ໂດຍ: ສ. ສົດໃສ
ກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງ ສປປລ (ທຫລ) ຄັ້ງທີ IV ຈັດຂຶ້ນໃນລະ ຫວ່າງວັນທີ 14-15 ກັນຍາ 2020 ທີ່ສະຖາບັນການທະນາຄານ ພາຍໃຕ້ການເປັນປະທານຂອງສະຫາຍ ສອນໄຊ ສິດພະໄຊ ກຳມະການສຳຮອງສູນກາງພັກ ເລຂາຄະນະພັກທະນາຄານແຫ່ງ ສປປລ ໂດຍການໃຫ້ກຽດເຂົ້າຮ່ວມຂອງສະຫາຍນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ມີຜູ້ຕາງໜ້າຈາກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ພະນັກງານປະຕິ ວັດອາວຸໂສ-ບຳນານ, ຜູ້ແທນສົມບູນ 131 ສະຫາຍ, ຍິງ 46 ສະຫາຍທີ່ເປັນຕົວແທນໃຫ້ແກ່ສະມາຊິກພັກທົ່ວອົງຄະນະພັກ ທຫລ ທັງໝົດ 909 ສະຫາຍໃນທົ່ວອົງຄະນະພັກ ທຫລ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມໄດ້ຜ່ານຮ່າງລາຍງານການເມືອງ ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກ ຄັ້ງຜ່ານມາ ຍົກໃຫ້ເຫັນຜົນງານການເຄື່ອນໄຫວໃນໄລຍະ 5 ປີ ດ້ານດີ ດ້ານອ່ອນ ຂໍ້ຄົງຂ້າງ ບົດຮຽນທີ່ຖອດຖອນໄດ້ ພ້ອມກັບວາງທິດທາງແຜນການ 5 ປີໃນຕໍ່ໜ້າ.
ໃນໄລຍະ 5 ຜ່ານມາ ອົງຄະນະພັກ ທຫລ ພ້ອມດ້ວຍສະມາຊິກພັກ-ພະນັກງານທົ່ວຂະແໜງ ທະນາຄານ ໄດ້ພ້ອມກັນຜ່ານຜ່າສິ່ງທ້າທາຍທົດສອບນາໆປະການ ແລະ ພ້ອມກັນສູ້ຊົນຍາດໄດ້ຜົນງານໃໝ່ຫຼາຍດ້ານ ເປັນຕົ້ນສາມາດຮັກສາສະຖຽນລະພາບເງິນຕາແຫ່ງຊາດໃຫ້ມີຄວາມໝັ້ນທ່ຽງໂດຍພື້ນຖານ, ອັດຕາເງິນເຟີ້, ປະລິມານເງິນ, ອັດຕາແລກປ່ຽນ ແລະ ຄັງສຳຮອງເງິນຕາຕ່າງປະເທດ ຢູ່ໃນລະດັບທີ່ກຳນົດໄວ້, ລະບົບທະນາຄານທຸລະກິດ ແລະ ສະຖາບັນການເງິນມີການຂະຫຍາຍຕົວ ແລະ ການເຄື່ອນໄຫວມີປະສິດທິພາບດີຂຶ້ນ; ການລະດົມທຶນ ແລະ ການສະໜອງສິນເຊື່ອສະເລ່ຍເພີ່ມຂຶ້ນ, ລະບົບການຊຳລະ ແລະ ການບໍລິການຂອງທະນາຄານຫັນໄປສູ່ຄວາມທັນສະໄໝ, ລວມສູນ ແລະ ປອດໄພ, ການຮ່ວມມືກັບສາກົນນັບມື້ນັບກວ້າງຂວາງ ແລະ ເຄື່ອນໄຫວຕາມແນວທາງການຕ່າງປະເທດຂອງພັກ ໂດຍສະເພາະການຮ່ວມມືສອງຝ່າຍ, ຫຼາຍຝ່າຍໃນຫຼາຍລະດັບ ຊຶ່ງສາມາດຍາດແຍ່ງທຶນຮອນ ແລະ ການຊ່ວຍເຫຼືອດ້ານວິຊາການນັບມື້ເພິ່ມຂຶ້ນເຮັດໃຫ້ຖານະບົດບາດຂະແໜງທະນາຄານຂອງ ສປປ ລາວ ໃນ ເວທີພາກພື້ນ ແລະ ສາກົນໄດ້ຮັບການຍົກສູງຂຶ້ນກວ່າເກົ່າ.
