ຮຽບຮຽງໂດຍ: ນັກຂ່າວສື່ກໍ່ສ້າງພັກ
ແຫຼ່ງຂ່າວ: ສີລິພອນ ສົງຄຳ
ນັກຂ່າວແຂວງໄຊສົມບູນ
ໃນວັນທີ 19 ມັງກອນ 2022 ພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ໄດ້ຈັດກອງປະຊຸມ ການສ້າງແຜນກຳນົດພະນັກງານນຳພາ-ຄຸ້ມຄອງຂຶ້ນ ທີ່ຫ້ອງປະຊຸມບໍລິສັດລາວໂທລະຄົມມະນາຄົມມະຫາຊົນ ສາຂາແຂວງໄຊສົມບູນ ໂດຍການເປັນປະທານຂອງສະຫາຍ ໄຊສົມພັນ ລີເຕັງເບຼຍຈື້, ກຳມະການພັກແຂວງ, ຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີສະຫາຍ ເລັ່ງລໍ່ ຢົງຊະເຈ່ຍວ່າ, ຮອງຫົວໜ້າຄະນະຈັດຕັ້ງແຂວງ, ສະຫາຍ ນາງ ນຸ້ຍ ສັງວິບຸດ ຮອງຫົວໜ້າກົມຈັດຕັ້ງ-ພະນັກງານ ກະຊວງໂຍທາທິການ ແລະ ຂົນສົ່ງ ພ້ອມດ້ວຍຄະນະ, ມີຫົວໜ້າ-ຮອງຫົວໜ້າຫ້ອງການຈາກ 5 ເມືອງ ຕະຫຼອດຮອດພະນັກງານພາຍໃນພະແນກເຂົ້າຮ່ວມ.
ໃນກອງປະຊຸມ ສະຫາຍ ເລັ່ງລໍ່ ຢົງຊະເຈ່ຍວ່າ, ຮອງຫົວໜ້າຄະນະຈັດຕັ້ງແຂວງໄດ້ຜ່ານມະຕິກົມການເມືອງສູນກາງພັກ ເລກທີ 032/ກມສພ ລົງວັນທີ 3 ມັງກອນ 2018 ວ່າດວ້ຍການສ້າງແຜນກຳນົດນຳພາ-ຄຸ້ມຄອງ, ມະຕິກົມການເມືອງສູນກາງພັກ ສະບັບເລກທີ 030/ກມສພ ລົງວັນທີ 3 ມັງກອນ 2018 ວ່າດ້ວຍມາດຖານພະນັກງານນຳພາຄຸ້ມຄອງ ແລະ ຄຳແນະນຳຂອງ ຄະນະຈັດຕັ້ງສູນກາງ ສະບັບເລກທີ 292/ຄຈສພ ລົງວັນທີ 26/04/2018 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ແລະ ໄດ້ຮັບຟັງການຜ່ານດຳລັດຂອງລັດຖະບານ ສະບັບເລກທີ 461/ລບ ລົງວັນທີ 9.10.2012 ວ່າດ້ວຍມາດຕະຖານຕຳແໜ່ງບໍລິຫານຂອງລັດຖະກອນ ແຫ່ງ ສປປ ລາວ ສະເໜີໂດຍສະຫາຍ ນາງ ນຸ້ຍ ສັງວິບຸດ ຮອງຫົວໜ້າກົມຈັດຕັ້ງ-ພະນັກງານ ກະຊວງໂຍທາທິການ ແລະ ຂົນສົ່ງ.
ຈາກນັ້ນ, ປະທານໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງທ່ານໄດ້ເນັ້ນໜັກໃຫ້ບັນດາສະມາຊິກພັກ, ພະນັກງານ-ລັດຖະກອນ ຈົ່ງເອົາໃຈໃສ່ໃນການຄົ້ນຄວ້າ, ທາບທາມ ແລະ ໃຫ້ຄະແນນ, ໂດຍອີງຕາມມາດຖານ, ເງື່ອນໄຂ ເພື່ອກໍານົດເອົາເປົ້າໝາຍພະນັກງານນໍາພາ-ຄຸ້ມຄອງ ກໍຄືຄະນະພະແນກ-ຮອງພະແນກ, ຫົວໜ້າຂະແໜງ-ຮອງຂະແໜງ ຜູ້ທີ່ມີຄວາມຮູ້ຄວາມສາມາດ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ ເພື່ອສາມາດນໍາພາວຽກງານການເມືອງຂອງພັກ ໄດ້ຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນແຕ່ລະໄລຍະ ພ້ອມທັງນໍາພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ບັນລຸເປົ້າໝາຍທີ່ວາງໄວ້. ພ້ອມດຽວກັນນັ້ນ ກອງປະຊຸມໄດ້ດໍາເນີນການທາບທາມແຜນກໍານົດພະນັກງານນໍາພາ-ຄຸ້ມຄອງ ໄປຕາມແຕ່ລະຂັ້ນຕອນ ເພື່ອເຮັດໃຫ້ກອງປະຊຸມຮັບປະກັນດ້ານເນື້ອໃນ ແລະ ຮູບການ, ແນ່ໃສ່ເຮັດໃຫ້ແຜນກຳນົດພະນັກງານນຳພາ-ຄຸ້ມຄອງ ມີປະສິດທິພາບ ແລະ ປະສິດທິຜົນ.