ໃນວັນທີ 28 ຕຸລາ 2021 ໄດ້ມີພິທີປະກາດສ້າງຕັ້ງບ້ານໄຊມຸງຄຸນ ຂຶ້ນກັບເມືອງຮຸນ ແຂວງອຸດົມໄຊ ຢູ່ທີສະໂມສອນຂອງບ້ານດັ່ງກ່າວ, ເຂົ້າຮ່ວມໃນພິທີມີສະຫາຍ ສົມຈິດ ປັນຍາສັກ ຄະນະປະຈຳພັກແຂວງ ຮອງເຈົ້າແຂວງອຸດົມໄຊ, ສະຫາຍ ອິນທາ ລືນາມມະຈັກ ກຳມະການພັກແຂວງ ເລຂາພັກເມືອງ ເຈົ້າເມືອງໆຮຸນ, ສະຫາຍ ໄຊຍະສິນ ສຸພັນທອງ ຄະນະປະຈຳພັກເມືອງ, ຮອງເຈົ້າເມືອງໆປາກແບງ ມີບັນດາຄະນະພັກເມືອງ ພະນັກງານຫຼັກແຫຼງມາຈາກເມືອງຮຸນ, ເມືອງປາກແບງ ຕະຫຼອດອຳນາດການປົກຄອງ ພໍ່ແມ່ປະຊາຊົນຊາວບ້ານໄຊມຸງຄຸນເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ຄຳກອງ ຕິດຕະວົງ ກຳມະການພັກເມືອງ ຫົວໜ້າຄະນະຈັດຕັ້ງເມືອງຮຸນ ໄດ້ຜ່ານຂໍ້ຕົກລົງຂອງເຈົ້າແຂວງອຸດົມໄຊ ສະບັບເລກທີ 720/ອຊ ລົງວັນທີ 29 ກໍລະກົດ 2021 ວ່າດ້ວຍການຕົກລົງສ້າງຕັ້ງບ້ານໃໝ່ ໂດຍໃສ່ຊື່ວ່າ: ບ້ານໄຊມຸງຄຸນ, ບ້ານໄຊມຸງຄຸນໃນເບື້ອງຕົ້ນເປັນຫົວໜ່ວຍປົກຄອງຂຶ້ນກັບເມືອງປາກແບງ ແຕ່ເນື່ອງຈາກໄດ້ຮັບຜົນກະທົບຈາກໄພນ້ຳຖ້ວມ ບ້ານເຮືອນຖືກເປເພເສຍຫາຍ, ຈິ່ງໄດ້ຍົກຍ້າຍມາຕັ້ງຖິ່ນຖານໃໝ່ຢູ່ເຂດເມືອງຮຸນ ເລີ່ມແຕ່ປີ 2019 ເປັນຕົ້ນມາ, ປະຈຸບັນ ໄດ້ສຳເລັດການກໍ່ສ້າງພື້ນຖານໂຄງລ່າງພາຍໃນບ້ານ 95%, ພາຍໃນບ້ານມີຄວາມເປັນລະບຽບຈົບງາມ ມີການຈັດສັນທີ່ຢູ່ອາໃສ, ຈັດສັນລະບົບເສັ້ນທາງພາຍໃນບ້ານ, ຕິດຕັ້ງລະບົບໄຟຟ້າ, ໂຮງຮຽນ, ສະໂມສອນ, ນ້ຳລິນ, ຫ້ອງນ້ຳ, ລະບົບສາທາລະນະສຸກ ... ຖ້າທຽບໃສ່ໃນເມື່ອກ່ອນ ເຫັນວ່າປະຊາຊົນມີຄວາມສະດວກສະບາຍ ແລະ ມີຄວາມປອດໄພຈາກໄພທຳມະຊາດຫຼາຍຂຶ້ນກວ່າເກົ່າ; ບ້ານໄຊມຸງຄຸນ ປະກອບມີພົນລະເມືອງ 1.700 ກວ່າຄົນ, ຍິງ 800 ກວ່າຄົນ, ມີ 400 ກວ່າຄອບຄົວ, 300 ກວ່າຫຼັງຄາເຮືອນ, ອາຊີບສ່ວນໃຫຍ່ແມ່ນຍຶດຖືເອົາການປູກຝັງ-ລ້ຽງສັດເປັນອາຊີບຕົ້ນຕໍ, ການຄ້າຂາຍເປັນອາຊີບເສີມ.
ໂອກາດດັ່ງກ່າວ ໄດ້ມີການລົງນາມເຊັນບົດບັນທຶກການມອບ-ຮັບບ້ານໄຊມຸງຄຸນ ລະຫວ່າງເມືອງປາກແບງ ກັບ ເມືອງຮຸນ ໂດຍມີສະຫາຍ ສົມຈິດ ປັນຍາສັກ ຄະນະປະຈຳພັກແຂວງ ຮອງເຈົ້າແຂວງອຸດົມໄຊ, ມີການນຳທັງສອງເມືອງເຂົ້າຮ່ວມເປັນສັກຂີພິຍານ. ພ້ອມນີ້ ຍັງໄດ້ຈັດພິທີຍ້ອງຍໍບັນດາອົງການ, ກົມກອງ ແລະ ບຸກຄົນດີເດັ່ນໃນການປະກອບສວນຊ່ວຍເຫຼືອພໍ່ແມ່ປະຊາຊົນບ້ານໄຊມຸງຄຸນ ໃນການຍົກຍ້າຍບ້ານ ແລະ ໃນຕອນທ້າຍ ໄດ້ມີພິທີເປີດປ້າຍບ້ານໄຊມຸງຄຸນ ຢ່າງເປັນທາງການ ພ້ອມທັງລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ບ້ານດັ່ງກ່າວພັດທະນາສືບເນື່ອງຕໍ່ໄປ.
ໂດຍ: ທອງເລື່ອນ
