ໃນວັນທີ 12 ມີນາ 2020 ຄະນະພັກຮາກຖານໂຮງໝໍມິດຕະພາບ ໄດ້ຈັດກອງປະຊຸມໃຫຍ່ ຄັ້ງທີ III ຂອງຕົນຂຶ້ນ ໂດຍການເປັນປະທານຂອງສະຫາຍ ດຣ. ສະໜອງ ທອງຊະນະ ຄະນະພັກກະຊວງ ເລຂາຄະນະພັກຮາກຖານໂຮງໝໍມິດຕະພາບ, ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມໂດຍສະຫາຍ ຄຳພອນ ພຸດທະວົງ ເລຂາຄະນະພັກກະຊວງສາທາລະນະສຸກ, ມີແຂກຖືກເຊີນຈາກບັນດາກົມ, ໂຮງໝໍ, ມະຫາວິທະຍາໄລ, ສູນຕ່າງໆອ້ອມຂ້າງກະຊວງສາທາລະນະສຸກ ພ້ອມດ້ວຍສະມາຊິກພັກສົມບູນ ແລະ ຕາງໜ້າ 3 ອົງການຈັດຕັ້ງມະຫາຊົນເຂົ້າຮ່ວມທັງໝົດເກືອບ 150 ສະຫາຍ.
ໃນກອງປະຊຸມ ສະຫາຍ ດຣ. ສະໜອງ ທອງຊະນະ ໄດ້ຜ່ານບົດລາຍງານການເມືອງຂອງຄະນະພັກຮາກຖານ ໃນໄລຍະ 5 ປີຜ່ານມາ ຊຶ່ງບົດລາຍງານໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ໃນໄລຍະຜ່ານມາ ພ້ອມທັງທິດທາງແຜນການ 5 ປີຕໍ່ໜ້າ (2020-2024); ຕໍ່ຈາກນັ້ນ ຄະນະພັກຮາກຖານໄດ້ຜ່ານບົດສຳຫຼວດການນຳພາລວມພ້ອມທັງຂຶ້ນກ່າວອຳລາໜ້າທີ່; ຫຼັງຈາກນັ້ນ ຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະພັກຮາກຖານຊຸດໃໝ່ 7 ສະຫາຍ ຈາກຜູ້ສະໝັກ 9 ສະຫາຍ. ກອງປະຊຸມຄັ້ງປະຖົມມະເລີກໄດ້ເປັນເອກະສັນກັນເລືອກເອົາ ສະຫາຍ ດຣ. ສະໜອງ ທອງຊະນະ ເປັນເລຂາຄະນະພັກຮາກຖານອີກໜຶ່ງສະໄໝ, ສະຫາຍ ດຣ. ສອນໄຊ ລາດຊະວົງ ເປັນຮອງເລຂາ ທັງເປັນປະທານກວດກາ, ສະຫາຍ ເພັດວິວັນ ພອນແກ້ວ ເປັນຮອງປະທານກວດກາ ຊີ້ນຳວຽກງານອົງການຈັດຕັ້ງມະຫາຊົນ, ສະຫາຍ ດຣ. ຫວັງນະຄອນ ດິດຕະພົງ ແລະ ສະຫາຍ ດຣ ສົມພິດ ປະທຸມທອງ ຮັບຜິດຊອບຊີ້ນຳວິຊາການ ແລະ ວຽກງານພົວພັນຕ່າງປະເທດ, ສະຫາຍ ນາງ ແກ້ວ ສຸຂະວົງ ຮັບຜິດຊອບວຽກງານການເງີນ, ສະຖິຕິພັກ ແລະ ສະຫາຍ ແກ້ວປະສິດໄຊ ຊາມູນຕີ ຮັບຜິດຊອບວຽກງານປ້ອງກັນ.
ຕອນທ້າຍຂອງກອງປະຊຸມ ຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຈາກສະຫາຍ ຄຳພອນ ພຸດທະວົງ ເລຂາຄະນະພັກກະຊວງສາທາລະນະສຸກ ໂດຍໄດ້ຍ້ອງຍໍຊົມເຊີຍຜົນງານໃນຊຸມປີຜ່ານມາ ແລະ ໄດ້ເນັ້ນໜັກບາງບັນຫາໃຫ້ຄະນະພັກຊຸດໃໝ່ເອົາໃຈໃສ່ 3 ຂົງເຂດ ເຊັ່ນ: ວຽກງານກົງຈັກການຈັດຕັ້ງ-ພະນັກງານ; ວຽກງານວິຊາສະເພາະ ແລະ ວຽກງານເສດຖະກິດ ພ້ອມກັບຮຽກຮ້ອງມາຍັງສະມາຊິກພັກທຸກສະຫາຍ ຈົ່ງພ້ອມກັນເປັນຈິດໜຶ່ງໃຈດຽວນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ບັນລຸຜົນສຳເລັດຕາມຄາດໝາຍທີ່ວາງໄວ້…ຯ
ໂດຍ: ສ.ສົດໃສ