເປົ້າໝາຍພະນັກງານທີ່ຈະຈັດວາງເຂົ້າໃນຕຳແໜ່ງ ນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ, ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ ພາຍໃນແຂວງຊຽງຂວາງ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ-ຄຸ້ມຄອງ ຕອບສະໜອງທາງດ້ານຈຳນວນ ແລະ ຄຸນນະພາບ.
ກອງປະຊຸມຄັ້ງນີ້, ໄດ້ຮັບຟັງການລາຍງານສະພາບໂດຍລວມຂອງແຂວງຈາກ ສະຫາຍ ສະຫາຍ ບຸນຈັນ ສີວົງພັນ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງຊຽງຂວາງ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຄະນະຮັບຜິດຊອບຂັ້ນແຂວງ ແລະ ຂັ້ນສູນກາງ ທີ່ໄດ້ເອົາໃຈໃສ່ເຮັດສຳເລັດໜ້າທີ່ທີ່ໄດ້ຮັບມອບໝາຍ ພ້ອມທັງຮຽກຮ້ອງມາຍັງບັນດາສະຫາຍທີ່ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບດ້ານການເມືອງຂອງຕົນ, ສຸມສະຕິປັນຍາ ພິຈາລະນາເບິ່ງບັນຫາພະນັກງານທີ່ຈະຄັດເລືອກເຂົ້າໃນເປົ້າໝາຍຕຳແໜ່ງງານໃຫ້ລະອຽດຊັດເຈນ, ຄັດເລືອກເອົາບຸກຄະລາກອນໃຫ້ຖືກຕ້ອງ, ຄົບຖ້ວນຕາມມາດຕະຖານເງື່ອນໄຂທີ່ກຳນົດ, ສິ່ງສຳຄັນຕ້ອງເລືອກບຸກຄົນທີ່ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ລະບອບປະຊາທິປະໄຕປະຊາຊົນຢ່າງໜັກແໜ້ນ, ມີຄວາມສາມັກຄີເປັນເອກະພາບພາຍໃນພັກ, ພະນັກງານ, ສະມາຊິກພັກ, ມີປະຫວັດຕົ້ນກຳເນີດຈະແຈ້ງ ແລະ ການເຄື່ອນໄຫວດີ ປາສະຈາກຄວາມອະຄະຕິຕໍ່ພັກ-ພະນັກງານ.
ໃນວາລະດັງກ່າວ ສະຫາຍ ນາງ ບຸດສະດີ ທະນະເມືອງ ຍັງໄດ້ເໜັ້ນບາງຈຸດ ໃຫ້ຜູ້ເຂົ້າຮ່ວມກອງປະຊຸມເອົາໃຈໃສ່ຕື່ມບາງຈຸດ ໂດຍສະເພາະ 1. ການສ້າງແຜກໍານົດພະນັກງານ ແມ່ນຄວາມຮັບຜິດຊອບໂດຍກົງຂອງຄະນະພັກ ແຕ່ລະຂັ້ນ ຕາມຂອບເຂດສິດໃນການແບ່ງຂັ້ນຄຸ້ມຄອງພະນັກງານ; 2. ປະຕິບັດຫຼັກການລວມສູນປະຊາທິປະໄຕຢ່າງເຂັ້ມງວດ, ຄົ້ນຄວ້າເປົ້າໝາຍເຂົ້າໃນແຜນກໍານົດພະນັກງານເປັນໝູ່ຄະນະ ແລະ ຕົກລົງຕາມສຽງສ່ວນຫຼາຍ; 3. ການສ້າງແຜນກໍານົດພະນັກງານ ຕ້ອງບົນພື້ນຖານກຳແໜ້ນການເລັ່ງທວງຂອງໜ້າທີ່ການເມືອງໃນສະເພາະຫນ້າ ແລະ ຍາວນານ ຂອງພັກ, ແຜນພັດທະນາເສດຖະກິດ-ສັງຄົມແຫ່ງລັດ ຂອງຂະແໜງການ ແລະ ທ້ອງຖິ່ນ; 4. ແຜນກໍານົດພະນັກງານ ຕ້ອງເລີ່ມຈາກສະພາບຄວມເປັນຈິງຂອງຖັນແຖວພະນັກງານ, ຮັບປະກັນລັກສະນະເປີດກວ້າງ ແລະ ເຄື່ອນເໜັງ; 5. ຮັບປະກັນຄວາມຖືກຕ້ອງໂປ່ງໃສ, ພາວະວິໄສ, ຮອບດ້ານ, ຍຸຕິທຳ, ຄໍານຶງເຖິງໂຄງປະກອບເພດ, ເຜົ່າ ແລະ ເລັ່ງໃສ່ພະນັກງານຫນຸ່ມໃຫ້ກວມອັດຕາສ່ວນຫຼາຍ ຊຶ່ງໄດ້ກຳນົດໄວ້ໃນມະຕິ 032/ກມສພ, ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ກມສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດມະຕິ ຂອງກົມການເມືອງສູນກາງພັກວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳ ນົດພະນັກງານນຳພາ-ຄຸ້ມຄອງ ໃຫ້ບັນລຸຕາມຈຸດປະສົງຂອງແຂວງຕາມແຜນການທີ່ກຳນົດໄວ້ນັ້ນ
ໃນຕອນທ້າຍຂອງກອງປະຊຸມ ໄດ້ດຳເນີນການປ່ອນບັດທາບທາມ ຮອບທີ 1 ຢ່າງເປັນທາງການ ແລະ ຈະໄດ້ສືບຕໍ່ດຳເນີນການທາບທາມ ຮອບທີ 2 ແລະ ຮອບທີ 3 ໃນມື້ຖັດໄປໃຫ້ສຳເລັດ...ຯ
