ໃນວັນທີ 14 ສິງຫາ 2020 ທີ່ສະໂມສອນຫ້ອງການປົກຄອງເມືອງຈັນທະບູລີ ໄດ້ຈັດພິທີປິດຊຸດຝຶກອົບຮົມທິດສະດີການເມືອງ-ການປົກຄອງໄລຍະສັ້ນ 10 ວັນ ຊຸດທີ II ໂດຍການເປັນປະທານຂອງສະຫາຍ ເພັດສະໄໝ ນັດຜາສຸກ ຮອງເລຂາພັກເມືອງຈັນທະບູລີ ໂດຍການເຂົ້າຮ່ວມ ແລະ ມອບໃບຢັ້ງຢືນຂອງສະຫາຍ ນາງ ວຽງພອນ ແກ້ວຄູນສີ ເລຂາຄະນະພັກຮາກຖານ, ຫົວໜ້າໂຮງຮຽນການເມືອງ ແລະ ການປົກຄອງນະຄອນຫຼວງວຽງຈັນ, ມີຜູ້ເຂົ້າຮ່ວມຊຸດຝຶກອົບຮົມທັງໝົດ 56 ສະຫາຍ ແລະ ແຂກຖືກເຊີນເຂົ້າຮ່ວມ.
ຈຸດປະສົງການຝຶກອົບຮົມກໍ່ເພື່ອເປັນການຍົກລະດັບທິດສະດີການເມຶອງ ແລະ ການປົກຄອງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ໃຫ້ເລຂາໜ່ວຍພັກ, ນາຍບ້ານໃຫ້ມີຄຸນທາດການເມືອງໜັກແໜ້ນ, ເຊື່ອໝັ້ນຕໍ່ການນຳພາຂອງພັກ, ມີຄວາມຈົງຮັກພັກດີຕໍ່ປະເທດຊາດ, ມີຄວາມຫ້າວຫັນເປັນແບບຢ່າງທຸກວຽກງານໃນການປະຕິບັດໜ້າທີ່ການເມືອງຢູ່ຂັ້ນຮາກຖານບ້ານໃຫ້ມີຄຸນນະພາບສູງຂຶ້ນຕາມຄວາມຮຽກຮ້ອງຕ້ອງການໃນແຕ່ລະໄລຍະ.
ເນື້ອໃນເອກະສານໃນການຝຶກອົບຮົມມີ 3 ພາກ ປະກອບມີ 20 ບົດຄື: ພາກແນວທາງລວມ 4 ບົດ, ພາກວຽກງານການນຳພາຂອງພັກ 7 ບົດ, ພາກວຽກງານປົກຄອງ ແລະ ບໍລິຫານ 8 ບົດ ແລະ ເອກະສານສຳຄັນຂອງພັກອີກຈຳນວນໜຶ່ງ, ຊຸດຝຶກອົບຮົມໄດ້ເລີ່ມຮຽນແຕ່ວັນທີ 24 ກໍລະກົດ 2020 ເຖິງວັນທີ 11 ສິງຫາ 2020. ຜ່ານການຕີລາຄາຜົນໄດ້ຮັບຈາກການຝຶກອົບຮົມເຫັນວ່າ ນັກຝຶກອົບຮົມແຕ່ລະສະຫາຍໄດ້ປະຕິບັດໜ້າທີ່ການເມືອງຂອງຕົນ ເອົາໃຈໃສ່ຂຶ້ນຫ້ອງຮັບຟັງການບັນຍາຍຂອງຄູ-ອາຈານ ແລະ ປະກອບຄຳຄິດຄຳເຫັນແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳໄດ້ເປັນຢ່າງດີ.
ໃນຕອນທ້າຍຂອງພິທີຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຈາກສະຫາຍ ນາງ ວຽງພອນ ແກ້ວຄູນສີ ເລຂາຄະ ນະພັກຮາກຖານ, ຫົວໜ້າໂຮງຮຽນການເມືອງ ແລະ ການປົກຄອງນະຄອນຫຼວງວຽງຈັນ ແລະ ຄຳເຫັນຈາກ ສະຫາຍ ເພັດສະໄໝ ນັດຜາສຸກ ຮອງເລຂາພັກເມືອງຈັນທະບູລີ ເຊິ່ງໄດ້ເນັ້ນໃຫ້ຜູ້ເຂົ້າຮ່ວມຮັບການຝຶກອົບຮົມຄັ້ງນີ້ ຈົ່ງພ້ອມກັນ ນຳເອົາບົດຮຽນທີ່ໄດ້ໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ມີຜົນສຳເລັດດ້ວຍຄຸນນະພາບໃໝ່.
ໂດຍ: ວິລະສະໄໝ ຍົດບຸນມີ
