ຂ່າວ ແລະ ພາບ: ສ.ສົດໃສ
ເພື່ອຜັນຂະຫຍາຍມະຕິຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແລະ ຮັບປະກັນໃນການຈັດຕັ້ງປະຕິບັດສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດໃນວຽກງານພະນັກງານ ໂດຍສະເພາະແມ່ນການສ້າງ ແລະ ປະຕິບັດແຜນກຳນົດພະນັກງານນຳພາ-ຄຸ້ມຄອງຢ່າງເປັນລະບົບ ແລະ ສອດຄ່ອງກັບຕົວຈິງ. ໃນລະຫວ່າງວັນທີ 10-11 ມີນາ 2022 ຢູ່ສະໂມສອນໃຫຍ່ຂອງສຳນັກງານປົກຄອງແຂວງອຸດົມໄຊ ໄດ້ຈັດກອງປະຊຸມສ້າງແຜນກຳນົດພະນັກງານນຳພາຄຸ້ມຄອງ-ຂັ້ນສູນກາງຄຸ້ມຄອງຂອງແຂວງອຸດົມໄຊ ໂດຍການເປັນປະທານຂອງສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງອຸດົມໄຊ, ມີສະຫາຍ ທອງຈັນ ໂຂງພູມຄຳ ຄະນະປະຈໍາພັກ, ຮອງຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຄະນະບໍລິຫານງານພັກແຂວງ, ປະທານ-ຮອງປະທານຄະນະກຳມາທິການສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳແຂວງ; ເລຂາ-ຮອງເລຂາຄະນະພັກຮາກຖານ, ເລຂາໜ່ວຍພັກ; ຫົວໜ້າ, ຮອງຫົວໜ້າພະແນກການ ແລະ ອົງການທຽບເທົ່າຂັ້ນແຂວງ, ເລຂາ-ຮອງເລຂາພັກເມືອງ 7 ເມືອງ; ເລຂາ, ຮອງເລຂາຄະນະພັກ, ຫົວໜ້າ, ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງ, ກອງບັນຊາການທະຫານແຂວງ ແລະ ພະນັກງານບຳນານ, ອະດີດການນຳຂັ້ນຮອງເລຂາພັກແຂວງ, ຮອງເຈົ້າແຂວງ ແລະ ທຽບເທົ່າຂຶ້ນໄປເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມຄັ້ງນີ້ ແມ່ນເປັນການຄາດຄະເນເປົ້າໝາຍພະນັກງານທີ່ຈະຈັດວາງເຂົ້າໃນຕຳແໜ່ງນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ, ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານໃນແຂວງອຸດົມໄຊ.
ຜູ້ເຂົ້າຮ່ວມກອງປະຊຸມ ໄດ້ຮັບຟັງຄຳເຫັນຊີ້ນຳເບື້ອງຕົ້ນຕໍ່ກອງປະຊຸມໂດຍສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາຄະນະບໍລິຫານງານພັກແຂວງ, ເຈົ້າແຂວງອຸດົມໄຊ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຄະນະຮັບຜິດຊອບຂັ້ນແຂວງ ແລະ ຂັ້ນສູນກາງ ທີ່ໄດ້ເອົາໃຈໃສ່ເຮັດສຳເລັດໜ້າທີ່ທີ່ໄດ້ຮັບມອບໝາຍ ພ້ອມທັງຮຽກຮ້ອງມາຍັງບັນດາສະຫາຍທີ່ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບດ້ານການເມືອງຂອງຕົນ, ສຸມສະຕິປັນຍາ ພິຈາລະນາເບິ່ງບັນຫາພະນັກງານທີ່ຈະຄັດເລືອກເຂົ້າໃນເປົ້າໝາຍຕຳແໜ່ງງານໃຫ້ລະອຽດຊັດເຈນ, ຄັດເລືອກເອົາບຸກຄະລາກອນໃຫ້ຖືກຕ້ອງ, ຄົບຖ້ວນຕາມມາດຕະຖານເງື່ອນໄຂທີ່ກຳນົດ, ສິ່ງສຳຄັນຕ້ອງເລືອກບຸກຄົນທີ່ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ລະບອບປະຊາທິປະໄຕປະຊາຊົນຢ່າງໜັກແໜ້ນ, ມີຄວາມສາມັກຄີເປັນເອກະພາບພາຍໃນພັກ, ພະນັກງານ, ສະມາຊິກພັກ, ມີປະຫວັດຕົ້ນກຳເນີດຈະແຈ້ງ ແລະ ການເຄື່ອນໄຫວດີ ປາສະຈາກຄວາມອະຄະຕິຕໍ່ພັກ-ພະນັກງານ.
ຕໍ່ຈາກນັ້ນ, ສະຫາຍ ຄຳພຽງ ຢາຈົງວາ ຮອງເລຂາພັກແຂວງ, ຜູ້ຊີ້ນຳວຽກພັກ-ພະນັກງານ ໄດ້ຂຶ້ນລາຍງານບົດສະຫຼຸບຫຍໍ້ ການຈັດຕັ້ງປະຕິບັດແຜນກຳນົດພະນັກງານນຳພາ-ຄຸ້ມຄອງຂັ້ນສູນກາງຄຸ້ມຄອງ, ມະຕິຂອງກົມການເມືອງສູນກາງພັກ ສະບັບເລກທີ 030/ກມສພ, ລົງວັນທີ 03 ມັງກອນ 2018 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ ແລະ ສະຫາຍ ທອງຈັນ ໂຂງພູມຄຳ ຄະນະປະຈຳພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ເຜີຍແຜ່-ເຊື່ອມຊຶມ ມະຕິ 032/ກມສພ, ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ກມສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດມະຕິ ຂອງກົມການເມືອງສູນກາງພັກວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ.
ໃນຕອນທ້າຍຂອງກອງປະຊຸມ ໄດ້ດຳເນີນການປ່ອນບັດທາບທາມ ຮອບທີ 1 ຢ່າງເປັນທາງການ ແລະ ຈະໄດ້ສືບຕໍ່ດຳເນີນການທາບທາມ ຮອບທີ 2 ແລະ ຮອບທີ 3 ໃນມື້ຖັດໄປໃຫ້ສຳເລັດ...ຯ
