ພາບ ແລະ ຂ່າວ: ສ.ສົດໃສ
ໃນວັນທີ 7 ກຸມພາ 2022 ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດກອງປະຊຸມວຽກງານຈັດຕັ້ງ, ກໍ່ສ້າງພັກ-ພະນັກງານທົ່ວຂະແໜງແຮງງານ ແລະ ສະຫວັດດີການສັງຄົມ 5 ປີ (2016-2020) ໂດຍການເປັນປະທານຂອງສະຫາຍ ນາງ ໃບຄຳ ຂັດທິຍະ ກຳມະການສູນກາງພັກ ເລຂາຄະນະພັກ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ໃຫ້ກຽດເຂົ້າຮ່ວມ ແລະ ມີຄຳເຫັນໂອ້ລົມຂອງສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີຄະນະພັກ, ເລຂາ-ຮອງເລຂາຄະນະຮາກຖານພັກ, ໜ່ວຍພັກ, ຫົວໜ້າພະແນກອ້ອມຂ້າງກະຊວງ ແລະ ຕາງໜ້າຂະແໜງ ຮສສ ບັນດາແຂວງ-ນະຄອນຫຼວງເຂົ້າຮ່ວມຜ່ານວິດີໂອທາງໄກ.
ກອງປະຊຸມຄັ້ງນີ້ ຜູ້ເຂົ້າຮ່ວມ ໄດ້ຮັບຟັງການຜ່ານຮ່າງບົດສະຫຼຸບລາຍງານການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ-ພະນັກງານ ໄລຍະ 5 ປີ (2016-2020) ແລະ ທິດທາງແຜນການ 5 ປີ (2021-2025) ຊຶ່ງຜ່ານການຕີລາຄາວຽກງານ 5 ປີທີ່ຜ່ານມາເຫັນວ່າ ຄະນະພັກທຸກຂັ້ນໄດ້ເອົາໃຈໃສ່ເຮັດວຽກງານການເມືອງ-ແນວຄິດເປັນກົກ, ເຮັດໃຫ້ສະມາຊິກພັກ-ພະນັກງານທົ່ວຂະແໜງ ຮສສ ມີສະຕິຕໍ່ລະບຽບວິໄນຂອງພັກ, ມີທາດແທ້ທັດສະນະຫຼັກໝັ້ນຖືກຕ້ອງ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຈຳແນກມິດສັດຕູຈະແຈ້ງ, ມີຄວາມຈົ່ງຮັກພັກດີ ແລະ ເຊື່ອໝັ້ນຕໍ່ການນຳພາຂອງພັກ, ມີຄວາມສາມັກຄີເປັນເອກະພາບ ສຸມໃສ່ປະຕິບັດໜ້າທີ່ການເມືອງ, ໜ້າທີ່ວິຊາສະເພາະດ້ວຍຄວາມຮັບຜິດຊອບສູງ ແລະ ມີຜົນສຳເລັດຢ່າງຕໍ່ເນື່ອງ, ຕິດພັນກັບວຽກງານກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ຕາມ 5 ເນື້ອໃນ ຊຶ່ງໃນ 5 ປີຜ່ານມາ ສາມາດຕີລາຄາ ແລະ ປະເມີນຮັບຮອງໜ່ວຍພັກເຂັ້ມແຂງ-ຮູ້ນຳພາຮອບດ້ານ ກໍຄື ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄດ້ຈຳນວນ ທັງໝົດ 79 ເທື່ອໜ່ວຍ. ການຕີລາຄາແບ່ງປະເພດສະມາຊິກພັກທົ່ວອົງຄະນະພັກກະຊວງໃນແຕ່ລະປີ ສາມາດຕີລາຄາໄດ້ສະມາຊິກພັກແຂງ ຈຳນວນ 941 ເທື່ອສະຫາຍ, ຍິງ 482 ເທື່ອສະຫາຍ, ກາງ 74 ເທື່ອສະຫາຍ, ຍິງ 26 ເທື່ອສະຫາຍ, ບໍ່ມີສະມາຊິກພັກອ່ອນ ແລະ ເສຍທາດຂາດຄຸນ.
