ເດືອນສິງຫາ 2019 ໜ່ວຍພັກກົມຮ່ວມສາກົນ ກະຊວງແຜນການ ແລະ ການລົງທຶນ ໄດ້ຈັດກອງປະຊຸມໃຫຍ່ ຄັ້ງທີ IV ຂອງຕົນຂຶ້ນຢ່າງເປັນທາງການ ທີ່ຫ້ອງປະຊຸມຂອງກະຊວງແຜນການ ແລະ ການລົງທຶນ ເປັນກຽດເຂົ້າເປັນປະທານໂດຍສະຫາຍ ປອ ສຸພັນ ແກ້ວມີໄຊ ກຳມະການສູນກາງພັກ ເລຂາຄະນະບໍລິຫານງານພັກກະຊວງແຜນການ ແລະ ການລົງທຶນ, ມີບັນດາເລຂາໜ່ວຍພັກ, ຮອງເລຂາໜ່ວຍພັກ, ມີສະມາຊິກພັກ-ພະນັກງານ ແລະ ຜູ້ຕາງໜ້າຈາກຂະແໜງການອ້ອມຂ້າງກະຊວງ ຈຳນວນ 65 ສະຫາຍ.
ໃນກອງປະຊຸມຄັ້ງນີ້ ສະຫາຍ ນາງ ສີສົມບູນ ອຸນາວົງ ຄະນະພັກກະຊວງ, ເລຂາໜ່ວຍພັກ ຕາງໜ້າໃຫ້ຄະນະໜ່ວຍພັກກົມຮ່ວມມືສາກົນ ໄດ້ຜ່ານບົດລາຍງານການເມືອງ ແລະ ສະຫຼຸບຕີລາຄາຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ຂອງຕົນ ແລະ ແຜນ ພັດທະນາວຽກງານຮ່ວມມືສາກົນໃນຕໍ່ໜ້າ ພ້ອມດ້ວຍວຽກຈຸດສຸມທີ່ພົວພັນໂດຍກົງກັບການພັດທະນາວຽກງານຮ່ວມມືສາກົນທັງໃນສູນກາງ ແລະ ທ້ອງຖິ່ນ ເຮັດໃຫ້ວຽກງານການເມືອງ-ແນວຄິດ ແລະ ວຽກງານວິຊາສະເພາະຂອງກົມຮ່ວມມືສາກົນ ໃນໄລຍະ 5 ປີຜ່ານມາໄດ້ຮັບຜົນສຳ ເລັດຢ່າງເປັນກ້າວໆມາ, ເປັນຕົ້ນຄະນະໜ່ວຍພັກໄດ້ຖືສຳຄັນວຽກງານຊີ້ນຳ-ນໍາພາທາງດ້ານການເມືອງ-ແນວຄິດ ໂດຍໄດ້ເອົາໃຈໃສ່ສຶກສາອົບຮົມ, ຄົ້ນຄວ້າເຊື່ອມຊືມບັນດາມະຕິ, ຄໍາສັ່ງຕ່າງໆຂອງພັກກໍ່ຄືລະບຽບກົດໝາຍຂອງລັດ ໃຫ້ບັນດາສະມາຊິກພັກມີແນວຄິດອຸ່ນອ່ຽນທຸ່ນທ່ຽງ, ມີຄວາມຈົງຮັກພັກດີ, ເຊື່ອໜັ້ນຕໍ່ການນຳພາຂອງພັກ, ຈຳແນກໄດ້ມິດ ແລະ ສັດຕູຢ່າງຈະແຈ້ງ, ມີສະຕິຕໍ່ການຈັດຕັ້ງ, ຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ. ພ້ອມນັ້ນ, ກຳແໜ້ນວຽກງານການສ້າງໜ່ວຍພັກແຂງ-ຮູ້ນຳພາຮອບດ້ານ ແລະ ໄດ້ດຳເນີນກອງປະຊຸມສ່ອງແສງໜ່ວຍພັກຂອງກົມເປັນປະຈຳປົກກະຕິ.
ໜ່ວຍພັກຍາມໃດກໍ່ຕັ້ງໜ້າປະຕິບັດໜ້າທີ່ຂອງຕົນ ເປັນເສນາທິການໃຫ້ການນຳຂອງກະຊວງແຜນການ ແລະ ການລົງທຶນ ໃນການເຮັດໜ້າທີ່ປະສານງານ, ລະດົມຂົນຂວາຍ ແລະ ຍາດແຍ່ງການຊ່ວຍເຫຼືອເພື່ອການພັດທະນາ ແລະ ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ ພ້ອມທັງລົງຊຸກຍູ້ຕິດຕາມ-ກວດກາການຈັດຕັ້ງປະຕິບັດບັນດາແຜນງານຢ່າງຕໍ່ເນື່ອງໃຫ້ເກີດປະສິດທິຜົນສູງສຸດ; ແບບແຜນວິທີເຮັດວຽກ ແລະ ການນຳພາ ໄດ້ຈັດຕັ້ງປະຕິບັດລະບົບເຮັດວຽກຕາມຫຼັກການລວມສູນປະຊາທິປະໄຕບຸກຄົນຮັບຜິດຊອບ; ວຽກງານກໍ່ສ້າງພັກ-ພະນັກງານ, ຂະຫຍາຍພັກ ແລະ ປ້ອງກັນພັກໜ່ວຍພັກ ໄດ້ດຳເນີນຊີວິດການເມືອງຢ່າງເປັນປົກກະຕິທຸກໆເດືອນມີການຕຳນິສົ່ງຂ່າວ, ກໍ່ສ້າງເຊິ່ງກັນ ແລະ ກັນ ພາຍໃນພັກ ເພື່ອເຮັດໃຫ້ພາຍໃນໝ່ວຍພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ; ຜ່ານຂະບວນການສ້າງໜ່ວຍພັກແຂ່ງຮູ້ນໍາພາຮອບດ້ານສາມາດ ຍາດໄດ້ໜ່ວຍພັກແຂງຮູ້ນຳພາຮອບດ້ານ 4 ປີ ຕໍ່ເນື່ອງ (2014-2017) ຈັດແບ່ງປະເພດສະມາຊິກພັກໄດ້ປະເພດແຂງທັງໜົດ 95 ເທື່ອສະຫາຍ; ຂະຫຍາຍສະມາຊິກພັກໄດ້ໃໝ່ 10 ສະຫາຍ, ມີສະມາຊິກສຳຮອງ 03 ສະຫາຍ, ກວມເອົາ 56,14 % ຂອງພະນັກງານທັງໝົດ.