ວຽກງານກໍ່ສ້າງພັກ-ພະນັກງານ: ໄດ້ຖືເອົາການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ເປັນວຽກໃຈກາງຂອງການເຄື່ອນໄຫວປະຕິບັດໜ້າທີ່ການເມືອງຂອງແຕ່ລະຮາກຖານພັກ; ໄດ້ປັບປຸງການຈັດຕັ້ງໃຫ້ມີຄວາມເຂັ້ມແຂງຢູ່ 48 ຮາກຖານພັກ, ສ້າງຕັ້ງໃໝ່ 2 ໜ່ວຍພັກຮາກຖານ ແລະ ປັບປຸງໜ່ວຍພັກທີ່ມີສະມາຊິກພັກຈໍານວນຫຼາຍ ໂດຍແຍກ ແລະ ສ້າງຕັ້ງໃໝ່ 8 ໜ່ວຍພັກ, ປັບປຸງຄະນະໜ່ວຍພັກ-ຄະນະພັກຮາກຖານໃຫ້ສອດຄ່ອງກັບການປັບປຸງເບື້ອງລັດ; ເອົາໃຈໃສ່ປັບປຸງຄຸນນະພາບຂອງສະມາຊິກພັກໃຫ້ມີຄຸນນະພາບສູງຍິ່ງຂຶ້ນ ຜ່ານການຕີລາຄາຄຸນນະພາບການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບ ດ້ານ ໃນປີ 2015-2017 ສາມາດຮັບຮອງໜ່ວຍພັກປະເພດດັ່ງກ່າວໄດ້ ກວມ 60% ຂອງຈໍານວນ ໜ່ວຍພັກທີ່ໄດ້ຮັບການຕີລາຄາ; ສຳລັບປີ 2018 ແລະ 2019 ສາມາດຮັບຮອງໜ່ວຍພັກປອດໃສ ເຂັ້ມແຂງ ໜັກແໜ້ນ ກວມ 33% ແລະ 45% ທຽບໃສ່ໜ່ວຍພັກທີ່ໄດ້ຮັບການຕີລາຄາຕາມລຳດັບ. ຄະນະພັກ ທຫລ ໄດ້ເອົາໃຈໃສ່ຊີ້ນຳ-ນຳພາປັບປຸງກົງຈັກການຈັດຕັ້ງລັດແຕ່ລະຂັ້ນໃຫ້ສອດຄ່ອງກັບສະພາບການເລັ່ງທວງຂອງວຽກງານຕົວຈິງຢ່າງເປັນລະບົບຄົບຊຸດ ເພື່ອໃຫ້ເຄື່ອນໄຫວໄດ້ຢ່າງຄ່ອງຕົວຍິ່ງຂຶ້ນ ເປັນຕົ້ນແມ່ນການປັບປຸງພາລະບົດບາດ ແລະ ສັບຊ້ອນກົງຈັກຈຳນວນໜຶ່ງຄືນໃໝ່ຕາມການປ່ຽນແປງ ຂອງໜ້າທີ່ວຽກງານໃນແຕ່ລະໄລຍະຕາມທິດກະທັດຮັດ, ສົມເຫດສົມຜົນ ແລະ ຕອບສະໜອງໄດ້ຄວາມຮຽກຮ້ອງຕ້ອງການຂອງວຽກງານ. ການບຳລຸງ-ກໍ່ສ້າງ, ສັບຊ້ອນ-ຈັດວາງ ແລະ ປະຕິບັດລະບອບນະໂຍບາຍອຸດໜູນຕ່າງໆຕໍ່ພະນັກງານ ແມ່ນໄດ້ປະຕິບັດຕາມລະບຽບການ ແລະ ເງື່ອນໄຂຕົວຈິງ; ຫັນບາງນິຕິກຳກ່ຽວກັບວຽກງານນະໂຍບາຍຂອງຂັ້ນເທິງເພື່ອສ້າງ ແລະ ປັບປຸງລະບຽບການພາຍໃນຂອງຕົນ.
