ໂດຍ: ສ. ໃສ
ເພື່ອສືບຕໍ່ຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ ໃນການດຳເນີນກອງປະຊຸມໃຫຍ່ຂອງກະຊວງ-ອົງການທີ່ຍັງບໍ່ທັນໄດ້ດຳເນີນໃຫ້ສຳເລັດຕາມກຳນົດເວລາ ໂດຍສະເພາະແມ່ນ 19 ພາກສ່ວນທີ່ຈະຕ້ອງໄດ້ດຳເນີນກອງປະຊຸມໃຫຍ່ຂັ້ນຂອງຕົນພາຍຫຼັງກອງປະຊຸມໃຫຍ່ ຄັ້ງທີ XI ຂອງພັກສຳເລັດ; ໃນວັນທີ 9 ພະຈິກ 2021 ສະຫະພັນນັກຮົບເກົ່າແຫ່ງຊາດລາວ ແລະ ອົງການໄອຍະການປະຊາຊົນສູງສຸດ ໄດ້ດຳເນີນກອງປະຊຸມໃຫຍ່ຂັ້ນຂອງຕົນສຳເລັດ ເຊິ່ງກອງປະຊຸມໃຫຍ່ຜູ້ແທນນັກຮົບເກົ່າແຫ່ງຊາດລາວທົ່ວປະເທດ ຄັ້ງທີ IV ໄດ້ຈັດຂຶ້ນຢູ່ທີ່ສະໂມສອນຫ້ອງວ່າການກະຊວງປ້ອງກັນປະເທດ ໂດຍເປັນກຽດເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ, ມີສະຫາຍ ພົນເອກ ຈັນສະໝອນ ຈັນຍາລາດ ຄະນະບໍລິຫານງານສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ, ບັນດາປະທານສະຫະພັນນັກຮົບເກົ່າ, ຮອງປະທານ, ສະຫະພັນນັກຮົບເກົ່າຂັ້ນແຂວງ, ນະຄອນຫຼວງ ແລະ ແຂກຖືກເຊີນເຂົ້າຮ່ວມ.
ໃນວາລະກອງປະຊຸມ ສະຫາຍ ພົນຈັດຕະວາ ສົມພອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດລາວ ໄດ້ລາຍງານສະພາບການເຄື່ອນໄຫວວຽກງານລວມຂອງຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວສະໄໝທີ III ໄລຍະ 5 ປີຜ່ານມາ ສະແດງໃຫ້ເຫັນຂໍ້ສະດວກທີ່ເອື້ອອຳນວຍ ແລະ ຂໍ້ຫຍຸ້ງຍາກຕ່າງໆ ພ້ອມທັງວາງທິດທາງແຜນການໃນ 5 ປີຕໍ່ໜ້າ. ພ້ອມນີ້ ກອງປະຊຸມຍັງ ໄດ້ຮັບຮອງເອົາຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ ຊຸດໃໝ່ 27 ສະຫາຍ, ຍິງ 1 ສະຫາຍ, ໃນນັ້ນ ໄດ້ຮັບຮອງເອົາສະຫາຍ ພົນໂທ ແສງນວນ ໄຊຍະລາດ ເປັນປະທານ, ສະຫາຍ ພົນຈັດຕະວາ ຄຳຫອມ ແສງບົວລົມ, ສະຫາຍ ພົນຈັດຕະວາ ລຳພອນ ນົນຈັນທະວົງ, ສະຫາຍ ພົນຈັດຕະວາ ຄຳໝັ້ນ ວັນນະວົງ ແລະ ສະຫາຍ ພົນຈັດຕະວາ ພອນໃຈ ພັນທະວົງ ເປັນຮອງປະທານ; ສະຫາຍ ພົນຈັດຕະວາ ຄຳໝັ້ນ ວັນນະວົງ ເປັນປະທານກວດກາ, ສະຫາຍ ພັນເອກ ນາງ ຄຳພູ ສິດທິເສນ ເປັນຮອງປະທານກວດກາ.
ໃນວັນດຽວກັນ ຢູ່ທີ່ສູນ ICTC (ຫຼັກ 5) ນະຄອນຫຼວງວຽງຈັນ, ອົງຄະນະພັກອົງການໄອຍະການປະຊາຊົນສູງສຸດ ໄດ້ດຳເນີນກອງປະຊຸມໃຫຍ່ສະມາຊິກພັກ ຄັ້ງທີ V ຂອງຕົນສຳເລັດ ໂດຍເປັນກຽດເຂົ້າຮ່ວມຂອງສະຫາຍ ນາງ ປານີ ຢ່າທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ, ເປັນປະທານກອງປະຊຸມໂດຍສະຫາຍ ໄຊຊະນະ ໂຄດພູທອນ ກຳມະການສູນກາງພັກ, ເລຂາຄະນະພັກ, ຫົວໜ້າອົງການໄອຍະການປະຊາຊົນສູງສຸດ, ມີຄະນະພັກອົງການໄອຍະການປະຊາຊົນສູງສຸດ, ສະມາຊິກພັກສົມບູນ, ສຳຮອງ ແລະ ແຂກຖືກເຊີນເຂົ້າຮ່ວມ.
ໃນກອງປະຊຸມດັ່ງກ່າວ ສະມາຊິກພັກສົມບູນໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະພັກ ຊຸດໃໝ່ 9 ສະຫາຍ, ຍິງ 2 ສະຫາຍ ຈາກຜູ້ສະໝັກ 12 ສະຫາຍ, ຍິງ 2 ສະຫາຍ. ກອງປະຊຸມຄັ້ງປະຖົມມະເລີກ ໄດ້ເປັນເອກະສັນເລືອກເອົາຄະນະປະຈຳພັກ 3 ສະຫາຍ ປະກອບດ້ວຍ ສະຫາຍ ໄຊຊະນະ ໂຄດພູທອນ, ສະ ຫາຍ ບຸນທັນ ບຸນທະວີໄລ ແລະ ສະຫາຍ ຄຳເພັດ ສົມວໍລະຈິດ; ເລືອກເອົາສະຫາຍ ໄຊຊະນະ ໂຄດພູທອນ ເປັນເລຂາ ແລະ ສະຫາຍ ບຸນທັນ ບຸນທະວິໄລ ເປັນຮອງເລຂາ ທັງເປັນປະທານກວດກາ.
ໃນຕອນທ້າຍຂອງກອງປະຊຸມ ຜູ້ແທນໄດ້ຮັບຟັງຄຳເຫັນໂອ້ລົມຈາກຂັ້ນເທິງ ເຊິ່ງໄດ້ຍ້ອງຍໍຊົມເຊີຍຜົນງານໃນໄລຍະຜ່ານມາ ແລະ ໃຫ້ທິດຊີ້ນຳໃນການປັບປຸງແກ້ໄຂດ້ານອ່ອນ-ຂໍ້ຄົງຄ້າງ ພ້ອມທັງສະແດງຄວາມເຊື່ອໝັ້ນຕໍ່ຄະນະພັກຊຸດໃໝ່ທີ່ຈະສືບຕໍ່ຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນກ້າວສູ່ຜົນສຳເລັດໃໝ່ ປະກອບສ່ວນເຂົ້າໃນພາລະກິດລວມປົກປັກຮັກສາ ແລະ ພັດທະນາປະເທດຊາດ.