ຄຽງຄູ່ກັບຈຸດດີ ແລະ ຜົນງານຂອງຄະນະໜ່ວຍພັກກົມຮ່ວມມືສາກົນ ໃນການນໍາຊີ້ນຳ-ນຳພາວຽກງານວິຊາສະເພາະຜ່ານມາກໍ່ຍັງມີບາງຂໍ້ຄົງຄ້າງ ທີ່ຈະຕ້ອງສືບຕໍ່ປັບປຸງ ແລະ ແກ້ໄຂໃນຕໍ່ໜ້າເປັນຕົ້ນ ຍັງມີສະມາຊິກພັກຈຳນວນໜຶ່ງບໍ່ທັນເປັນເຈົ້າການຄົ້ນຄວ້າຮ່ຳຮຽນ ແລະ ບໍ່ທັນຄົ້ນຄວ້າລົງເລີກບັນດານິຕິກຳ, ແນວທາງຂອງພັກ, ລະບຽບກົດໝາຍຂອງລັດ ລວມທັງການຍົກລະດັບດ້ານວິຊາສະເພາະຂອງຕົນ; ການຕຳນິຕິຊົມ ແລະ ສົ່ງຂ່າວເຊິ່ງກັນ ແລະ ກັນຍັງມີລັກສະນະຈົ່ງຈຽມ; ການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດຍັງບໍ່ທັນໜັກແໜ້ນວ່ອງໄວທັນການເຮັດໃຫ້ບາງວຽກງານຊັກຊ້າແກ່ຍາວເວລາ.
ກອງປະຊຸມໄດ້ດໍາເນີນການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ຈຳນວນ 5 ສະຫາຍ, ຍິງ 2 ສະຫາຍ ກອງປະຊຸມຄັ້ງປະຖົມມະລືກເປັນເອກະສັນເລືອກເອົາ ສະຫາຍ ນາງ ສີ ສົມບູນ ອຸນາວົງ ເປັນເລຂາ, ສະຫາຍ ນາງ ສາຍໝອນຄໍາ ມັງໜໍ່ເມກ ເປັນຮອງເລຂາ, ສະຫາຍ ສີສົມພອນ ເພັດດາວເຮືອງ ເປັນຄະນະ, ປະທານກວດກາໜ່ວຍພັກ, ສະຫາຍ ປອ ອາ ລຸນຍະເດດ ຣາຊະພົນ ເປັນຄະນະ ແລະ ສະຫາຍ ວັນເພັງ ແສງມະໂນທອງ ເປັນຄະນະ.
ໃນຕອນທ້າຍຂອງກອງປະຊຸມ ສະຫາຍ ປອ ສຸພັນ ແກ້ວມີໄຊ ໄດ້ໂອ້ລົມຕໍ່ກອງປະຊຸມໃນຄັ້ງນີ້ ເຊິ່ງສະຫາຍໄດ້ສະແດງຄວາມຍໍຍ້ອງຊົມເຊີຍຕໍ່ການປະຕິບັດໜ້າທີ່ວຽກງານ ແລະ ຜົນງານທີ່ຍາດມາໄດ້ໃນໄລຍະ 5 ປີທີ່ຜ່ານມາຂອງໜ່ວຍພັກກົມຮ່ວມມືສາກົນ ພ້ອມທັງໄດ້ສະແດງຄວາມຍິນດີຕໍ່ຄະນະໜ່ວຍພັກຊຸດໃໝ່ ທີ່ໄດ້ຮັບຄວາມໄວ້ວາງໃຈຈາກບັນດາສະຫາຍສະມາຊິກພາຍໃນໜ່ວຍພັກ ແລະ ຊົມເຊີຍຕໍ່ຜົນສໍາເລັດອັນຈົບງາມຂອງກອງປະຊຸມໃຫຍ່ ການນັບຖືການຈັດຕັ້ງ ແລະ ລະບຽບວິໄນຕ່າງໆຂອງພັກ ແລະ ກົດໝາຍຂອງລັດ ພ້ອມທັງຖືເອົາການຕຳນິສົ່ງຂ່າວຂອງໝູ່ຄະນະເປັນເຂັມທິດເຍືອງທາງ ແລະ ປັບປຸງຕົນເອງ; ກອງປະຊຸມຍັງໄດ້ຮຽກຮ້ອງໃຫ້ສະມາຊິກພັກທັງໝົດ ພ້ອມກັນເປັນຈິດໜຶ່ງໃຈດຽວ ເພື່ອຜ່ານຜ່າທຸກຂໍ້ຫຍຸ້ງຍາກ ໃນການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ສໍາເລັດຜົນເປັນຢ່າງດີ ເພື່ອປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າ ຢ່າງບໍ່ຢຸດຢັ້ງ...ຯ
ໂດຍ: ພອນສະຫວັນ
