ຂ່າວ ແລະ ພາບ ໂດຍ: ສ.ສົດໃສ
ເພື່ອເປັນການທົບທວນຄືນມູນເຊື້ອ ແລະ ໄຊຊະນະປະຫວັດສາດຂອງພາລະກິດແຫ່ງການຕໍ່ສູ້ປົດປ່ອຍຊາດ ໃນເມື່ອກ່ອນ ແລະ ຜົນສຳເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງ ພັກປະຊາຊົນປະຕິວັດລາວ ຕະຫຼອດໄລຍະ 67 ປີ.
ໃນວັນທີ 22 ມີນາ 2022 ກະຊວງກະສິກຳ ແລະ ປ່າໄມ້ ໄດ້ຈັດພິທີປາຖະກະຖາ ວັນສ້າງຕັ້ງພັກປະຊາຊົນປະ ຕິວັດລາວ ຄົບຮອບ 67 ປີ (22/3/1955-22/3/2022) ຂຶ້ນ. ໂດຍການເປັນປະທານ ແລະ ປາຖະກະຖາຂອງ ສະຫາຍ ທອງພັດ ວົງມະນີ ຮອງເລຂາຄະນະພັກ, ຮອງລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາສະຫາຍ ຄະນະປະຈຳພັກ, ຄະນະພັກກະຊວງ, ຫົວໜ້າ-ຮອງຫົວໜ້າກົມ ແລະ ທຽບເທົ່າ, ຄະນະພັກຮາກຖານ, ຄະນະໜ່ວຍພັກຮາກຖານອ້ອມຂ້າງອົງຄະນະພັກກະຊວງເຂົ້າຮ່ວມປະມານ 80 ກວ່າສະຫາຍ.
ພິທີດັ່ງກ່າວ ບັນດາຜູ້ເຂົ້າຮ່ວມໄດ້ຮັບຟັງການເລົ່າມູນເຊື້ອປະຫວັດການກຳເນີດພັກປະຊາຊົນປະຕິວັດລາວ ໃນແຕ່ລະໄລຍະຢ່າງລະອຽດຈົນເຖິງປະຈຸບັນ. ຜ່ານຂະບວນການຕໍ່ສູ້ອັນຍຶດເຍື້ອຍາວນາມ ໂດຍພາຍໃຕ້ການຊີ້ນຳ-ນຳພາ ພັກໄດ້ນຳພາປະຊາຊົນລາວບັນດາເຜົ່າຕໍ່ສູ້ກູ້ຊາດຕ້ານຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ຈົນສາມາດປົດປ່ອຍ ປະເທດຊາດຢ່າງສົມບູນ ໃນວັນທີ 2 ທັນວາ 1975. ທັງສືບຕໍ່ຊີ້ນຳ-ນຳພາປະຊາຊົນລາວບັນດາເຜົ່າ ເພີ່ມທະວີນ້ຳໃຈຮັກຊາດ, ຮັກລະບອບໃໝ່, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເຊິດຊູບົດບາດນຳພາຂອງພັກ ໄປພ້ອມກັບການປຸກລະດົມຂະບວນການແຂ່ງຂັນ “ຮັກຊາດ ແລະ ພັດທະນາ” ໂດຍຕິດພັນກັບການຍູ້ແຮງຂະບວນການຕ່າງໆ ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໃນຕໍ່ໜ້ານີ້ ໃຫ້ບັນລຸຕາມຄາດໝາຍທີ່ວາງໄວ້.
ຕອນທ້າຍຂອງພິທີ ສະຫາຍ ທອງພັດ ວົງມະນີ ໄດ້ຮຽກຮ້ອງໃຫ້ພະນັກງານ, ສະມາຊິກພັກທຸກສະຫາຍ ທົ່ວກະຊວງກະສິກຳ ແລະ ປ່າໄມ້ ຈົ່ງອອກແຮງທະນຸບຳລຸງ ແລະ ຮັກສາຄຸນສົມບັດສິນທຳປະຕິວັດ, ຄຸນທາດການເມືອງ, ເພີ່ມທະວີຄວາມສາມັກຄີເປັນເອກະພາບພາຍໃນ, ຍົກລະດັບຄວາມຮູ້-ຄວາມສາມາດໃນທຸກດ້ານ ໃຫ້ສູງຂຶ້ນຕື່ມອີກ, ໃກ້ຊິດຕິດແໜ້ນ ແລະ ຊ່ວຍເຫຼືອປະຊາຊົນຢູ່ສະເໝີ; ພະຍາຍາມຮຽນຮູ້ໃນພຶດຕິກຳ, ປັບປຸງດັດແປງວິທີນຳພາໃຫ້ທັນການ, ຍົກສູງບົດບາດຄວາມສາມາດນຳພາ ແລະ ລັກສະນະນຳໜ້າຂອງພັກ, ຂອງສະມາຊິກພັກ; ຍົກສູງຄວາມຮັບຜິດຊອບ, ເສີມຂະຫຍາຍມານະຈິດປະຕິວັດ, ບຸກບືນສູ້ຊົນ ເຮັດຫຼ້ອນໜ້າທີ່ວຽກງານທີ່ພັກ ແລະ ລັດມອບໝາຍໃຫ້; ເຊີດຊູກຽດ ແລະ ອິດທິພົນຂອງພັກເຮົາຂຶ້ນຢ່າງບໍ່ຢຸດຢັ້ງ ເພື່ອໃຫ້ສົມກັບຄວາມໄວ້ເນື້ອຊາດໃຈຂອງປະຊາຊົນບັນດາເຜົ່າ...ຯ