ໂດຍ: ສ. ສົດໃສ
ໃນວັນທີ 17 ພະຈິກ 2020 ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມໃຫຍ່ຜູ້ແທນອົງຄະນະພັກກະຊວງ ຄັ້ງທີ VI ໂດຍການເປັນປະທານຂອງສະຫາຍ ປອ ເພັດ ພົມພິພັກ ກຳມະການສູນກາງພັກ, ເລຂາຄະນະພັກກະຊວງກະສິກຳ ແລະ ປ່າໄມ້, ເປັນກຽດເຂົ້າຮ່ວມຂອງສະຫາຍ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ມີສະມາຊິກພັກອາວຸໂສບຳນານ, ຜູ້ແທນກອງປະຊຸມ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ກອງປະຊຸມ ໄດ້ສະຫຼຸບຕີລາຄາຄືນການຊີ້ນຳ-ນຳພາຂອງຄະນະພັກກະຊວງຕະຫຼອດໄລຍະ 5 ປີ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ຜ່ານມາ ແລະ ວາງທິດທາງແຜນການພັດທະນາຂະແໜງກະສິກຳ-ປ່າໄມ້ ແລະ ພັດທະນາຊົນນະບົດ 5 ປີຕໍ່ໜ້າ (2021-2025).
ຜູ້ແທນກອງປະຊຸມ ໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະພັກກະຊວງສິກຳ ແລະ ປ່າໄມ້ ຊຸດໃໝ່ 15 ສະຫາຍ, ຍິງ 3 ສະຫາຍ ຈາກຜູ້ສະໝັກ 19 ສະຫາຍ, ຍິງ 4 ສະຫາຍ; ກອງປະຊຸມຄັ້ງປະຖົມມະເລີກຂອງຄະນະພັກກະຊວງຊຸດໃໝ່ ໄດ້ເລືອກເອົາຄະນະປະຈຳ 5 ສະຫາຍ, ຍິງ 1 ສະຫາຍ, ເລືອກເອົາສະຫາຍ ປອ ເພັດ ພົມພິພັກ ເປັນເລຂາຄະນະພັກ, ສະຫາຍ ທອງພັດ ວົງມະນີ ເປັນຮອງເລຂາຄະນະພັກ, ເລືອກເອົາສະຫາຍ ນາງ ພວງເພັດ ປູ່ວັງ ເປັນປະທານກວດກາຄະນະພັກ, ສະຫາຍ ສົມພອນ ແກ້ວຫາວົງ ແລະ ສະຫາຍ ສົມສັກ ສີສົມພູ ເປັນຮອງປະທານກວດກາຄະນະພັກ. ພ້ອມນີ້ ຜູ້ແທນກອງປະຊຸມຍັງໄດ້ປ່ອນບັດເລືອກຕັ້ງເອົາຜູ້ແທນສົມບູນ 6 ສະຫາຍ ແລະ ສຳຮອງ 2 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກ.
ຕອນທ້າຍຂອງກອງປະຊຸມ ສະຫາຍ ປອ ບຸນທອງ ຈິດມະນີ ໄດ້ໃຫ້ກຽດໂອ້ລົມຕໍ່ກອງປະຊຸມດັ່ງກ່າວ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານຂອງຄະນະພັກຊຸດເກົ່າ ແລະ ມີທິດຊີ້ນຳໃຫ້ຄະນະພັກຊຸດໃໝ່ ພ້ອມດ້ວຍສະມາຊິກພັກ-ພະນັກງານທົ່ວຂະແໜງການກະສິກຳ-ປ່າໄມ້ ສືບຕໍ່ເປັນການນຳຫຼັກແຫຼ່ງ ແລະ ເປັນເຈົ້າການໃນການຈັດຕັ້ງປະຕິບັດວຽກງານໃນຂະແໜງການກະສິກຳ ແລະ ປ່າໄມ້ ເຮັດໃຫ້ຄາດໝາຍສູ້ຊົນທີ່ມະຕິກອງປະຊຸມໃຫຍ່ຄັ້ງນີ້ວາງໄວ້ໃຫ້ປະກົດຜົນເປັນຈິງ, ພັດທະນາຂະແໜງການກ້າວສູ່ຄວາມທັນສະໄໝຂຶ້ນໄປເລື້ອຍໆ.
