ໃນວັນທີ 17 ມີນາ 2020 ທີ່ຄະນະພົວພັນຕ່າງປະເທດສູນກາງພັກ ໄດ້ຈັດພິທີມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ 5 ໜ່ວຍພັກທີ່ຂຶ້ນກັບຄະນະພັກ ຄະນະພົວພັນຕ່າງປະເທດສູນກາງພັກ ໂດຍການເປັນກຽດເຂົ້າຮ່ວມຂອງສະຫາຍ ປອ ນາງ ສູນທອນ ໄຊຍະຈັກ ກຳມະການສູນກາງພັກ, ເລຂາຄະນະພັກ ຄະນະພົວພັນຕ່າງປະເທດສູນກາງພັກ, ມີຮອງເລຂາຄະນະພັກ, ປະທານກວດກາພັກ, ຄະນະພັກ, ເລຂາ-ຮອງເລຂາໜ່ວຍພັກ, ສະມາຊິກພັກສົມບູນ ແລະ ສຳຮອງພາຍໃນຄະນະພົວພັນຕ່າງປະເທດສູນກາງພັກເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ນາງ ພອນດາວັນ ພິນສະຫວັນ ຫົວໜ້າຫ້ອງການພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານບົດລາຍງານສະພາບການເຄື່ອນໄຫວວຽກງານການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ແລະ ທິດທາງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020.
ຜ່ານການຕີລາຄາປະເມີນຜົນການກໍ່ສ້າງ ແລະ ຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ຜ່ານມາ ມີທັງໝົດ 6 ໜ່ວຍພັກ ເຫັນວ່າໜ່ວຍພັກທີ່ຄົບມາດຖານເງື່ອນໄຂເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ທີ່ໄດ້ຮັບການເຫັນດີຈາກຄະນະຈັດຕັ້ງສູນກາງພັກ ກໍຄືຄະນະພັກ ຄະນະພົວພັນຕ່າງປະເທດສູນກາງພັກ ມີຈຳນວນ 5 ໜ່ວຍພັກ ກວມເອົາ 90% ຂອງໜ່ວຍພັກ ທີ່ໄດ້ຮັບນາມມະຍົດເປັນໜ່ວຍພັກປອດໃສ ເຂັ້ມແຂງ ໜັກແໜ້ນຄື: ໜ່ວຍພັກຫ້ອງການ ຄະນະພົວພັນຕ່າງປະເທດສູນກາງພັກ, ໜ່ວຍພັກກົມຈັດຕັ້ງ-ພະນັກງານ, ໜ່ວຍພັກກົມຄົ້ນຄວ້າ-ສັງລວມ, ໜ່ວຍພັກກົມພົວພັນສາກົນຂອງອົງການຈັດຕັ້ງມະຫາຊົນ ແລະ ໜ່ວຍພັກກົມອາຊີ-ປາຊີຟີກ ແລະ ອາຟຣິກາ.
ໃນຕອນທ້າຍພິທີ ສະຫາຍ ປອ ນາງ ສູນທອນ ໄຊຍະຈັກ ເລຂາຄະນະພັກ ຄະນະພົວພັນຕ່າງປະເທດ ສູນກາງພັກ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ 5 ໜ່ວຍພັກທີ່ຂຶ້ນກັບຄະນະພັກ, ອັນເປັນຂີດໝາຍສຳຄັນໃຫ້ຄະນະພັກ, ຄະນະພົວພັນຕ່າງປະເທດສູນກາງພັກ; ພ້ອມທັງໄດ້ກ່າວໂອ້ລົມສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງ 5 ໜ່ວຍພັກທີ່ຍາດມາໄດ້ ແລະ ເພື່ອເປັນເຂັມທິດເຍືອງທາງໃນຕໍ່ໜ້າ, ສະຫາຍໄດ້ເນັ້ນໜັກໃຫ້ທຸກໜ່ວຍພັກ ແລະ ສະມາຊິກພັກທຸກສະຫາຍຈົ່ງສືບຕໍ່ຈັດຕັ້ງປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ທັງເປັນແບບຢ່າງນຳໜ້າ, ມີສະຕິຕໍ່ການຈັດຕັ້ງ ເພື່ອປະຕິບັດມະຕິກອງປະຊຸມໃຫຍ່ ອົງຄະນະພັກ ຄະນະພົວພັນຕ່າງປະເທດສູນກາງພັກ ຄັ້ງທີ I ໃຫ້ມີຜົນສຳເລັດ ແລະ ເພື່ອກ້າວໄປສູ່ການກະກຽມກອງປະຊຸມໃຫຍ່ ຄັ້ງທີ II ຂອງອົງຄະນະພັກ ຄະນະພົວພັນຕ່າງປະເທດສູນກາງພັກ ໃຫ້ສຳເລັດໃນຕໍ່ໜ້າ…ຯ
ໂດຍ: ສໍສົດໃສ