ສຳລັບທິດທາງ ຄາດໝາຍ ແລະ ໜ້າທີ່ຕົ້ນຕໍໃນ 5 ປີຕໍ່ໜ້າ ແມ່ນສືບຕໍ່ເພີ່ມທະວີຄວາມສາມັກຄີ ເປັນເອກະພາບພາຍໃນພັກ, ຄວາມສາມາດໃນການນຳພາຂອງຄະນະພັກທຸກຂັ້ນໃນທຸກຂົງເຂດວຽກງານ ແລະ ຄວາມເປັນແບບຢ່າງນຳໜ້າສະມາຊິກພັກຕໍ່ຄວາມຮັບຜິດຊອບທາງການເມືອງ; ສືບຕໍ່ປັບປຸງການຈັດຕັ້ງແຕ່ລະຂັ້ນໃຫ້ມີຄວາມປອດໃສ ເຂັ້ມແຂງ ໜັກແໜ້ນ; ເຂັ້ມງວດດ້ານລະບຽບວິໄນໃນການປັບປຸງ ກໍ່ສ້າງພັກ-ພະນັກງານ ໂດຍສະເພາະດ້ານຄຸນທາດການເມືອງ, ຄຸນສົມບັດສິນທຳປະຕິວັດເປັນບັນຫາສຳຄັນຕົ້ນຕໍ; ບຳລຸງກໍ່ສ້າງພັກ-ພະນັກງານໃຫ້ຮັບປະກັນທາງດ້ານປະລິມານ ແລະ ຄຸນນະພາບ ເພື່ອເປັນການເສີມຂະຫຍາຍຫົວຄິດປະດິດສ້າງ ແລະ ສ້າງຄວາມເຂັ້ມແຂງດ້ວຍຕົນເອງ ແລະ ສືບຕໍ່ປະຕິບັດໜ້າທີ່ການເມືອງຂອງຕົນຢ່າງມີປະສິດທິຜົນ, ສືບຕໍ່ປັບປຸງແບບແຜນການນຳພາ-ວິທີເຮັດວຽກຂອງຄະນະພັກຂັ້ນຕ່າງໆໃຫ້ສອດຄ່ອງຕາມຫຼັກການຂອງພັກຢ່າງມີວິທະຍາສາດ ແລະ ແທດເໝາະກັບສະພາບຄວາມເປັນຈິງໃນແຕ່ລະໄລຍະ, ລວມທັງກົນໄກປະສານງານລະຫວ່າງສາຍຕັ້ງ ແລະ ສາຍຂວາງ; ຂັ້ນເທິງກັບຂັ້ນລຸ່ມ, ອຳນາດການປົກຄອງກັບຂະແໜງການກ່ຽວຂ້ອງ ເພື່ອອຳນວຍຊ່ວຍໜູນເຊິ່ງກັນ ແລະ ກັນ ໃນການຈັດຕັ້ງປະຕິບັດບັນດາທິດທາງແຜນການທີ່ກຳນົດໄວ້ໃຫ້ປະກົດຜົນເປັນຈິງ; ພັດທະນາລະບົບການເງິນ-ເງິນຕາຂອງ ສປປ ລາວ ດ້ວຍການໝູນໃຊ້ເສດຖະກິດຕະຫຼາດທີ່ມີການຄຸ້ມຄອງຂອງລັດຢ່າງມີວິທະຍາສາດ ເພື່ອຮັບປະກັນສະຖຽນລະພາບດ້ານເງິນຕາແຫ່ງຊາດໃຫ້ໝັ້ນທ່ຽງ, ພັດທະນາລະບົບສະຖາບັນການເງິນ-ເງິນຕາໃຫ້ເຂັ້ມແຂງ-ໝັ້ນຄົງ; ຄົ້ນຄວ້ານະໂຍບາຍ ຫຼຸດຜ່ອນການນຳເຂົ້າ ແລະ ສົ່ງເສີມ ການສົ່ງອອກ ເພື່ອຫຼຸດຜ່ອນການຂາດດຸນກັບຕ່າງປະເທດ; ປະກອບສ່ວນຊຸກຍູ້ການພັດທະນາເສດຖະກິດ-ສັງຄົມໃຫ້ຂະຫຍາຍຕົວຢ່າງມີຄຸນນະພາບສົມດຸນ ແລະ ຍືນຍົງ; ເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການຍົກລະດັບດີຂຶ້ນ ແລະ ສາມາດແຂ່ງຂັນໃນເງື່ອນໄຂການເຊື່ອມໂຍງກັບສາກົນ.
ໃນວາລະກອງປະຊຸມ ຜູ້ແທນໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະພັກ ຊຸດໃໝ່ 15 ສະຫາຍ ຈາກຜູ້ສະໝັກ 19 ສະຫາຍ, ກອງປະຊຸມຄັ້ງປະຖົມມະເລີກຂອງຄະນະພັກຊຸດໃໝ່ ໄດ້ເລືອກເອົາຄະນະປະຈຳ 5 ສະຫາຍ, ເລືອກເອົາສະຫາຍ ສອນໄຊ ສິດພະໄຊ ເປັນເລຂາຄະນະພັກ, ສະຫາຍ ຄຳວົງ ທິບພະວົງ ເປັນຮອງເລຂາ, ສະຫາຍ ນາງ ວັດທະນາ ດາລາລອຍ ເປັນປະທານກວດກາ ພ້ອມນັ້ນ ຜູ້ແທນກອງປະຊຸມຍັງໄດ້ພ້ອມກັນປ່ອນບັດເລືອກເອົາຜູ້ແທນສົມບູນ 5 ສະຫາຍ ແລະ ສຳຮອງ 2 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ທີ່ຈະໄຂຂຶ້ນໃນຕໍ່ໜ້າຕື່ມອີກ.
ໃນໂອກາດເຂົ້າຮ່ວມກອງປະຊຸມທີ່ມີຄວາມໝາຍສຳຄັນນີ້ ສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ໄດ້ມີຄຳເຫັນໂອ້ລົມສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການຊີ້ນຳ-ນຳພາຂອງຄະນະພັກ ທຫລ ສະໄໝຜ່ານມາ ແລະ ເນັ້ນໃຫ້ຄະນະພັກຊຸດໃໝ່ ແລະ ບັນດາສະມາຊິກພັກທຸກສະຫາຍພາຍໃນ ທຫລ ຕ້ອງເປັນເຈົ້າການຄົ້ນຄວ້າ, ເຊື່ອມຊຶມບັນດາແນວທາງນະໂຍບາຍ, ມະຕິ, ຄຳສັ່ງຂອງພັກ-ລັດໃຫ້ເປັນປົກກະຕິ, ກຳແໜ້ນມະຕິກອງປະຊຸມໃຫຍ່ຄັ້ງນີ້ ນຳໄປຈັດຕັ້ງຜັນຂະຫຍາຍເຂົ້າສູ່ວຽກງານປະຈຳວັນຂອງຕົນໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້…ຯ