ໂດຍ: ພິດສະໄໝ
ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 11 ສະໄໝທີ X ຕົກລົງໃຫ້ອົງຄະນະພັກຈຳນວນໜຶ່ງ ດຳເນີນກອງປະຊຸມໃຫຍ່ອົງຄະນະພັກຂັ້ນຂອງຕົນ ພາຍຫຼັງສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ແຕ່ໃຫ້ດຳເນີນກອງປະຊຸມຕົວແທນສະມາຊິກພັກ ຫຼື ກອງປະຊຸມສະມາຊິກພັກ. ໃນນັ້ນມີອົງຄະນະພັກກະຊວງວິທະຍາສາດ ແລະ ເຕັກໂນໂລຊີ (ກວຕ).
ອີງຕາມແຈ້ງການເລກທີ 05/ຄລສພ, ລົງວັນທີ 23 ຕຸລາ 2020, ອົງຄະນະພັກກະຊວງວິທະຍາສາດ ແລະ ເຕັກໂນໂລຊີໄດ້ດຳເນີນກອງປະຊຸມຜູ້ແທນສະມາຊິກພັກຂອງຕົນຂຶ້ນ ໃນວັນທີ 30 ພະຈິກ 2020 ໂດຍການເປັນປະທານຂອງສະຫາຍ ບັນດິດ ສຈ. ບໍ່ວຽງຄຳ ວົງດາລາ ກຳມະການສູນກາງພັກ, ເລຂາຄະນະພັກກະຊວງວິທະຍາສາດ ແລະ ເຕັກໂນໂລຊີ, ມີບັນດາສະຫາຍຄະນະພັກ, ເລຂາໜ່ວຍພັກ, ອົງການຈັດຕັ້ງມະຫາຊົນ ອ້ອມຂ້າງ ກວຕ, ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ພ້ອມກັນຮັບຟັງ ການລາຍງານບົດສະຫຼຸບຕີລາຄາການຈັດຕັ້ງປະຕິບັດໜ້າທີ່ວຽກງານໃນໄລຍະ 5 ປີຜ່ານມາ (2016-2020) ແລະ ທິດທາງແຜນການ 5 ປີຕໍ່ໜ້າ (2021-2025). ພ້ອມດຽວກັນນັ້ນ, ບັນດາສະຫາຍຜູ້ແທນກອງປະຊຸມຍັງໄດ້ຄົ້ນຄວ້າປະກອບຄຳຄິດຄຳເຫັນໃສ່ຮ່າງບົດສະຫຼຸບດັ່ງກ່າວ ໃຫ້ສອດຄ່ອງກັບໜ້າທີ່ການເມືອງທີ່ໄດ້ຮັບມອບໝາຍໃນໄລຍະໃໝ່. ພ້ອມກັນນີ້, ຜູ້ແທນກອງປະຊຸມຍັງໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຜູ້ແທນສົມບູນ ແລະ ສຳຮອງເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ຊຶ່ງມີຜູ້ສະໝັກ 11 ສະຫາຍ, ຍິງ 3 ສະຫາຍ, ປ່ອນບັດເລືອກເອົາຜູ້ແທນສົມບູນ 5 ສະຫາຍ ແລະ ສຳຮອງ 2 ສະຫາຍ.
