ໂດຍ: ວິລະສະໄໝ
ກອງປະຊຸມໃຫຍ່ສະມາຊິກພັກ ຄັ້ງທີ IV ຂອງອົງຄະນະພັກສູນກາງສະຫະພັນແມ່ຍິງລາວ ໄດ້ຈັດຂຶ້ນໃນວັນທີ 18 ມີນາ 2022 ທີ່ສູນຝຶກອົບຮົມ ແລະ ການຮ່ວມມືສາກົນ (ICTC) ພາຍໃຕ້ການເປັນປະທານຂອງສະຫາຍນາງ ອິນລາວັນ ແກ້ວບຸນພັນ ກຳມະການສູນກາງພັກ, ເລຂາຄະນະພັກ, ປະທານສູນກາງສະຫະພັນແມ່ຍິງລາວ, ເປັນກຽດເຂົ້າຮ່ວມຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ, ມີຄະນະໜ່ວຍພັກ, ສະມາຊິກພັກ, ຜູ້ແທນສົມບູນຊຶ່ງມາຈາກ 13 ພາກສ່ວນທີ່ຂຶ້ນກັັບອົງຄະນະພັກ ສສຍລ ເຂົ້າຮ່ວມ.
ກອງປະຊຸມໄດ້ຮັບຟັງລາຍງານການເມືອງທັງ II ພາກຄື: ພາກທີ I ຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງຜ່ານມາ ໄລຍະປີ 2016-2020 ແລະ ພາກທີ II ທິດທາງໜ້າທີ່ ໃນ 05 ປີຕໍ່ໜ້າ (2021-2025); ໂດຍໄດ້ຍົກໃຫ້ເຫັນຜົນສຳເລັດ, ຈຸດດີ, ຈຸດອ່ອນ-ຂໍ້ຄົງຄ້າງ, ບົດຮຽນທີ່ຖອດຖອນໄດ້ຈາກການຊີ້ນຳ-ນຳພາ ຕະຫຼອດໄລຍະ 5 ປີ ຜ່ານມາ ພ້ອມຮັບຟັງບົດສໍາຫຼວດການນຳພາລວມຂອງຄະນະພັກຊຸດເກົ່າ ແລະ ມີການປະກອບຄໍາເຫັນຈາກຜູ້ແທນກອງປະຊຸມ ພ້ອມນີ້ ບັນດາຜູ້ແທນສົມບູນຂອງກອປະຊຸມໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະບໍລິຫານງານພັກຊຸດໃໝ່ 11 ສະຫາຍ ຈາກຜູ້ສະໝັກ 14 ສະຫາຍ.
ກອງປະຊຸມຄັ້ງປະຖົມມະລຶກຂອງຄະນະພັກຊຸດໃໝ່ ໄດ້ເລືອກເອົາຄະນະປະຈຳພັກ 3 ສະຫາຍ ຄື: 1. ສະຫາຍ ນາງ ອິນລາວັນ ແກ້ວບຸນພັນ, 2. ສະຫາຍ ນາງ ທຳມາ ເພັດວິໄຊ ແລະ 3. ສະຫາຍ ນາງ ເຫຼັກ ແສນຄຳວົງສາ; ເລືອກເອົາສະຫາຍ ນາງ ອິນລາວັນ ແກ້ວບຸນພັນ ເປັນເລຂາຄະນະບໍລິຫານງານພັກ, ສະຫາຍ ນາງ ທຳມາ ເພັດວິໄຊ ເປັນຮອງເລຂາຄະນະບໍລິຫານງານພັກ ທັງເປັນປະທານຄະນະກວດກາພັກ, ສະຫາຍນາງ ພູຄໍາ ຄັດສະຫວ່າງ ແລະ ສະຫາຍນາງ ວົງອາກອນ ເພັງດາລິດ ເປັນຮອງປະທານຄະນະກວດກາພັກ.
ໃນຕອນທ້າຍຂອງກອງປະຊຸມໄດ້ຮັບຟັງຄຳເຫັນໂອ້ລົມຈາກສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ເຊິ່ງໄດ້ຍ້ອງຍໍຊົມເຊີຍຕໍ່ຜົນງານ 5 ປີ ຜ່ານມາ, ພ້ອມທັງຮຽກຮ້ອງມາຍັງຄະນະພັກ, ສະມາຊິກພັກທຸກສະຫາຍຈົ່ງເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ, ເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ຕັດສິນໃຈຜ່ານຜ່າຄວາມຫຍຸ້ງຍາກ ແລະ ມີຄວາມເປັນເອກະພາບສູງໃນການນຳພາຜັນຂະຫຍາຍມະຕິກອງປະຊຸມໃຫຍ່ສະມາຊິກພັກ ຄັ້ງທີ IV ຂອງອົງຄະນະພັກສູນກາງສະຫະພັນແມ່ຍິງລາວຄັ້ງນີ້ ເຂົ້າສູ່ຂະບວນການວຽກງານຕົວຈິງໃຫ້ມີໝາກມີຜົນ ເຮັດໃຫ້ສູນກາງສະຫະພັນແມ່ຍິງລາວ ມີການຫັນປ່ຽນດີຂຶ້ນກວ່າເກົ່າ ປະກອບສ່ວນຢ່າງແຮງກ້າເຂົ້າໃນການປົກປັກຮັກສາ ແລະ ພັດທະນາປະເທດຊາດ ໃຫ້ມີຄວາມມັ່ງຄັ່ງ, ເຂັ້ມແຂງ ກ້າວຂຶ້ນສູ່ຈຸດໝາຍສັງຄົມນິຍົມຢ່າງໜັກແໜ້ນ.
