ໂດຍ: ສ.ສົດໃສ
ເພື່ອປະຕິບັດຕາມກົດລະບຽບພັກປະຊາຊົນປະຕິວັດລາວ ສະໄໝທີ X ຂອງພັກ ແລະ ປະຕິບັດຕາມຄຳສັ່ງຂອງກົມການເມືອງສູນກາງພັກ ເລກທີ 01/ກມສພ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ. ໃນວັນທີ 10 ມີນາ 2021 ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ 05 ໜ່ວຍພັກຂຶ້ນກັບອົງຄະນະພັກຄະນະພົວພັນຕ່າງປະເທດສູນກາງພັກ ສະໄໝທີ 2 ແລະ ມອບບັດສະມາຊິກພັກໃຫ້ສະມາຊິກພັກສົມບູນ ຈໍານວນ 13 ສະຫາຍ, ໂດຍມີສະຫາຍ ປອ ນາງ ສູນທອນ ໄຊຍະຈັກ ເລຂາທິການສູນກາງພັກ ເລຂາຄະນະພັກ ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍໃນຄະນະພັກ, ບັນດາສະຫາຍຄະນະໜ່ວຍພັກ ແລະ ສະມາຊິກພັກພາຍໃນ ຄຕພ ເຂົ້າຮ່ວມ.
ໃນພິທີ ສະຫາຍ ນາງ ພອນດາວັນ ພິນສະຫວັນ, ຫົວໜ້າຫ້ອງການພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານບົດສະຫຼຸບລາຍງານສະພາບການເຄື່ອນໄຫວຈັດຕັ້ງປະຕິບັດຕາມແຜນການໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2020 ແລະ ທິດທາງແຜນການໃນປີຕໍ່ໜ້າ, ຜ່ານການປະເມີນຜົນເຫັນວ່າ ໜ່ວຍພັກສາມາດປະຕິບັດໄດ້ຕາມຄາດໝາຍ ແລະ ສະມາຊິກພັກມີຄວາມເຕີບໃຫຍ່ເຂັ້ມແຂງທາງດ້ານຈຳນວນ ແລະ ຄຸນນະພາບ ສາມາດຮັກສາໄດ້ນາມມະຍົດເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ເຊິ່ງສະແດງເຖິງຄວາມເອົາໃຈໃສ່ຢ່າງໃກ້ຊິດໃນການຊີ້ນໍາ-ນໍາພາຂອງຄະນະພັກ ຄະນະພົວພັນຕ່າງປະເທດສູນກາງພັກ.
ໃນພິທີດັ່ງກ່າວ ຍັງໄດ້ຈັດໃຫ້ມີພິທີມອບ-ຮັບບັດສະມາຊິກພັກ ໃຫ້ສະມາຊິກພັກສົມບູນ ຊຸດທີ 4 ທີ່ຄົບມາດຖານເງື່ອນໄຂຂອງພັກ ມີຈໍານວນ 13 ສະຫາຍ.
ໃນຕອນທ້າຍພິທີ, ສະຫາຍ ປອ ນາງ ສູນທອນ ໄຊຍະຈັກ ໄດ້ໃຫ້ກຽດມີຄຳເຫັນໂອ້ລົມ ເຊິ່ງສະຫາຍໄດ້ສະແດງຄວາມຊົມເຊີຍຕໍ່ຜົນສໍາເລັດຂອງບັນດາໜ່ວຍພັກໃນການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຕະຫຼອດໄລຍະ 1 ປີຜ່ານມາ ເຊິ່ງປະກອບມີໜ່ວຍພັກຫ້ອງການ, ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກກົມອາຊີ-ປາຊີຟິກ ແລະ ອາຟຣິກກາ, ໜ່ວຍພັກກົມຄົ້ນຄວ້າ-ສັງລວມ ແລະ ໜ່ວຍພັກກົມພົວພັນສາກົນຂອງອົງການຈັດຕັ້ງມະຫາຊົນ, ພ້ອມນີ້ ສະຫາຍມີຄວາມເຊື່ອໝັ້ນວ່າ ບັນດາໜ່ວຍພັກດັ່ງກ່າວຈະສືບຕໍ່ນຳພາໜ່ວຍພັກຂອງຕົນ ເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ, ສຶບຕໍ່ເປັນແບບຢ່າງທີ່ດີ ຮັກສາໄດ້ມູນເຊື້ອໜ່ວຍພັກປອດໃສ ເຂັ້ມແຂງ ໜັກແໜ້ນຕະຫຼອດໄປ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິຂອງກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກ ຄະນະພົວພັນຕ່າງປະເທດສູນກາງພັກ ໃຫ້ມີຜົນສໍາເລັດ ແລະ ເປັນການສ້າງຜົນງານຕ້ອນຮັບກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກຄະນະພົວພັນຕ່າງປະເທດສູນກາງພັກທີ່ຈະຈັດຂຶ້ນໃນມໍ່ໆນີ້…ຯ