ໃນທົ່ວຂະແໜງ ຮສສ ໄດ້ສຳເລັດການຂຽນ ແລະ ການຈັດຕັ້ງປະຕິບັດການກຳນົດຕຳແໜ່ງງານ ທີ່ຖືກຕ້ອງຕາມມະຕິຂອງກົມການເມືອງສູນກາງພັກ ເລກທີ 032/ກມສພ ລົງວັນທີ 03 ມັງກອນ 2018 ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ. ປະຈຸບັນ ທົ່ວຂະແໜງແຮງງານ ແລະ ສະຫວັດດີການສັງຄົມ ມີພະນັກງານ-ລັດຖະກອນ ທັງໝົດ 2.348 ທ່ານ, ຍິງ 861 ທ່ານ; ທຽບໃສ່ປີ 2015 ເພີ່ມຂຶ້ນ 18.2%; ໄດ້ເອົາໃຈໃສ່ປັບປຸງ, ຈັດວາງ ແລະ ສັບຊ້ອນພະນັກງານ-ລັດຖະກອນ ໂດຍມີການຄັດເລືອກຜູ້ທີ່ມີຄຸນສົມບັດສິນທຳປະຕິວັດ, ມີຄວາມຮູ້, ຄວາມສາມາດຕົວຈິງ, ມີຄຸນທາດການເມືອງທີ່ໜັກແໜ້ນ ແລະ ໄດ້ຜ່ານຂະບວນການທົດສອບຈາກພຶດຕິກຳຕົວຈິງ ເພື່ອຈັດວາງເຂົ້າໃນຕຳແໜ່ງບໍລິຫານປະເພດຕ່າງໆທັງສູນກາງ ແລະ ທ້ອງຖິ່ນ; ໄດ້ເອົາໃຈໃສ່ຈັດຕັ້ງເຄື່ອນໄຫວວຽກງານນະໂຍບາຍ ແລະ ແຜນການຢ່າງຕັ້ງໜ້າ ປະຕິບັດນະໂຍບາຍຕໍ່ພະນັກງານ-ລັດຖະກອນຕາມແນວທາງນະໂຍບາຍຂອງພັກ, ຂອງລັດວາງອອກ; ໄດ້ມີການແຕ່ງຕັ້ງຄະນະຮັບຜິດຊອບວຽກງານແຂ່ງຂັນ-ຍ້ອງຍໍ ແລະ ໄດ້ຕົກລົງມອບໃບຍ້ອງຍໍຂັ້ນກະຊວງ ເພື່ອສັນລະເສີນບັນດາກົມກອງລວມໝູ່, ຄອບຄົວ ແລະ ບຸກຄົນ ທີ່ມີຜົນງານດີເດັ່ນໃນການເຄື່ອນໄຫວຂະບວນການວຽກງານຕ່າງໆໃນແຕ່ລະປີດ້ວຍການມອບໃບຍ້ອງຍໍປະເພດຕ່າງໆເຊັ່ນ: ໃບຍ້ອງຍໍ ຈຳນວນ 67 ເທື່ອກົມກອງ, ຄອບຄົວດີເດັ່ນ ຈຳນວນ 320 ເທື່ອຄອບຄົວ, ບຸກຄົນດີເດັ່ນ ຈຳນວນ 2.166 ເທື່ອຄົນ.
ພ້ອມນີ້, ຜູ້ແທນກອງປະຊຸມໄດ້ພ້ອມກັນປະກອບຄຳເຫັນຕໍ່ຮ່າງບົດສະຫຼຸບ ແລະ ທິດທາງແຜນ ການ ພ້ອມສະເໜີປັບປຸງບາງເນື້ອໃນໃຫ້ສົມບູນຂຶ້ນ.
ໃນຕອນທ້າຍຂອງກອງປະຊຸມ ຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຂອງສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຄະນະພັກ-ຄະນະນຳຂອງກະຊວງ ຮສສ ໃນການນຳພາ-ຊີ້ນຳວຽກງານຈັດຕັ້ງ, ກໍ່ສ້າງພັກ-ພະນັກງານໃນຂະແໜງການຂອງຕົນ ຕະຫຼອດໄລຍະ 5 ປີຜ່ານມາມີຜົນສຳເລັດ ເປັນການປະກອບສ່ວນສຳຄັນໃນການຈັດຕັ້ງປະຕິບັດມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ຜ່ານມາ. ພ້ອມນັ້ນ ເພື່ອຮັບປະກັນວຽກງານໃນຕໍ່ໜ້າ ສະຫາຍຍັງຮຽກຮ້ອງມາຍັງຄະນະພັກ ຄະນະນຳຕະຫຼອດຮອດສະມາຊິກພັກ-ພະນັກງານຂອງກະຊວງ ແລະ ທົ່ວຂະແໜງ ຮສສ ຈົ່ງພ້ອມກັນຈັດຕັ້ງປະຕິບັດມະຕິກອງປະຊຸມວຽກງານຈັດຕັ້ງ, ກໍ່ສ້າງພັກ-ພະນັກງານ ໃນຂະແໜງການຂອງຕົນໃຫ້ມີຜົນສຳເລັດໃໝ່ໃນ 5 ປີຕໍ່ໜ້າ...ຯ
