ໃນວັນທີ 30 ມິຖຸນາ 2020, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດພິທີມອບ-ຮັບບັດສະມາຊິກພັກສົມບູນ ຊຸດທີ 03 ໃຫ້ສະມາຊິກພັກສົມບູນຜູ້ທີ່ຄົບມາດຖານເງື່ອນໄຂ ຈຳນວນ 12 ສະຫາຍ ໂດຍໃຫ້ກຽດມອບບັດ ແລະ ເຂົ້າຮ່ວມເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ມີບັນດາສະຫາຍໃນຄະນະພັກ, ຄະນະໜ່ວຍພັກ ແລະ ສະມາຊິກພັກອ້ອມຂ້າງຄະນະພົວພັນຕ່າງປະເທດສູນກາງພັກເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ນາງ ພອນດາວັນ ພິນສະຫວັນ, ຫົວໜ້າຫ້ອງການ ຄຕພ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານຂໍ້ຕົກລົງການອະນຸມັດມອບບັດສະມາຊິກພັກສົມບູນ ເຊິ່ງເປັນບັດຢັ້ງຢືນເຖິງຖານະນາມຂອງສະມາຊິກພັກສົມບູນຜູ້ທີ່ດີເດັ່ນ, ເຮັດຫຼ້ອນໜ້າທີ່, ມີຄຸນງາມຄວາມດີ, ມີຄວາມບໍລິສຸດສັດຊື່ຕໍ່ຊາດ, ຕໍ່ປະຊາຊົນ ແລະ ຈົງຮັກພັກດີຕໍ່ອຸດົມການຂອງພັກ, ເປັນແບບຢ່າງທີ່ດີ, ເຄົາລົບ ແລະ ປະຕິບັດລະບຽບຂອງພັກ, ກົດໝາຍຂອງລັດ.
ໃນໂອກາດເຂົ້າຮ່ວມພິທີທີ່ມີຄວາມໝາຍສໍາຄັນນີ້ ສະຫາຍ ປອ ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມຕໍ່ພິທີດັ່ງກ່າວ ໂດຍສະຫາຍໄດ້ເນັ້ນໜັກເຖິງຄວາມໝາຍ ຄວາມສໍາຄັນຂອງບັດສະມາຊິກພັກ ແລະການອອກບັດ-ມອບບັດສະມາຊິກພັກ ເຊິ່ງເປັນຂະບວນການລວມຂອງທົ່ວພັກ ແນໃສ່ການເພີ່ມທະວີການຄຸ້ມຄອງສະມາຊິກພັກ, ຄຸ້ມຄອງການຈັດຕັ້ງພັກ ແລະ ປ້ອງກັນພັກ, ເພື່ອໃຫ້ພັກເພີ່ມຄວາມເຂັ້ມແຂງ, ສືບຕໍ່ມີບົດບາດຊີ້ນໍາ-ນໍາພາ ປົກປັກຮັກສາ ແລະ ພັດທະນາປະເທດຊາດສູ່ຈຸດໝາຍສັງຄົມນິຍົມ…ຯ
ໂດຍ: ສໍສົດໃສ
