ໃນສົກປີ 2019-2020 ກະຊວງແຜນການ ແລະ ການລົງທຶນໄດ້ສ້າງຂະບວນການກິດຈະກຳຫຼາຍຢ່າງຕ້ອນຮັບກອງປະຊຸມໃຫຍ່ອົງຄະນະພັກຂອງຕົນ ເປັນຕົ້ນການດຳເນີນກອງປະຊຸມໃຫຍ່ຂອງບັນດາໜ່ວຍພັກອ້ອມຂ້າງກະຊວງ, ການຈັດຝຶກອົບຮົມທິດສະດີການເມືອງການປົກຄອງໄລຍະ 45 ວັນ ແລະ ວຽກງານພັກ-ພະນັກງານໃຫ້ບັນດາເລຂາໜ່ວຍພັກ ແລະ ສະມາຊິກພັກ, ກອງປະຊຸມເຜີຍແຜ່-ເຊື່ອມຊຶມແນວທາງນະໂຍບາຍຂອງພັກ, ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X, ບັນດານິຕິກໍາສໍາຄັນຕ່າງໆຂອງພັກ, ຂະບວນການແຂ່ງຂັນກິລາ, ອອກແຮງງານລວມ ແລະ ປູກຕົ້ນໄມ້.
ໃນ 6 ເດືອນຕົ້ນປີ 2020 ຫຼາຍໜ່ວຍພັກໄດ້ສຳເລັດການດຳເນີນກອງປະຊຸມໃຫຍ່ຂອງຕົນ ເຊິ່ງເປັນການປັບປຸງການຈັດຕັ້ງພັກ ແລະ ເລືອກຜູ້ແທນເພື່ອເຂົ້າຮ່ວມກອງປະຊຸມໃຫຍ່ອົງຄະນະພັກກະຊວງ ພ້ອມທັງກຽມຄວາມພ້ອມທຸກດ້ານໃຫ້ແກ່ການດຳເນີນກອງປະຊຸມໃຫຍ່ອົງຄະນະພັກກະຊວງທັນຕາມກຳນົດເວລາ.
ໃນເດືອນ ກໍລະກົດ 2020 ໄດ້ຈັດກອງປະຊຸມເຜີຍແຜ່, ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ X ແລະ ບັນດານິຕິກໍາສໍາຄັນຕ່າງໆຂອງພັກ, ພາຍໃຕ້ການເປັນປະທານຂອງສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ເລຂາຄະນະພັກ, ລັດຖະມົນຕີ ກະຊວງແຜນການ ແລະ ການລົງທຶນ, ມີບັນດາສະຫາຍຄະນະພັກກະຊວງ, ຄະນະກົມ, ຫ້ອງການ, ຄະນະພະແນກ, ພະນັກງານວິຊາການ ແລະ ສະມາຊິກພັກ ທົ່ວກະຊວງແຜນການ ແລະ ການລົງທຶນ 300 ກວ່າຄົນເຂົ້າຮ່ວມ.
ໃນພິທີ ຍັງໄດ້ເຜີຍແຜ່ມະຕິຂອງກົມການເມືອງສູນກາງພັກ ສະບັບເລກທີ 108/ກມສພ, ລົງວັນທີ 30 ເມສາ 2020 ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກໃນໄລຍະໃໝ່, ມະຕິຂອງກົມການເມືອງສູນກາງພັກ ສະບັບເລກທີ 111/ກມສພ, ລົງວັນທີ 22 ພຶດສະພາ 2020 ວ່າດ້ວຍການເພີ່ມທະວີວຽກງານປ້ອງກັນຄວາມສະຫງົບໃນສະພາບໃໝ່, ມະຕິຂອງກົມການເມືອງສູນກາງພັກ ສະບັບເລກທີ 112/ກມສພ, ລົງວັນທີ 02 ມິຖຸນາ 2020 ວ່າດ້ວຍການຍົກສູງຄຸນນະພາບການດຳເນີນຕາມຂະບວນຍຸຕິທຳ ແລະ ມະຕິຂອງກົມການເມືອງສູນກາງພັກ ສະບັບເລກທີ 107/ກມສພ, ລົງວັນທີ 30 ເມສາ 2020 ວ່າດ້ວຍການພັດທະນານະຄອນຫລວງວຽງຈັນ;
ກອງປະຊຸມເຜີຍແຜ່ເຊື່ອມຊຶມຄັ້ງນີ້ ໄດ້ເຮັດໃຫ້ຜູ້ເຂົ້າຮ່ວມຮັບຮູ້-ເຂົ້າໃຈ, ກຳແໜ້ນ, ເຊື່ອມຊຶມ ແລະ ເປັນເອກະພາບສູງຕໍ່ບັນດາເນື້ືອໃນສໍາຄັນຂອງເອກະສານດັ່ງກ່າວ, ກຳໄດ້ສະພາບລວມໃນແຕ່ລະໄລຍະ ເພື່ອຫັນເນື້ອໃນຈິດໃຈເອກະສານດັ່ງກ່າວເປັນທິດທາງ, ເປັນແຜນປະຕິບັດງານລະອຽດຕາມໜ້າທີ່ການເມືອງໃນຄວາມຮັບຜິດຊອບຂອງຕົນ, ຍົກສູງຄວາມເປັນເຈົ້າການ ແລະ ຄວາມສາມາດໃນການນໍາວຽກງານຂອງຕົນ.
ນອກນີ້ ຍັງໄດ້ຈັດໃຫ້ມີການແຂ່ງຂັນກິລາ, ອອກແຮງງານລວມ ແລະ ປູກຕົ້ນໄມ້ຢ່າງເປັນຂະບວນຟົດຟື້ນ ທັງນີ້ກໍ່ເພື່ອສ້າງຄວາມສາມັກຄີ ແລະ ພັດທະນາຮ່າງກາຍໃຫ້ມີສຸຂະພາບແຂງແຮງ, ມີອາລົມຈິດເບີກບານມ່ວນຊື່ນ ແລະ ມີຄຸນນະພາບຊີວິດທີ່ດີ ເພື່ອປະກອບສ່ວນເຫື່ອແຮງ ແລະ ສະຕິປັນຍາຂອງຕົນເຂົ້າໃນການປະຕິບັດວຽກງານວິຊາສະເພາະໃຫ້ໄດ້ຮັບຜົນສໍາເລັດສູ່ຄຸນນະພາບໃໝ່.
ຮວບຮວມຂ່າວໂດຍ: ວິລະສະໄໝ ຍົດບຸນມີ
